NATIONAL NEWS

Nilinaw ng Palasyo na walang inilalabas na video ang Malacañang o si Pangulong Ferdinand Marcos, Jr. na bumabati sa kaarawan ni Vice President Sara Duterte.

Kasunod ito ng kumakalat na video sa social media na binabati ng Pangulo ang Bise Presidente sa kaarawan nito noong Mayo 31.

Ayon kay Palace Press Officer at Communications Usec. Claire Castro, kung pagbabatayan ang kumakalat na video message, ito ay ang mensahe at pagbati ng pangulo para sa birthday ni Vp sara noong 2023, kung saan binati nito sa lenggwaheng Bisaya ang pangalawang pangulo.

—sa panulat ni John Riz Calata

Kumpiyansa si Pangulong Ferdinand Marcos Jr. na malaki ang magagawa ng bagong liderato ng Philippine National Police sa katauhan ni General Nicolas Torre III upang maabot ang nais na uri ng PNP.

Ito, ayon sa pangulo, ay ang pulisyang kumikilos nang may pag-iingat, tumutugon nang may malasakit, at may pananagutan.

Aminado si Pangulong Marcos na hindi ganoon kadaling maabot ang oportunidad na makamit ang tiwala ng publiko at mapabuti pa ang pagseserbisyo sa mga ito.

Mensahe naman ng Presidente kay General Torre, ang pagkakatalaga nito sa kanyang bagong tungkulin ay nataon sa panahon kung saan kailangang magpakita ng katapangan at paninindigan sa harap ng mga hamong dapat kaharapin.

—ulat mula kay Gilbert Perdez (Patrol 13)

Desisyon pa rin ng Senado bilang plenaryo ang mananaig sa impeachment ni Vice President Sara Duterte.

Ito ang sinabi ni Senate President Francis “Chiz” Escudero sa gitna ng iba’t ibang opinyon kaugnay ng nakatakdang impeachment laban sa Bise Presidente.

Ayon kay Escudero, sa huli ay desisyon ng mayorya ng mga senador ang masusunod.

Dagdag pa niya, kung may naniniwalang labag sa Konstitusyon ang pag-urong ng pagbasa sa Articles of Impeachment ni VP Sara, o ang pag-convene ng Senado bilang impeachment court, may karapatan silang magsampa ng kaso sa Korte Suprema.

Ipinaliwanag din ni Escudero na pagkatapos ng Hunyo 30 ay wala nang otoridad ang prosekusyon dahil tapos na ang 19th Congress. Wala ring pre-trial na maaaring gawin mula Hunyo 30 hanggang bago ang SONA sa Hulyo 27.

Anuman ang mapagkasunduan ng 19th Congress tungkol sa impeachment court, hindi ito kailangang sundin ng 20th Congress. Kailangan aniyang mag-convene muli ang mga senador bilang impeachment court kung itutuloy ito sa susunod na Kongreso.

—sa panulat ni John Riz Calata

Isa ang Pilipinas sa mga bansang may pinakamataas na bilang ng mga empleyadong nakararanas ng stress, anxiety, depression o labis na kalungkutan, ayon sa AXA Mind Health report.

Halos pito sa bawat sampung Pilipino ang apektado ng mga isyung ito, na pangunahing dulot ng kawalan ng katiyakan sa usaping pinansiyal at trabaho.

Maraming manggagawa ang nawawalan ng pag-asa para sa hinaharap, naapektuhan ng negatibong balita at alalahanin sa pagbabago ng ekonomiya.

Mas matindi ang epekto sa mga nasa edad labingwalo hanggang tatlumpu’t apat, na mas madalas makaranas ng malubhang sintomas ng mental health issues.

Nanawagan ang mga eksperto sa mga employer na palakasin ang suporta sa mental health sa mga opisina upang mapabuti ang kalagayan ng mga manggagawa sa bansa.

—sa panulat ni Jasper Barleta

Tiniyak ng AirAsia Move ang kanilang pakikipagtulungan sa gobyerno upang isulong ang transparency at patas na presyo para sa kapakanan ng mga consumer.

Tugon ito ng AirAsia Move matapos ipag-utos ng Department of Transportation ang pagsasampa ng kasong economic sabotage sa nasabing online booking site dahil umano sa labis na paniningil ng pasahe.

Ipinag-utos din ni DOTr Secretary Vince Dizon sa Civil Aeronautics Board na ipasara ang nasabing online booking platform.

Gayunman, nilinaw ng nabanggit na online platform na hindi nila mano-manong itinatakda o minamanipula ang airfares.

Nag-ugat ang kautusan ng kalihim sa sumbong na umabot umano sa 40,000 pesos ang one-way ticket ng AirAsia patungong Tacloban City, Leyte.

Naniniwala si Senator-elect Panfilo “Ping” Lacson na walang mali kung isasama ang publiko, maging ang Pangulo bilang mga tagamasid sa bicameral conference committee deliberations para sa pambansang budget.

Sa panayam ng DWIZ, sinabi ni Senator-elect Lacson na makakatulong ito upang matiyak na may transparency sa pagpapatupad ng national budget.

Dagdag pa ng incoming senator na kailangan ding isaalang-alang sa paghahanda ng budget ang development plans ng mga lokal na pamahalaan.

—sa panulat ni John Riz Calata