NATIONAL NEWS

Mag a-update na ang Social Security System (SSS) ng contact information ng kanilang mga miyembro.

Ito’y matapos muling buksan ng SSS ang online updating ng records sa My.SSS portal.

Ayon kay SSS president at chief executive officer Michael Regina, maaari nang baguhin ng SSS members ang kanilang contact details tulad ng telephone number, mobile number, mailing address, foreign address at e-mail address, nang hindi na kailangan magpunta sa SSS branch o via Online.

Pero kung walang rehistradong mobile number, kailangang magtungo ng miyembro sa SSS at isumite ang mobile number sa pamamagitan ng Member data change request form at mag-set ng appointment sa pamamagitan ng kanilang My.SSS account.

Noong Agosto a-3 2021, sinuspinde ng SSS ang online updating ng contact details para bigyang-daan ang upgrade sa Online portal.

Tumaas na ang presyo ng imported na bigas sa mga pamilihan sa bansa.

Ayon kay Rosendo So, chairman ng Samahang Industriya ng Agrikultura (SINAG), dahil ito sa price hike ng bigas sa International Market na $50 na kada metriko tonelada.

Bahagya namang bumaba ang presyo ng lokal na bigas na nasa P38 hanggang P40 kada kilo.

Bukod sa bigas, tumaas din ang presyo ng gulay sa bansa maging ang transportation cost nito.

Inaasahan naman ang pagsipa ng presyo ng isda na karaniwan tuwing tag-ulan.

Ligtas at epektibo para sa mga edad anim na buwan hanggang limang taon ang tatlong doses ng Pfizer-Biontech vaccines.

Sinabi ito ng US Food and Drug Administration kasabay ng pinaplanong pulong para pag-usapan kung papayagan na ring mabakunahan ang mga natitirang underage group na hindi pa eligible sa bakuna.

Ayon kay Pfizer CEO Albert Bourla, batay sa kanilang ginawang Clinical trial, lumabas na 80.3% na epektibo ang tatlong doses na 3 micrograms kada turok.

Bagaman mayroong side effects, tiniyak ni Bourla na kaparehas lang ito ng iba pang bakuna.

Umaasa naman ang Pfizer official na makukumpleto na ang pag-aaral upang maturukan na rin ng bakuna ang mga anim na taon hanggang limang buwang gulang.

Aprubado na ng Regional Tripartite Wages and Productivity Board (RTWPB) ang P55 na dagdag-sahod para sa mga minimum wage earner sa Region 5.

Ayon sa Department of Labor and Employment, hahatiin sa dalawang tranche ang P55 na umento sa sahod sa rehiyon.

Unang ibibigay ang P35, oras na maging epektibo ang kautusan habang sa December 1, 2022 ipatutupad ang dagdag pang P20.

Dahil sa kautusan, aabot na sa P365 ang minimum wage rate sa Bicol.

Maliban sa wage hike, inaprubahan din ng Wage Board ang 1K hanggang 1, 500 na dagdag sahod ng domestic worker sa rehiyon kaya aabot na sa 4K ang kanilang buwanang sahod.

Tuloy ang paghahanda ng Commission on Elections (COMELEC) para sa Barangay at SK elections sa kabila ng planong ipagpaliban ito.

Ayon kay COMELEC commissioner George Garcia, hindi totoo ang balita na nagamit na ng poll body ang lahat ng pondo para sa Barangay at SK elections sa Disyembre.

Sa katunayan, wala pa aniya silang natatanggap ng pondo mula sa Department of Budget and Management (DBM).

Tiniyak naman ng poll official na hindi magagalaw ang pondong ibibigay ng DBM sakaling ipagpaliban ang Barangay elections.

Sa Hunyo o Hulyo inaasahan ang muling pag-uumpisa ng voter’s registration.

Nilinaw ng Commission on Elections (COMELEC) na wala nang pakinabang ang natagpuang election-related documents sa bakanteng lote sa Amadeo, Cavite.

Ayon kay COMELEC commissioner George Garcia, basura na ang mga balota at election paraphernalia na nakasilid sa itim na kahon.

Gayunman, itutuloy pa rin ng COMELEC ang imbestigasyon para hindi mabalik sa kanila ang sisi.

Unang kumalat sa Facebook ang video at larawan ng mga black box sa Cavite na naglalaman ng Election Returns, ink, stamp pads, secrect folders at iba pang gamit sa halalan.

Kasado na ngayong araw ang idaraos na special elections sa 12 barangay sa Bayan ng Tubaran, Lanao del Sur.

Ayon kay Teofisto Elnas, Deputy Executive Director for Operations ng Commission on Elections, 6, 921 rehistradong botante ang lalahok sa special polls.

Nakadeploy na rin ang Contingency Vote Counting Machines at SD cards sakaling magkaroon ng aberya.

Samantala, aabot sa 60 pulis ang idineploy sa lalawigan upang magsilbing Special Board of Election Inspectors.

Nagpulong naman ang AFP, PNP, Field Operations Group ng Project Management Office at Gun ban and Security Concerns Committee para sa security plan sa halalan.

MAGKAKASUNOD na nag-courtesy call kay incoming President Ferdinand ‘Bongbong’ Marcos, Jr., ang apat na diplomats mula sa bansang Amerika, Japan, South Korea at India sa BBM Headquarters sa Mandaluyong City ngayong Lunes ng umaga.

Unang bumisita kay Marcos si Japanese Ambassador to the Philippines Kazuhiko Koshikawa dakong alas-9:00 ng umaga, kasunod si South Korean Ambassador Kim Inchul na dumating ganap na alas-10:00 ng umaga.

Bandang alas-11:00 ng umaga ay nagbigay -pugay din kay Marcos si Indian Ambassador Shambhu S. Kumaran, kasunod si US Chargé d’Affaires Heather Variava na dumating bago mag-alas-12:00 ng tanghali.

Sa pakikipagpulong kay Marcos, tiniyak ng mga envoy ang pagpapalakas sa ugnayan sa ‘trade and diplomacy’ ng kani-kanilang bansa sa Pilipinas, gayundin ang iisang layunin sa pagsusulong ng matatag na demokrasya, ‘self-determination,’ at ‘economic recovery.’

“We were able to discuss many of the things that how are we going to handle the next few years in terms of the relationship of our countries,” ani Marcos sa press conference matapos ang serye ng pakikipagpulong sa mga diplomats.

Tiniyak aniya ng apat na diplomat ang kahandaan nilang magbigay ng tulong sa Pilipinas, partikular sa mga programa may kaugnayan sa pagbangon ng ekonomiya na pinalugmok ng pandemya.

“Ang lagi ko lang pinapaalala sa kanila sinasabi ko palagay ko sa pandemyang ito ang recovery ng lahat natin ay hindi kakayanin ng kahit na isang bansa kahit na gaano kayaman kailangan the partnership will be the one that will bring us to keep the global economy as stable as possible,” sabi pa ni Marcos.

“As you know, nakakatanggap na ako ng mga congratulatory messages from heads of states nakausap ko na sila, ang unang nakatawag sa amin ay si US President Joe Biden, and Chinese President Xi,” dagdag pa ni Marcos.

“Also, Japanese Prime Minister Kishida, I even spoke with the outgoing Prime Minister of Australia, PM Morrison who had just went through an election. So, marami na talagang nangyayari, we’re already being recognized, This new administration is being recognized mukha namang wala ng problema sa recognition. Maybe the comfortable margin that we enjoy during the election has a part to play with that,” wika pa niya.

“We’ve been having excellent progress for the past few years, and we look forward to continuing the progress that in the relevance under the new administration,” sabi naman ni Indian Ambassador Kumaran.

Maliban sa Indian ambassador, ang tatlo pang diplomat ay tumanggi nang magpa-interview sa mga mamamahayag.

Sa kanyang panig, siniguro ni Marcos na ang Pilipinas ay nananatiling kaibigan, ka-partner at kaalyado ng apat na bansa.

Si Marcos, ang kauna-unahang majority president simula noong 1986,  ay nanalo via landslide sa nakuhang 31 milyon boto nitong nakalipas na  May 9 national elections.

Nauna nang nagpahayag ng suporta at pagbati sa paparating na Marcos administration ang mga ‘powerful leaders’ ng bansang US, China, Russia, Japan, South Korea at mga pinuno ng European Union.

Pinuri rin ng mga ito ang pagkakaroon ng malinis, maayos at mapayapang eleksiyon ng Pilipinas.