NATIONAL NEWS

Naniniwala si Senator-elect Panfilo “Ping” Lacson na walang mali kung isasama ang publiko, maging ang Pangulo bilang mga tagamasid sa bicameral conference committee deliberations para sa pambansang budget.

Sa panayam ng DWIZ, sinabi ni Senator-elect Lacson na makakatulong ito upang matiyak na may transparency sa pagpapatupad ng national budget.

Dagdag pa ng incoming senator na kailangan ding isaalang-alang sa paghahanda ng budget ang development plans ng mga lokal na pamahalaan.

—sa panulat ni John Riz Calata

Ikinadismaya ni Senate President Pro-Tempore Jinggoy Estrada ang pagkakatalaga ni Police Major General Nicolas Torre III bilang susunod na hepe ng Philippine National Police.

Sa panayam ng DWIZ, sinabi ni Sen. Estrada na hindi maituturing na “good choice” ang pagkakapili kay Gen. Torre.

Ngayon lamang aniya magkakaroon ng aroganteng hepe ang pambansang pulisya.

Umaasa naman si Senador Estrada na maibabalik ni General Torre ang tiwala ng publiko sa mga pulis.

—sa panulat ni John Riz Calata

Pabor si Senate Committee on Basic Education Chairman Sherwin Gatchalian na gawing tatlong taon na lang ang kolehiyo.

Sinabi ito ni Senador Gatchalian sa panayam ng DWIZ, sa gitna ng lumulutang na balita na babawasan na ng isang semestre ang kolehiyo.

Binigyang-diin ng mambabatas na ang tunay na layunin ng K to 12 ay para mailagay sa senior high school ang general education at hindi na ito ulitin sa kolehiyo.

Sa kabila nito, ibinunyag ni Senador Gatchalian na may mga asignatura pa rin na mula sa senior high school ang inuulit sa kolehiyo.

—sa panulat ni John Riz Calata

Walang special treatment na matatanggap si dating Negros Oriental Representative Arnolfo “Arnie” Teves Jr. na kasalukuyang nakadetine sa New Bilibid Prison sa Muntinlupa City.

Ito ay ayon mismo sa abogado ng dating kongresista na si Atty. Ferdinand Topacio.

Sinabi ni Atty. Topacio na napagkasunduan nila ni National Bureau of Investigation Director Jaime Santiago na tatalima sila sa lahat ng detention prisoners rules, kabilang na ang pagsama ni Teves sa iba pang mga inmates.

Maiiwasan aniya nito ang posibleng pagpuna ng publiko laban kay Director Santiago.

Sinabi ni Atty. Topacio na makakasama ni Teves ang ibang inmate sa isang ten-square meter cell na may bunk bed, sariling palikuran, at maliit na electric fan kagaya ng sa ibang mga selda.

Ang dating kongresista ang itinuturong utak sa pagpatay kay dating Negros Oriental Governor Roel Degamo.

—sa panulat ni John Riz Calata

Nangungunang sanhi pa rin ng pagkamatay sa Pilipinas ang ischemic heart disease o coronary heart disease noong 2024.

Ito ay batay sa Philippine Statistics Authority, kung saan umabot sa 96,000 ang kaso ng pagkamatay mula sa nasabing kondisyon o katumbas ng 19.3% mula Enero hanggang Nobyembre noong nakaraang taon.

Pumangalawa naman ang neoplasms o ang abnormal na paglaki ng tissue na may mahigit 55,000 na kaso o 11.1% ng kabuuang bilang ng pagkamatay sa parehong panahon.

Ikatlo naman ang cerebrovascular na isang kondisyon na nakakaapekto sa mga daluyan ng dugo sa utak, na may halos limampung libong kaso o 9.9% ng kabuuang pagkamatay.

Sumunod naman ang pulmonya na may mahigit 33,000 na kaso; at diabetes mellitus na may mahigit 30,000 na kaso.

—sa panulat ni John Riz Calata

Naniniwala si Senador Aquilino ‘Koko’ Pimentel III na paglabag sa sariling rules ng Senado ang pag-urong sa petsa ng impeachment trial ni Vice President Sara Duterte.

Ayon kay Senador Pimentel, alinsunod sa Senate Impeachment Rules, kailangang magbigay-daan ng legislative agenda para sa impeachment trial.

Wala rin aniya siyang nakikitang dahilan para ipagpaliban ang impeachment dahil magsisimula pa lamang sa susunod na Congress o sa Hulyo, ang ‘full-blown’ trial at hindi sa mga nalalabing araw ng 19th Congress.

Dagdag ng mambabatas, tatanungin pa niya si Senate Francis ‘Chiz’ Escudero kaugnay sa iba pang detalye ng paglipat ng petsa ng impeachment ni VP Sara sa pagsisimula ng plenaryo ngayong araw.

—sa panulat ni John Riz Calata

Tikom si Vice President Sara Duterte sa usaping ‘reconciliation’ sa pagitan nila ni Pangulong Ferdinand Marcos Jr.

Sa isang interview sa The Hague, sinabi ni VP Sara na hindi muna mahalagang pag-usapan ang mga personal na problema.

Mas mahalaga aniya ang taumbayan at ang bansa.

Nabatid na kamakailan lamang ay sinabi ni Pangulong Marcos na bukas siya sa pakikipagbati sa kampo ng mga Duterte.

—sa panulat ni John Riz Calata