NATIONAL NEWS

Kinumpirma ng Ateneo de Manila University na inihahanda na ang mga dokumento para sa repatriation ng labi ng student-athlete na si Divine Adili pabalik sa kanyang home country na Nigeria, alinsunod sa kahilingan ng kanyang pamilya.

Ayon sa ADMU, nakikipag-ugnayan na sila sa mga kinauukulan at sa pamilya Adili upang matiyak na mapapanatili ang dignidad at respeto sa namayapang atleta.

Kabilang din sa dalawang kinatawan na maghahatid sa labi ni Adili sina Father Munching de Guzman, SJ, at dumaan na rin ito sa mga kinakailangang bakuna at gamot para makapasok sa Nigeria.—sa panulat ni Reianne Antiquina

Hindi dapat kuwestiyunin ang pagtanggap sa mga bagong ebidensyang lumitaw kaugnay ng impeachment case ni Vice President Sara Duterte.

Ayon kay Bicol Saro Party-list Representative Terry Ridon, maaaring iharap ng magkabilang panig ang kanilang mga ebidensya sa panahon ng pre-trial, kabilang na ang mga bagong nadiskubre matapos ang pagdinig sa Kamara.

Sinabi ni Ridon na bahagi ng proseso ang paglalatag ng mga ebidensya at walang pumipigil sa alinmang panig na magsumite ng karagdagang dokumento o patunay.

Iginiit pa ni Ridon na hindi dapat ipagwalang-bahala ang mga naganap na pagdinig ng House Committee on Justice at naniniwala siyang hindi magtatagumpay ang pagtutol sa pagtanggap ng mga naturang ebidensya.

Walang inaasahang maraming bagong ebidensya mula sa kampo ni Vice President Sara Duterte sa pagharap nito sa impeachment case.

Ayon kay Bicol Saro Party-list Representative Terry Ridon, malaking bahagi ng depensa ng Bise Presidente ay magmumula rin sa mga ebidensyang iniharap ng prosekusyon.

Aniya, sa halip na maglatag ng panibagong mga dokumento, posibleng tutukan ng depensa ang pagbibigay ng ibang interpretasyon sa mga ebidensya at pagpapaliwanag na hindi ito nangangahulugan ng ipinakikita ng prosekusyon.

Dagdag ni Ridon, layunin ng kampo ni Duterte na linawin ang konteksto ng mga dokumento at patunay na iniharap sa kaso.

Isinusulong ni House Assistant Minority Leader Chel Diokno ang panukalang batas na magpapalawig ng paternity leave mula pitong araw tungo sa 90 araw matapos ang panganganak, bilang suporta sa mas aktibong partisipasyon ng ama sa pagpapalaki ng anak.

Sa ilalim ng House Bill 9891 o Paternity and Parental Leave Act (PAPA Leave Act), layunin nitong bigyan ng mas mahabang panahon ang mga ama at caregiver upang makasama ang bagong silang na anak sa kritikal na unang bahagi ng buhay nito.

Ayon kay Diokno, mahalaga na kilalanin na ang pagpapalaki ng anak ay hindi lamang responsibilidad ng ina kundi isang pinagsasaluhang tungkulin ng parehong magulang na dapat suportahan ng estado.

BASAHIN:

#dwiz #dwiznews #aliw23

Iginiit ni Pangulong Ferdinand Marcos Jr. na hindi na kinakailangan ang panibagong Cabinet reshuffle dahil maayos umanong nagtutulungan ang mga kasalukuyang miyembro ng kanyang gabinete.

Sa isang press briefing sa Kazan, Russia, sinabi ng Pangulo na mahalaga ang katatagan at pagpapatuloy ng trabaho sa pamahalaan at magiging sagabal lamang umano ang madalas na pagpapalit ng mga opisyal.

Ayon kay Marcos, hindi makabubuti sa pamamahala ang paulit-ulit na paglipat ng mga opisyal dahil kailangan pa nilang muling pag-aralan ang kanilang mga bagong tungkulin.

Pinasinungalingan din ng Pangulo ang mga usap-usapang may malawakang pagbabago sa hanay ng gabinete, kabilang na sa mga kagawaran ng Interior and Local Government, Health, Justice, Public Works, Trade at Transportation.

Nanawagan ang mga progresibong grupo sa Office of the Ombudsman na agarang isampa ang kasong katiwalian laban kay Senador Joel Villanueva at iba pang personalidad na umano’y sangkot sa flood control project controversy.

Ayon sa Samahan ng Progresibong Kabataan (SPARK) na mahigit dalawang linggo na ang nakalipas mula nang ipahayag ni Ombudsman Crispin Remulla na handa nang isampa ang kasong plunder laban kay Villanueva.

Binatikos din ng grupo ang bagong mayorya sa Senado dahil sa umano’y pagtanggap kay Villanueva sa kanilang hanay. Ayon sa kanila, nakikinabang umano ang administrasyon ni Pangulong Ferdinand Marcos Jr. sa bagong mayorya upang maisulong ang mga layuning pampulitika nito.