NATIONAL NEWS

Umaasa ang mga lider ng Kamara na mapapalakas ang relasyon ng dalawang kapulungan ng Kongreso at maisusulong ang mga prayoridad na panukala sa ilalim ng pamumuno ni Senador Win Gatchalian bilang bagong Senate President.

Ayon kay House Speaker Bojie Dy III, mahalaga ang kooperasyon ng Senado at Kamara upang mapabilis ang pagpapatupad ng mga repormang makikinabang ang mga Pilipino.

Sinabi naman ni House Majority Leader Sandro Marcos na kilala niya si Gatchalian bilang isang kalmadong lider at naniniwala siyang ito ang kailangan sa kasalukuyang sitwasyon sa Senado upang makabalik sa trabaho ang mga mambabatas.

Inihayag ni Senador Ping Lacson na hindi maaaring lumahok si Senador Jinggoy Estrada sa impeachment trial ni Vice President Sara Duterte habang umiiral ang 90-araw na preventive suspension na ipinataw ng Sandiganbayan 2nd Division.

Ayon kay Lacson, malinaw sa kautusan ng anti-graft court na suspendido si Estrada sa kanyang posisyon bilang senador at sa iba pang pampublikong posisyon na maaari niyang hawakan sa loob ng nasabing panahon.

Samantala, iginiit ni Estrada na hindi niya gagamitin ang kanyang posisyon upang maprotektahan ang sarili laban sa mga kinahaharap na kaso.

Sa kabila nito, sinabi ni Estrada na mananatili siyang bukas sa paggamit ng mga legal remedies na pinahihintulutan ng batas kaugnay ng kanyang kaso.

Naniniwala si Senador Ping Lacson na dapat mas maagang naghain ng petisyon sa Korte Suprema ang grupo ni Senador Alan Peter Cayetano kung layunin nilang maibalik sa kanilang kampo ang liderato ng Senado.

Ayon kay Lacson, ang paghahain ng petisyon isang araw bago ang special session ay tila desperadong hakbang upang maipilit pa rin ni Cayetano ang kanyang awtoridad bilang Senate President.

Sinabi ng senador na kung mas maagang naisampa ang kaso, magkakaroon sana ng sapat na panahon ang Korte Suprema upang mapag-aralan ito.

Iginiit din ni Lacson na handa ang majority bloc sa anumang hakbang na maaaring gawin ng kampo ni Cayetano at hindi nila hahayaang magkaroon ng kaguluhan sa Senado.

Mariing itinanggi ni House Majority Leader Sandro Marcos ang paratang na tumanggap umano siya ng mga maleta na naglalaman ng pera mula sa umano’y kickback sa flood control projects.

Tinawag ni Marcos na “kalokohan” o “BS” ang alegasyon na ibinunyag ng isa sa mga sinasabing dating tauhan ni dating Ako Bicol Rep. Zaldy Co.

Ayon kay Marcos, hindi nila bibigyan ng pansin ang mga naturang testimonya at hindi na rin umano siya magsasampa ng kaso dahil ayaw niyang bigyan pa ng publisidad ang mga nag-aakusa.

Iginiit ni Rep. Sandor na walang katotohanan ang mga paratang laban sa kanya.

Lumagpas na sa doble ang bilang ng listahan ng mga testigong posibleng iharap ng House prosecution panel sa impeachment trial ni Vice President Sara Duterte.

Ito ang kinumpirma ni House lead prosecutor at Batangas Rep. Gerville Luistro, na mula sa 25 ay umabot na sa 57 ang kabuuang bilang ng mga potential witnesses upang matiyak na lahat ng mahahalagang ebidensya ay maisasama sa paglilitis.

Paliwanag ni Luistro, mas naging maingat ang prosecution team dahil sa panuntunang hindi na ipapakita ang pagkakakilanlan ng mga testigo sa trial proper.

Gayunman, nilinaw niya na hindi pa napagpapasyahan ng prosecution team kung ilan sa 57 ang aktwal na ipapakita bilang witness stand sa pagsisimula ng impeachment trial sa Hulyo 6.

Dagdag pa ni Luistro, patuloy nilang gagamitin ang mga natitirang panahon upang mas paghandaan ang paglilitis. | via Geli Mendez (Patrol 30)

Ibinunyag ni Senador Erwin Tulfo na bukod kay Senador Joel Villanueva, may dalawa pang senador mula sa minority bloc ang hinihikayat nilang lumipat sa majority.

Ayon kay Senador Tulfo, isang lalaki at isang babae ang kasalukuyang nililigawan, pero wala pang malinaw na resulta ang mga pag-uusap.

Aminado ang senador na hindi madali para sa ilang kapwa-senador na mag-over-the-bakod dahil sa pangambang mabatikos ng mga basher, vlogger, at troll, pati na ang kanilang mga pamilya.

Samantala, nilinaw ni Senador Erwin Tulfo na wala pang katiyakan kung tuluyan nang tatawid sa majority bloc si Senador Villanueva, na mahalaga upang makabuo ng sapat na bilang ang mayorya at maihalal ang bagong pangulo ng Senado.—sa panulat ni Jordan Gutierrez

Posibleng matapos sa September 2026 ang impeachment trial ni Vice President Sara Duterte sa Senate Impeachment Court.

Ito ayon kay House lead prosecutor at Batangas Rep. Gerville Luistro sakaling magsimula na ang paglilitis sa July 6, 2026, nang walang anumang pagkaantala sa proseso.

Maaari aniyang magpatuloy ang mga pagdinig at makumpleto sa loob ng tatlong buwan o sa katapusan ng Setyembre ng kasalukuyang taon.

Binigyang-diin ni Congw. Luistro na mahalagang pag-usapan sa pre-trial conference ang schedule ng mga pagdinig upang maayos na mapaghandaan ng magkabilang panig ang presentasyon ng mga ebidensya at mga testigo.—sa panulat ni Jordan Gutierrez