Pumalo na sa mahigit 150.5M doses ng COVID-19 vaccines ang naiturok sa Pilipinas.
Ayon kay acting Presidential spokesperson Martin Andanar, 69.3M sa bilang ay fully vaccinated na o 77% ng target na populasyon.
Aabot naman sa 73.9M doses ang naiturok bilang unang dose habang 14.1M ang nakatanggap ng booster shot.
Umabot naman sa 2.7M ang nakakumpleto ng bakuna sa hanay ng mga batang edad 5 hanggang 11.
Naghain ng panibagong diplomatic protest ang Department of Foreign Affairs (DFA) laban sa Unilateral Fishing Ban ng Tsina sa pinag-aagawang West Philippine Sea.
Iginiit ng DFA na hindi kinikilala ng Pilipinas ang Fishing Moratorium mula May 1 hanggang August 16 dahil sakop nito ang katubigan kung saan may soberanya at hurisdiksyon ang bansa.
Binigyang-diin ng kagawaran na anumang Chinese Fishing Ban sa South China Sea na sakop ang Exclusive Economic Zone ng Pilipinas ay iligal.
Alinsunod ito sa napanalunang kaso ng bansa sa Permanent Court of Arbitration sa the Hague, Netherlands noong 2016.
Kinikilala rin sa nasabing desisyon ang tradisyunal at lehitimong karapatan ng mga Pilipino na mangisda sa nabanggit na lugar.
Tinanggihan ni Pangulong Rodrigo Duterte ang pinaplanong alok ni President-elect Ferdinand ‘Bongbong’ Marcos Jr. sa kaniya na maging bagong drug czar ng papasok na administrasyon.
Ayon kay Pangulong Duterte, hindi pa panahon upang tanggapin niya ang alok.
Hindi na rin aniya nais ng Pangulo na makisawsaw sa mga magiging programa ni Marcos.
Gayunman, handa naman ang Punong ehekutibo sa oras na humingi ng payo si PBBM kaugnay sa War on Drugs sakaling hindi ito magkaroon ng sariling pamamaraan.
Aminado si Defense Secretary Delfin Lorenzana na nananatili ang presensya ng mga mangingisda mula China at Vietnam sa pinag-aagawang West Philippine Sea.
Ayon kay Lorenzana, hindi naman maaaring itaboy ng gobyerno ng Pilipinas ang mga nasabing mangingisda dahil sa pangambang pagsimulan ito ng digmaan.
Pawang Pilipinas, China at Vietnam anya ang nagki-claim sa ibang bahagi ng West Philippine Sea kaya’t madalas na makikita ang mga barko ng Chinese fishermen o mga coast guard na nagpa-patrol.
Nito lamang Abril nang harangin ng China Coast Guard ang isang research vessel ng Bureau of Fisheries and Aquatic Resources sa Ayungin Shoal, na bahagi ng Exclusive Economic Zone ng Pilipinas.
Sinimulan na ng Department of Health (DOH) ang kampanyang “smoke-free beaches, parks and tourist destinations”, kasabay ng pagdiriwang ng “World No Tobacco Day” kahapon.
Layunin ng nasabing kampanya na protektahan ang mga beach, pasyalan at iba pang tourist spot maging ang kalusugan ng mga mamamayan laban sa masamang epekto sa katawan at kapaligiran ng paninigarilyo.
Ayon kay Health Secretary Francisco Duque, III, tatagal ng walong buwan ang smoking ban at sakop nito ang ilang lugar sa Boracay Island, Aklan at iba pang tourist destination.
Kasama rin anya sa mga “pilot area” para sa smoke-free beaches campaign ang Palawan, Caramoan sa Camarines Sur at iba pang “premiere beach destinations”.
Sa datos ng Stopping Tobacco Organizations and products taun-taon, aabot sa 4.5 trilyong sigarilyo ang itinatapon bilang basura habang 4.2 milyong upos ng yosi ang nauuwi sa mga dalampasigan at waterways.
Limang suspek ang inaresto sa ikinasang joint operation ng pinagsanib pwersa ng mga tauhan ng Southern Police District (SPD) Drug Enforcement Unit, District Intel Division at District Mobile Force Battalion sa No. 79 Extension, C6 Service Road, Barangay New Lower Bicutan, Taguig City
Kinilala ang mga suspek na sina Christopher Estillore Oroyan, 47-anyos, maintainer ng drug den; habang kasamang inaresto ang mga users o gumagamit ng ilegal na droga na sina Mark Jacinto Mamonon, 46-anyos na isang land lord; Ronaldo Ocampo Marcelino, 55-anyos; Domingo Tabamo Mata, 49-anyos; at Felizarda Amarillo Imson, 49-anyos.
Ayon kay SPD Dir. B/Gen. Jimili Macaraeg nakumpiska sa mga suspek ang nasa 42 gramo ng hinihinalang shabu na may street value na P285,600 at mga baril kabilang na ang colt caliber .45; punisher caliber .45; pietro beretta caliber .22; tatlong magazines, mga bala ng nabanggit na mga baril, sling bag, eyeglasses case, coin purse, at buybust money na ginamit sa operasyon.
Pansamantalang nakapiit sa SPD Custodial Facility ang limang suspek na nahaharap sa kasong paglabag sa Comprehensive Dangerous Drugs Act of 2002 at Comprehensive of Firearm and Ammunitions Regulatory Act.
Asahan na sa mga susunod pang linggo ang panibagong oil price hike.
Ito, ayon sa Department of Energy (DOE), ay makaraang i-ban ng maraming bansa sa Europa ang langis mula sa Russia dahil sa patuloy na pananakop nito sa Ukraine.
Inihayag ni DOE-Oil Industry Management Bureau Director Rino Abad na posibleng sumipa nang husto ang presyo ng langis sa mga susunod na araw bilang reaksyon sa oil ban.
Bagaman nilinaw ni Abad na hindi maka-aapekto sa suplay ng petrolyo sa Pilipinas ang oil ban sa Russia, magiging mas mahal naman ang presyo nito.
Ibinabala ng kagawaran na maaaring sumipa sa 100 pesos ang kada litro ng gasolina kapag lumalaang sitwasyon sa suplay na sinasabayan ng pagtaas ng demand dahil sa pagbubukas ng ekonomiya ng iba pang bansa, gaya ng China at India.
Noon lamang Martes nagpatupad ng price adjustment sa kanilang mga produkto ang mga kumpanya ng langis.
Nagbigay ng mensahe si President-elect Ferdinand “Bongbong” Marcos Jr. para sa ika-44 na kaarawan ni Vice President-elect Sara Duterte-Carpio.
Sa Birthday message sinabi ng bagong pangulo na si Inday ang pinaka mahusay at hinihiling ng lahat na makatrabaho.
Nabatid na kamakailan ay nagpasalamat si Inday Sara Kay BBM dahil aniya mahaba raw ang pasensya nito sa kaniya noong panahon ng kampanya.
Iginiit ng Department of Education na patuloy pa ring gagamitin bilang opsyon ng kanilang ahensya ang blended learning para sa darating na pasukan.
Ayon kay Education Secretary Leonor Briones, hindi aalisin ng Pilipinas ang blended learning sa kabila ng paghikayat sa mga pampubliko at pribadong paaralan na magsagawa ng personal na klase para sa darating na School Year 2022- 2023.
Sinabi ni Briones na hindi dapat talikuran ng bansa ang teknolohiya, digitalization, at kasaysayan ng Pilipinas sa gitna ng pandemiya at muling pagbabalik ng Face-to-Face classes.
Iginiit ng kalihim na ang mga mag-aaral ay dapat matuto sa pamamagitan ng electronic at online media gayundin ang tradisyonal na face-to-face instruction.
Naglaan ng P1-B pondo ang Department of Labor and Employment (DOLE) para sa mga displaced workers sa rehiyon ng Cordillera.
Ayon kay DOLE regional Director Nathaniel Lacambra, nasa 164, 841 displaced workers na ang nakinabang sa employment assistance sa ilalim ng Tulong panghanapbuhay sa ilalim ng Disadvantaged/Displaced Workers o TUPAD program.
Sa datos ng ahensya noong Mayo a-25, ang lalawigan ng Benguet ang may pinakamalaking disbursement na P80, 827, 250 na may 15,429 na benepisyaryo; sinundan ng Baguio City na mayroong P10, 500, 000 na may 2,000 manggagawa; Apayao na mayroong P9, 891, 000 na may 1,884 na manggagawa; Abra na mayroong P8, 483, 220 na may 1,661 manggagawa; Kalinga na mayroong P3, 126, 590 na may 823 na manggagawa; Ifugao na mayroong P2, 732, 310 na may 770 na manggagawa; at Mt. Province na mayroong P1, 997, 500 na may 565 manggagawa.
Sa ngayon ay nasa kabuuang P1, 156, 762, 644.73 na ang nai-download sa ahensya kung saan, P957, 806, 510.72 na ang naipamahagi sa 164, 841 na benepisyaryo.
Tulong ng gobyerno sa mga displaced workers bilang emergency employment na nawalan ng trabaho sa gitna ng pandemiya.