NATIONAL NEWS

Binigyang-diin ni former Bayan Muna Representative at Human Rights and Public Interest Lawyer Cong. Neri Colmenares na hindi masosolusyunan ng isang rally lamang ang problemang kinakaharap ng bansa hinggil sa korapsyon.

Sa panayam ng DWIZ, sinabi ni Cong. Colmenares na sistematiko ang isyu ng pangungurakot sa bansa at kinakailangang magpursigi ng taumbayan upang tuldukan ito.

Dagdag pa ng dating kongresista na hindi dapat lubayan ng taumbayan ang isyu ng pagnanakaw sa kaban ng bayan.

Ayon kay Cong. Colmenares, dapat maging sistematiko ang bansa pagdating sa paghawak ng pondo ng bayan upang hindi matulad sa nangyari sa PDAF scam noon kung saan si Napoles lamang ang nakulong at hindi ang mga sangkot na senador at kongresista.

Magbubukas ng isang Pandora’s box kung sakaling umamin na si dating Bulacan District Engineer Henry Alcantara sa kanyang mga nalalaman sa kontrobersyal na flood control projects.

Ayon kay Senate President Pro-Tempore at Blue Ribbon Committee Chairman Panfilo “Ping” Lacson, malaki ang maitutulong ni Alcantara kung magsasalita na rin ito upang tuluyang mabuksan ang misteryo sa iniimbestigahang maanomalyang proyekto ng Senate Blue Ribbon Committee at Independent Commission for Infrastructure.

Dagdag pa ng Senate Pro-Tempore, kapani-paniwala rin ang pagtuturo ni Assistant Engineer Brice Hernandez kay Alcantara na siya umano ang mas nakakaalam kung sino ang mga nabigyan ng kickback ng pondo sa mga substandard at guni-guning proyekto.

Iginiit din ni Senador Lacson na posibleng umubra rin si Brice Hernandez sa Witness Protection Program dahil siya ang mas nagsasalita hinggil sa isyu, pero depende pa rin anya sa Justice Department kung gagawing state witness ang isang akusado sa naturang kaso.

Aminado si Senate President Tito Sotto na isang malaking hamon at krisis ang kinakaharap ng bansa ngayon sa isyu ng kurapsyon, partikular sa maanomalyang flood control projects.

Sa panayam ng DWIZ, sinabi ni Senador Sotto na humarap ang mga mambabatas ngayon sa krisis dahil malalaking personalidad ang sangkot sa naturang anomalya.

Dagdag pa ng lider ng Senado na dalawang direksyon lamang ang maaaring puntahan ng mga mambabatas upang lutasin ang isyu ng katiwalian sa bansa.

Kaugnay nito, plano ni SP Sotto na alisin ang mga district engineer sa bansa upang maiwasan ang kurapsyon sa mga proyektong pang-imprastraktura sa bansa.

Kumpiyansa si House Deputy Speaker at La Union Rep. Paolo Ortega V na gagawin rin ni House Speaker Faustino “Bojie” Dy III ang hakbang na ginawa noon ni dating House Speaker Martin Romualdez sa mabilis na paglalaan ng pondo sa mga lugar na apektado ng kalamidad.

Ito’y dahil sa posibleng epekto ng Super Typhoon Nando na pinalakas ng hanging habagat sa ilang lugar sa bansa.

Sa ambush interview, sinabi ni DS Ortega na mas mainam kung mas maaga ang preparasyon sa bawat rehiyon, partikular ang operasyon sa mga programa ng national government.

Sinabi ni Ortega na hindi maaaring ipagsawalang-bahala ang epekto ng bagyo kaya inaasahan na nila ang magiging hakbang ng Kamara laban sa natural calamities.

Dagdag pa ni Ortega na magkakaroon sila ng meeting para sa bagong direksiyon at tatahakin sa ilalim ng pamumuno ni Speaker Dy.

Buo ang suporta ni House Speaker Faustino “Bojie” Dy III sa panawagan ng ilang mambabatas na ipakita ang Statement of Assets, Liabilities, and Net Worth o SALN ng mga kongresista.

Tugon ito ni Speaker Dy nang matanong sa ambush interview ng mga mamamahayag kung susuportahan niya ang panawagang isapubliko ang SALN ng lahat ng opisyal ng gobyerno.

Binigyang-diin ng lider ng Kamara na kailangang maging bukas at maipakita ng mga miyembro ng mababang kapulungan ang kanilang commitment sa taumbayan.

Handa rin aniya siyang ipakita ang kaniyang SALN kung kinakailangan at kung ito ang paraan para maibalik ang tiwala ng publiko sa mababang kapulungan.

Patuloy ng kinansela ni House Speaker Faustino “Bojie” Dy III ang travel clearance ni Ako Bicol Partylist Rep. Rizaldy Co, kaugnay ito sa patuloy na imbestigasyon ukol sa flood control project.

Ayon sa liham ng Speaker, inatasan ni Dy na bumalik na sa bansa si Co sa loob ng sampung araw matapos nito matanggap ang kautusan.

Dagdag pa ni Dy na ang isyu ay para sa kahilingan ng publiko na humarap si Co patungkol sa usapin ng flood control project.

Banta rin ng Speaker na kapag hindi dumating si Co sa araw kung saan siya inaasahan na dumalo ay magkakaroon ito ng kaparusahan sa Kamara.

Matatandaang isa si Zaldy Co sa dinawit ni Pangulong Ferdinand Marcos Jr. na dawit sa maanomalyang flood control project.

Kasalukuyang nasa United States si Co upang magpagamot, ayon ito kay Atty. Princess Abante.

Inaasahan naman ni Dy ang pag-uwi ni Co bago matapos ang sampung araw na iniutos ng Kamara.

Inaprubahan ni Senate President Vicente “Tito” Sotto III ang kahilingan ni Blue Ribbon Committee Chair Panfilo “Ping” Lacson na pagbigyan si dating Bulacan First District Assistant Engineer Brice Hernandez ng labing dalawang oras na leave kahapon para makakuha ng mga dokumento at ebidensya na maaaring makatulong sa komite sa imbestigasyon sa maanomalyang flood control projects.

Nanatili si Hernandez sa ilalim ng escort at kustodiya ng Senate Sergeant-at-Arms sa lahat ng oras at muling ibinalik sa Senado sa parehong araw.

Anumang ebidensyang nakalap ng engineer ay maaari ibahagi sa Independent Commission for Infrastructure, Office of the Ombudsman, at Department of Justice para matiyak ang mga tamang hakbang upang matugunan ang katiwalian, at palakasin ang pananagutan sa mga pampublikong opisyal.

—sa panulat ni Mark Terrence Molave

Pag-aaralan ng Department of Justice kung isasalang ang ilang opisyal ng Department of Public Works and Highways para sa kanilang witness protection program.

Ayon kay Justice Secretary Jesus Crispin Remulla, mayroon na silang testigo mula sa DPWH na gusto nilang suriin para sa naturang programa.

Humingi na anya ng tulong ang kalihim sa ilang kaibigan niya sa Senado upang simulan ang proseso.

Samantala, nang tanungin kung bakit napili ang partikular na opisyal ng DPWH, sinabi ni Sec. Remulla na ito’y dahil tila bahagi siya ng mas malaking palaisipan sa kaso.

Maliban dito, may tatlo pa anyang indibidwal ang nagpahayag ng kanilang interest na masuri para sa WPP.

Sa kasalukuyan, hindi pa pinapangalanan ng kalihim kung sino ang nasabing mga indibidwal ngunit sinabi nito na ang isa’y kabilang sa top 15 contractors na nabigyan ng maraming flood control projects ng gobyerno.—sa panulat ni Mark Terrence Molave