NATIONAL NEWS

Mabilis na umaksyon ang New NAIA Infrastructure Corp. (NNIC) matapos matukoy ang ilang personnel na umano’y sangkot sa hindi maayos na paghawak ng bagahe sa Ninoy Aquino International Airport (NAIA), kasunod ng mga kumalat na video online.

Ayon kay NNIC General Manager Lito Alvarez, hindi pinalampas ng pamunuan ang insidente at agad na ipinatupad ang mga disciplinary measures laban sa mga indibidwal na napatunayang may pagkukulang.

Sa gitna ng imbestigasyon, isinagawa ng NNIC ang mga sumusunod na hakbang:

*Agad na pagtanggal ng airport access pass/ID ng mga personnel na sangkot
*Pagpapatigil sa kanilang access sa operasyon ng paliparan
*Pagpapasailalim sa retraining program
*Pakikipag-ugnayan sa airlines at third-party ground handlers para sa karagdagang disciplinary measures

Naniniwala si La Union 1st District Rep. Francisco Paolo Ortega V na posibleng bahagi ng estratehiya ng kampo ni Vice President Sara Duterte ang hindi pagdalo nito sa impeachment trial na nakatakdang magsimula sa Hulyo.

Ayon kay Ortega, nasa depensa na kung paano haharapin ang mga paratang, ngunit mas makabubuti kung mismong ang bise presidente ang magbibigay ng sagot sa mga isyung ibinabato laban sa kanya.

Binigyang-diin din ng mambabatas na may pananagutan sa publiko ang mga halal na opisyal at inaasahang sasagutin nila ang mga alegasyon laban sa kanila.

Iminungkahi ni La Union 1st District Rep. Francisco Paolo Ortega V na dapat taasan pa ang mga kwalipikasyon ng mga tatakbong opisyal sa gobyerno upang masigurong ang mga mahalal ay mas maaasahan at makakatulong sa bansa.

Ayon kay Ortega, mahalaga ito sa gitna ng pagtalakay sa isinusulong na Anti-Political Dynasty Bill, na layuning limitahan ang pagpasok ng magkakapamilyang politiko sa gobyerno.

Sa ginanap na Saturday News Forum nitong Hunyo 20, binanggit din niya sina Vico Sotto, Joy Belmonte, at Sandro Marcos bilang mga halimbawa ng mga lider na may magandang kwalipikasyon sa serbisyo publiko kahit may mga kamag-anak sa gobyerno.

Inihayag ni Senate President Win Gatchalian na mananatiling bukas sa publiko ang impeachment trial alinsunod sa Konstitusyon, kahit limitado ang pisikal na espasyo sa Senado.

Ayon kay Gatchalian, nasa humigit-kumulang 50 katao lamang ang maaaring makapasok sa session hall dahil sa kakulangan ng espasyo at mga konsiderasyon sa seguridad.

Gayunman, nilinaw niya na mas maraming Pilipino ang makakapanood ng paglilitis sa pamamagitan ng live streaming sa YouTube at iba pang online platforms.

Dagdag pa niya, patuloy na hinahanapan ng Senado ng paraan upang mapanatili ang transparency ng proseso habang isinasaalang-alang ang kaligtasan at kapasidad ng lugar.

Nilinaw ni Senate President Win Gatchalian na nananatiling bukas ang kanyang tanggapan sa lahat ng senador, kabilang ang mga nasa mayorya at minorya, sa gitna ng mga palitan ng akusasyon at isyu sa loob ng Senado.

Ayon kay Gatchalian, nakipagpulong na siya sa ilang miyembro ng minorya at patuloy ang komunikasyon sa iba pang senador upang mapanatili ang maayos na daloy ng trabaho sa lehislatura.

Dagdag niya, bukas siya sa pakikipag-usap at hindi pinipigilan ang mga mambabatas sa pagpapahayag ng kanilang opinyon, ngunit mas mahalaga umano ang pagtutok sa mga pangunahing tungkulin ng Senado.

Nilinaw ni Senate Secretary Renato Bantug Jr. na bukod sa umiiral na patakaran na ang Senate President ang magsisilbing presiding officer, maaari pa ring pagbotohan ng mga senador ang opisyal na mamumuno sa impeachment court sa mismong pagbubukas ng paglilitis sa Hulyo 6.

Ayon kay Bantug, sa ilalim ng proseso, posibleng magkaroon ng mosyon o desisyon mula sa mga senador kung may pagbabago sa itatalaga bilang presiding officer, depende sa magiging kasunduan ng impeachment court.

Dagdag pa niya, kung sakaling may hakbang na maghalal ng ibang mamumuno, ito ay maaaring gawin sa pagbubukas ng session ng impeachment trial.

Gayunman, iginiit ng Senate Secretariat na nananatili ang nakasaad sa rules na ang Senate President ang unang tatayong presiding officer maliban na lamang kung magpapasya ang Senado ng iba sa pamamagitan ng kanilang sariling proseso.