NATIONAL NEWS

Naniniwala si Senador Panfilo “Ping” Lacson na maaaring kailanganing mamagitan ng Korte Suprema kung aabot sa siyam na senador-hukom ang masuspinde o makulong, katulad ng nangyari kay Senador Jinggoy Estrada na ipinatawan ng 90-araw na preventive suspension ng Sandiganbayan.

Ayon kay Lacson, maaaring humantong sa isang “absurdong” sitwasyon ang impeachment trial ni Bise Presidente Sara Duterte kung mababawasan ang bilang ng mga senador-hukom na maaaring bumoto.

Ipinaliwanag ng senador na kung 15 na lamang ang natitirang senator-judges na maaaring bumoto, imposibleng maabot ang kinakailangang 16 na boto upang mahatulan ang isang opisyal sa impeachment.

Ipinagtanggol ni Senador Alan Peter Cayetano ang kanyang madalas na pagla-live sa Facebook at kinuwestiyon ang mga kritiko na bumabatikos sa kanyang online broadcasts.

Sa kanyang Facebook Live, unang beses bilang minority leader, direktang tinawag ni Cayetano sina Senador Raffy Tulfo at Senador Erwin Tulfo, na dati nang bumabatikos sa kanya dahil sa pag-uulat umano sa social media sa halip na dumalo sa mga sesyon ng Senado.

Iginiit din niya na mas marami umanong nanonood sa kanyang mga live stream at inakusahan ang magkapatid na Tulfo na may itinatagong impormasyon.

Iginiit ni Senador Bong Go na wala siyang nilabag na batas sa harap ng mga ulat tungkol sa umano’y arrest warrant na inilabas ng International Criminal Court (ICC) laban sa kanya.

Sa isang pahayag, sinabi ni Go na ipinagpapasa-Diyos na lamang niya ang isyu at umaasang hindi ito gagamitin para sa pulitika.

Binigyang-diin din ng senador na hindi kabilang sa kanyang mandato ang mga usaping may kinalaman sa operasyon ng pulisya.

Saklaw ng 90-araw na preventive suspension na ipinataw ng Sandiganbayan kay Senador Jinggoy Estrada ang kanyang tungkulin bilang senator-judge sa impeachment trial ni Vice President Sara Duterte, ayon kay Senate President Sherwin Gatchalian.

Sinabi ni Gatchalian na kapag suspendido ang isang senador, kasama rito ang lahat ng responsibilidad na kaakibat ng kanyang posisyon, kabilang ang pagiging senator-judge.

Ang kautusan ng Sandiganbayan 2nd Division ay kaugnay ng kinahaharap na kasong graft ni Estrada na may kaugnayan sa umano’y anomalya sa flood control projects.

Ipinapauubaya na ni Senate Pesident Sherwin Gatchalian sa kaniyang mga kapwa senador kung mananatili siya sa pwesto hanggang 2028.

Ayon kay Gatchalian, bagama’t nais niyang tapusin ang kaniyang termino bilang Senate President, nakikita niyang pare-pareho ang sentimyento ng mga senador na isantabi na ang mga nagdaang alitan at muling magpokus sa trabaho ng Senado.

Aminado rin ang SP Win na hindi magkakatugma ang kanilang mga posisyon sa lahat ng isyu, ngunit aniya, bahagi ito ng proseso ng lehislasyon at mahalaga na maipagpatuloy ang mga debate at talakayan para sa kapakanan ng publiko.

Umakyat pa sa 78 ang bilang ng mga nasawi sa magnitude 7.8 na lindol sa Mindanao.

Batay sa pinakahuling datos ng National Disaster Risk Reduction and Management Council (NDRRMC), umabot na sa mahigit 1.3 million na indibidwal o mahigit 300,000 pamilya ang apektado ng matinding pagyanig.

Samantala, mahigit 1,000 katao naman ang sugatan, habang 30 ang patuloy na nawawala.

Sa ngayon, halos 100,000 indibidwal pa rin ang hindi nakakabalik sa kanilang tirahan, kung saan halos 20,000 ang nanunuluyan sa mga evacuation centers habang mahigit 60,000 ang nananatili sa labas ng mga evacuation facilities.—sa panulat ni Mark Terrence Molave

Posibleng humarap sa administratibong pananagutan ang Ateneo de Manila University kung mapatutunayang may mga paglabag kaugnay ng pagkamatay ng student-athletes na sina Rene Baterbonia at Divine Adili sa isinagawang team-building activity sa Dipaculao, Aurora.

Ayon kay Labor Secretary Francis Tolentino, maaari ring mapatawan ng parusa si dating Ateneo men’s basketball coach Tab Baldwin kung mapapatunayang lumabag ito sa mga alituntunin.

Sinabi ni Tolentino na maaaring hindi na makapag-aplay si Baldwin ng Alien Employment Permit o AEP sa loob ng limang taon, na magbabawal sa kanya na muling magtrabaho bilang coach sa bansa.

Dagdag pa ng kalihim, maaari ring pagbawalan ang Ateneo na kumuha ng dayuhang coach sa loob ng sampung taon.

Nauna nang nagbitiw sa puwesto sina Baldwin at team manager Epok Quimpo kasunod ng kontrobersiya sa pagkamatay ng dalawang manlalaro.