NATIONAL NEWS

Nasabat ng mga tauhan ng National Meat Inspection Service (NMIS) ang nasa 233.6 kilo ng mishandled frozen meat sa City Market of Antipolo.

 Wala umanong maiprisintang meat inspection certificate ang ilang nagtitinda ng karne ng baboy sa nasabing pamilihan.

 Ang mga nakumpiskang mishandled frozen meat ay agad na ibinaon sa lupa dahil hindi na ito maaaring kainin at posibleng magdulot pa ng sakit.

 Patuloy ang pagbabantay ng mga otoridad sa lungsod upang matiyak ang ligtas at dekalidad na karneng ibinebenta sa iba’t-ibang pamilihan sa Antipolo.

Tinanggap na ni Cavite Representative Jesus Crispin “Boying” Remulla ang alok na maging susunod na Justice Secretary.

 Sinabi ni Remulla na bihira ang ganitong oportunidad sa mga tulad niyang abogado.

 Marami aniyang mga bagay ang kailangan nilang talakayin ni presumptive president Ferdinand Marcos Jr., gayong maraming problema ang justice system ng bansa.

 Mababatid na nare-elect si Remulla bilang representative ng ika-pitong distrito ng Cavite sa katatapos lamang na 2022 elections.

 Dahil dito, sinabi ni Remulla na maaaring mag-appoint ng caretaker o magsagawa ng special elections para humalili sa kanya.

 Samantala, wala pang inilalabas na pahayag ang kampo ni Marcos hinggil sa pahayag ni Remulla.

Tiniyak ni Dr. Sevillo David Jr., Executive Director ng National Water Resources Board (NWRB), na sapat ang tubig sa Angat dam upang makapagsuplay ng tubig sa Metro Manila.

 Sa panayam ng DWIZ, sinabi ni David na nasa normal ang operating level nito.

 Umaasa naman aniya ang NWRB na magtutuloy-tuloy ang pag-ulan upang makarekober ang nasabing dam.

 Pinayuhan naman ni David ang publiko na maging responsable sa paggamit ng tubig.

 Isang temporary exhibition ang ilulunsad ng National Museum of the Philippines kung saan ibibida ang mga artworks ng mga endemic at native species ng mga halaman at hayop.

 Ito ay bilang bahagi ng selebrasyon ng museo ng Biodiversity Day at National Heritage month, na may temang “Natural Heritage in Focus: the Philippine Flora and Fauna Art Exhibition.”

 Inilunsad ang nasabing proyekto sa pakikipagtulungan sa Philippine Botanical Art Society (PHILBAS) at Philippine Fauna Art Society (PHILFAS).

 Ang National Museum of Natural History ay bubuksan sa publiko simula bukas, May 24 hanggang September 25.

Maaaring maging pandemic rin ang ‘Monkeypox’ virus dahil sa mabilis na pagkalat nito sa iba’t ibang bansa.

 Sa panayam ng DWIZ, sinabi ni Dr. Ted Herbosa, Medical Adviser ng National Task Force against COVID-19,  bagama’t kaunti pa lamang ang mga naitalang kaso ay dumoble na ang bilang nito makalipas lamang ang ilang araw.

 Ang sintomas aniya ng naturang sakit ay kagaya ng sintomas ng bulutong tubig.

 Mababatid na naitala na ang nasabing sakit sa Portugal, Spain, United Kingdom, United States at Australia.

Pinag-aaralan ng Department of Transportation (DOTR) ang posibilidad na muling i-extend ang libreng sakay sa Metro Rail Transit 3 (MRT-3).

 Ayon kay DOTR Undersecretary Timothy Bathan, inaaral na nila ang posibilidad na pagpapalawig sa libreng sakay program at pinayuhan ang mga commuter ng MRT-3 na mag-abang ng anunsiyo kaugnay sa nalalapit na pagtatapos ng unang extension ng libreng sakay sa Mayo 30.

 Magugunita na unang ipinatupad ang libreng sakay sa MRT-3 noong Marso 28 hanggang Abril 30 subalit pinalawig ito hanggang Mayo 30 taong kasalukuyan.

 Mababatid na layon ng programa na mabawasan ang sakripisyo ng publiko sa epekto ng mataas na presyo ng produktong petrolyo at bilang selebrasyon na rin sa nakumpletong rehabilitasyon ng mrt-3.

Binigyang-diin ni Health Secretary Francisco Duque III na hindi pa kailangang magsara ng mga border ang bansa sa gitna ng banta ng monkeypox virus.

 Ayon sa kalihim, inatasan na rin niya ang Bureau of Quarantine (BOQ) upang  bantayan ang mga pumapasok na pasahero mula sa mga bansang may na-detect ng kaso ng monkeypox, tulad ng Canada, Italy, Sweden, Spain, Portugal, Europe, at North America.

 Mababatid na kabilang sa mga sintomas ng monkeypox ay lagnat, rashes, at swollen lymph nodes.

 Samantala, sa ngayon ay wala pang naitatalang kaso ng nasabing virus sa Pilipinas.

Inihayag ng Philippine Coast Guard (PCG) na negatibo sa ‘oil spill’ ang bahagi ng baybayin kung saan nasunog ang fast craft Mv Mercraft 2 kaninang umaga sa Real, Quezon.

 Ayon sa assessment ng PCG sa traces ng oil spill ay walang nakitang pagtagas ng langis sa naturang lugar.

 Mababatid na natagpuan na ang lahat ng 134 na sakay ng nasabing barko kung saan kabilang rito ang 126 pasahero at walong crew.

 Samantala, patuloy na iniimbestigahan ng mga otoridad ang sanhi ng sunog.

Suportado sa senado ang pagpapalawig ng Work-from-Home program hanggang matapos ang deklarasyon ng state of calamity ng pamahalaan sa Setyembre para sa Business Processing Outsorcing (BPO).

 Ayon kay Senador Imee Marcos, sinusuportahan niya ang panukala kahit nagpalabas na ng Back-to-Office order ng ang Department of Finance (DOF).

 Bagama’t nilinaw ng DOF na kailangan amiyendahan ang tax code upang payagan ng mga kompanya sa economic zone na manatili ang remote work arrangements habang pinananatili nila ng kanilang fiscal incentives.

 Ngunit, binigyang-diin ni Marcos na kapag ginawa ito ay maitataboy ang pagpasok ng foreign investors at mahihirapan ang susunod na administrasyon na mapanatili ang paglago ng pamuhunan.