NATIONAL NEWS

Nilinaw ng House of Representatives na walang “deadlock” sa pagitan ng dalawang kapulungan ng Kongreso tungkol sa panukalang gawing batas ang programa na Assistance to Individuals in Crisis Situation (AICS).

Ayon kay Davao Oriental 2nd district Rep. Cheeno Almario, may proseso lamang ng pag-uusap at pag-aayos ang Kamara at ang Senado kaya hindi ito maituturing na banggaan.

Nag-ugat ang isyu matapos hindi maaprubahan sa special session ang panukala, dahil sa hindi pagkakapareho ng bersyon ng Senado at Kamara, kabilang ang usapin sa “anti-epal” provision na nagbabawal sa ilang opisyal na gamitin ang ayuda para sa sariling interes o pamumulitika.

Inilunsad ng Office of Civil Defense at iba pang ahensya ng pamahalaan ang Harmonized National Contingency Plan upang mas epektibong makaresponde sa isang malakas na lindol na posibleng tumama sa Metro Manila, o ang karaniwang tinatawag na “The Big One.”

Ayon kay OCD Administrator Harold Cabreras, nakasaad sa 2026 HNCP ang posibilidad ng pag-pagtulong ng mga emergency responder mula sa iba’t ibang rehiyon sakaling tamaan ng malakas na lindol ang Greater Metro Manila Area, na kinabibilangan din ng Cavite, Laguna, Batangas, Rizal, Bulacan, at Pampanga.

Dagdag pa ni Cabreras, may papel din ang iba pang ahensya ng pamahalaan, tulad ng Department of Public Works and Highways, Department of Transportation, Philippine Navy, at Philippine Coast Guard.

Nabatid na inilunsad ang 2026 HNCP kasabay ng second quarter nationwide simultaneous earthquake drill kahapon, Hunyo 18. — sa panulat ni Anjo Riñon

Nakilala ang Pilipinas bilang pangunahing bansa ngayong taon sa listahan ng 20 bansa sa buong mundo na pinakamainam magretiro.

Batay sa listahan na isinapubliko ng expatriate group, nangunguna ang bansa sa buong mundo bilang top retiree destination matapos itong makakuha ng score na 78/100.

Ayon pa sa expatriate group, special visa para sa mga retiree, mababang cost of living, at madaling kasanayan sa kulturang Pilipino ang ilan sa mga dahilan kung bakit pinipili ng mga banyagang retiree ang Pilipinas.

Kasama naman ng bansa sa top 10 ng listahan ang Thailand, Colombia, Portugal, South Africa, Sri Langka, Malaysia, UAE, Mexico, España, Indonesia, Panama, at Qatar. — sa panulat ni Anjo Riñon

Kinumpirma ng Bureau of Immigration (BI) na nasa Pilipinas pa sina dating Ateneo coach Tab Baldwin, team manager Epok Quimpo, at tatlo pang assistant coaches.

Ayon sa BI, wala pa silang namo-monitor na paglabas ng bansa ng mga nasabing indibidwal, na kabilang sa Immigration Lookout Bulletin Order (ILBO) na inilabas ng Department of Justice (DOJ).

Samantala, sinabi ng BI na natanggap na nila ang ILBO mula sa DOJ at inilagay na sa kanilang database ang mga pangalan ng mga ito para sa mas mahigpit na monitoring.

Inihayag ni Manila 6th District Rep. Bienvenido “Benny” Abante na tila pinabayaan ng kampo ni Senador Alan Peter Cayetano ang 18 dating bodyguard na nagbunyag ng umano’y anomalya sa flood control projects, matapos na mauwi lamang sa press conference ang inaabangang pagdinig ng Senate Blue Ribbon Committee noong Hunyo 16.

Ayon kay Abante, ang mga testigo—na tinawag ding mga dating Marines at sundalo—ay naiwan sa alanganing sitwasyon matapos na hindi dumalo ang mga kaalyado ni dating Senate President Cayetano, kabilang si Senador Rodante Marcoleta, na inaasahang mangunguna sa pagdinig.

“After all the buildup, all the publicity, and all the dramatic accusations, the people left holding the bag were the witnesses themselves and their handler” — Cong. Abante

Naniniwala si Senador Panfilo “Ping” Lacson na maaaring kailanganing mamagitan ng Korte Suprema kung aabot sa siyam na senador-hukom ang masuspinde o makulong, katulad ng nangyari kay Senador Jinggoy Estrada na ipinatawan ng 90-araw na preventive suspension ng Sandiganbayan.

Ayon kay Lacson, maaaring humantong sa isang “absurdong” sitwasyon ang impeachment trial ni Bise Presidente Sara Duterte kung mababawasan ang bilang ng mga senador-hukom na maaaring bumoto.

Ipinaliwanag ng senador na kung 15 na lamang ang natitirang senator-judges na maaaring bumoto, imposibleng maabot ang kinakailangang 16 na boto upang mahatulan ang isang opisyal sa impeachment.

Ipinagtanggol ni Senador Alan Peter Cayetano ang kanyang madalas na pagla-live sa Facebook at kinuwestiyon ang mga kritiko na bumabatikos sa kanyang online broadcasts.

Sa kanyang Facebook Live, unang beses bilang minority leader, direktang tinawag ni Cayetano sina Senador Raffy Tulfo at Senador Erwin Tulfo, na dati nang bumabatikos sa kanya dahil sa pag-uulat umano sa social media sa halip na dumalo sa mga sesyon ng Senado.

Iginiit din niya na mas marami umanong nanonood sa kanyang mga live stream at inakusahan ang magkapatid na Tulfo na may itinatagong impormasyon.