Kulang ang pondo na inilalaan para sa mga proyekto ng lokal na pamahalaan sa bansa.
Sa panayam ng DWIZ, ibinunyag ni Senate Committee on Finance Chairman Sherwin Gatchalian na tatlumpung porsyento lamang ang napopondohan sa mga proyekto ng LGUs.
Dahil dito, napipilitang lumapit ang mga LGUs sa mga senador at kongresista upang humingi ng dagdag na pondo para sa mga proyekto nito.
Ipinaliwanag din ni Senador Gatchalian ang proseso ng pagpopondo ng budget para sa LGUs.
Kung sa palagay niyo ay imposible ang mabigyan tayo ng second chance at life, nagkakamali kayo. Sa India kasi, isang bangkay ang dadalhin na sana sa huling hantungan pero ibinalik pa sa ospital dahil sa biglaan nitong pag-ubo sa libing.
Kung tuluyan nga bang nabuhay muli ang patay, eto.
Idineklarang brain-dead ang 19-anyos na si Bhau Lachke mula sa Trimbakeshwar Taluka, India matapos magtamo ng matinding injuries sa isang car accident.
Ayon sa pamilya ng lalaki, sinubukan pang isalba ng mga doktor ang kanilang kaanak pero inabisuhan sila ng mga ito na wala nang tyansa na maka-survive ang lalaki.
Tinuring na itong hudyat ng pamilya para simulan ang paghahanda para sa libing ng lalaki.
Nang dumating ang araw ng libing, bago pa magsimula ang seremonyas ay bigla na lang gumalaw at umubo ang bangkay.
Sa sobrang gulat ng pamilya, sa halip na matakot ay nabuhayan ng loob ang mga ito at agad na isinugod pabalik sa ospital ang lalaki kung saan ito muling ginamot at inilagay sa ventilator support.
Samantala, ayon sa ulat, inakusahan ng pamilya ng lalaki ang mga doktor ng misdiagnosing at sinabi na misleading ang pag-anunsyo ng mga ito na brain-dead na ang kanilang kaanak.
Ang depensa naman ng mga doktor, hindi umano sila nagkaintindihan ng pamilya dahil hindi naman daw nila idineklarang patay ang lalaki.
Ikaw, sino sa tingin mo ang may pananagutan sa kasong ito? kasalanan ba ng pamilya na hindi nila naintindihan ang nasabing diagnosis?
Pagibig na sana, naging bato pa. ganyan ang sinapit ng isang matanda mula sa Japan na nahulog ang loob sa nakilala nitong astronaut kuno pero isa pala talagang manggagamit na scammer.
Kung paano nahulog sa patibong ang lola, eto.
Nagkakilala sa social media ang 80-anyos na Japanese woman mula sa Northern Hokkaido Island at ang isang nagpakilalang astronaut na na-stuck umano sa space at nangangailangan ng pera na pambili ng oxygen.
Ang kwento ng astronaut, mayroong umaatake sa kanila habang sakay sila ng spaceship at nangangailangan sila ng oxygen.
Dahil nakuha na nga ng astronaut ang loob ng matanda na tuluyan nang na-in love sa kanya, nagpadala ang lola ng pera para makabili ang mga ito ng oxygen.
Pero ang astronaut, nanghihingi na nga lang ng pera, may kondisyon pa sa matanda. Ang utos sa lola, kinakailangan niyang i-transfer ang pera gamit ang prepaid systems mula sa limang magkakaibang tindahan.
Sa pagitan ng July at August, ipinadala ng lola ang pera na umabot sa 1 million yen o mahigit 370,000 pesos.
Nang sa wakas ay nakatunog ang matanda na scammer ang kausap niya na nagpapanggap na astronaut, doon niya lang ito ikinwento sa kaniyang pamilya at isinumbong sa mga pulis.
SAa kasamaang palad, malabo umano na mabawi pa ng lola ang ipinadala niyang pera matapos mabiktima ng tinukoy ng mga pulis na online romance scam.
Gayunpaman, bilang paalala sa mga taong posibleng samantalahin at targetin ng scammers, isinapubliko ng mga pulis ang nangyari sa matanda at nag-abiso na walang masama na agarang magsuspetsa kapag mayroong nanghihingi ng pera mula sa social media.
Sa mga scammer diyan, bakit hindi niyo na lang gamitin ang galing niyo sa paghahanap-buhay nang marangal sa halip na nag-iisip kayo ng bagong modus? tandaan, pumaldo man kayo sa nakulimbat niyo, iba pa rin kumilos ang karma na bigla-bigla na lang sumusulpot.
Makakatanggap ng libreng orthopedic treatment sa ilalim ng pinalawak na Z benefit package ng Philippine Health Insurance Corporation (PhilHealth) Ang mga nakaligtas sa magnitude 6.9 na lindol sa Cebu
Ayon kay Department of Health (DOH) Assistant Secretary Albert Domingo, inaprubahan ng PhilHealth board ang hakbang para tulungan ang mga biktima na nabalian at nagkaroon ng bone injuries dulot ng pagguho ng mga istruktura at debris.
Idinagdag niya na ang zero-balance billing policy ay ipapatupad sa lahat ng tatlong DOH-run hospitals sa Cebu at mananatiling may bisa hanggang sa alisin ang state of calamity.
Nagsasagawa na ng imbestigasyon ang Department of Labor and Employment laban sa reklamong inihain ng ilang business process outsourcing o BPO employees sa Cebu kasunod ng sinasabing pagpipilit sa kanilang pumasok pa rin sa kasagsagan ng lindol.
Ayon sa DOLE, kasalukuyang nakikipag-ugnayan na sila sa DOLE Region 7 para tignan ang nasabing reklamo.
Bilang bahagi ng imbestigasyon, pagpapaliwanagin din anya ng ahensya ang nasabing kumpanya para mabigyang linaw ang reklamo ng kanilang mga empleyado.
Ipinahahanap na ng Department of Justice sa National Bureau of Investigation ang sinasabing dating security consultant ni resigned Ako Bicol Rep. Zaldy Co na si Orly Guteza.
Ayon kay Justice Secretary Jesus Crispin “Boying” Remulla, sa kasalukuyan ay hindi mahagilap at wala pa rin silang impormasyon kung nasaan ang testigo matapos isiwalat sa Senate Blue Ribbon Committee hearing ang umano’y male-maletang pera na ipinadala kina former House Speaker Martin Romualdez at Congressman Zaldy Co.
Nabatid na hindi sumipot si Guteza sa napag-usapan sana nilang pagkikita ng kalihim kung saan pag-uusapan sana ang mga tanong hinggil sa pinagdududahang notarized affidavit ng testigo.
Dahil dito, ikinukonsidera na anya ng kalihim ang pagpapadala ng subpoena para kay Guteza, ngunit kailangan munang malaman ang address nito para doon ipadala ang naturang subpoena.
Maraming ahensya ng gobyerno ang dapat na bawasan ng budget
Ito, ayon kay Senate Finance Committee Chairman Sherwin Gatchalian, ay dahil ilan sa mga ahensya ang pinaglalaanan pa rin ng pondo kahit wala nang silbi ang kanilang mandato para sa mga Pilipino, tulad ng Optical Media Board at Philippine Racing Commission.
Paliwanag ng Senador, upang hindi masayang ang ibinibigay na pondo ay ilipat na lamang ito sa mga ahensyang talagang nangangailangan tulad ng Department of Health.
Gayunman, nilinaw pa rin ni Sen. Gatchalian na hindi ito nangangahulugang bibigyan ng zero budget ang mga nasabing ahensya, gayong pag-aaralan pa rin nila ang Government Optimization Law upang malaman kung paano mas maayos na ma-ililipat sa ibang departamento ang kanilang budget.
Hindi na magagamit at nasayang lamang ang mga paraphernalya na sana ay gagamitin para sa nakatakdang Bangsamoro Autonomous Region in Muslim Mindanao elections.
Sinabi mismo ni Commission on Elections spokesman Atty. John Rex Laudiangco sa DWIZ, na dahil idineklarang unconstitutional ang BARMM elections, magiging back to zero ang nasabing halalan.
Dagdag pa nito, na bagama’t hindi na matutuloy ang halalan sa Mindanao, kinakailangan pa rin bayaran ng Comelec ang mga kagamitan na dapat gagamitin sana sa naturang eleksyon, na umabot sa 1 bilyong piso.
Ayon pa kay Atty. Laudiangco, hihintayin pa ng Comelec ang panibagong batas mula sa Korte Suprema, bago ito makapagsimula sa paghahanda para sa BARMM elections.
Mariing itinanggi ni dating Senador Antonio Trillanes na binisita niya si dating Pangulong Rodrigo Duterte sa International Criminal Court detention center para magsagawa ng welfare check.
Ito’y kasunod ng inihain na resolusyon ni Senador Robin Padilla na hinihimok ang Senado na magsagawa ng imbestigasyon sa umano’y pagtatalaga ng pamahalaan kay Trillanes para magsagawa ng welfare check sa dating Pangulo.
Paliwanag ni Trillanes, hindi siya bumisita sa ICC at iginigiit na may access naman sa telepono si Duterte kaya’t madali itong makapagsasabi sa pamilya niya kung mayroon mang nangyayari.
Magugunitang una nang nagpahayag ng pangamba si Vice President Sara Duterte kaugnay sa sinasabing welfare check na isinasagawa ng Philippine Embassy sa The Hague sa kanyang ama.
Maaaring abutin ng isa pang buwan bago maibalik ang pasok sa mga paaralan sa mga lugar na sinalanta ng magnitude 6.9 na lindol sa Cebu.
Ayon kay Education Undersecretary for Operations Malcolm Garma, naka-depende ang pagbabalik ng operasyon ng mga paaralan sa kung gaano kabilis matatapos ang reconstruction ng mga ito na tinatantsang aabutin ng tatlumpung araw.
Sa Bogo City na pinaka-napuruhang ng lindol, nasa tatlumpu’t walong paaralan ang pinaniniwalaang nagtamo ng matinding pinsala na hirap pa ring ma-inspeksyon dahil sa tuloy-tuloy pa ring aftershock.
Nabatid na sa lahat ng apektadong lugar kabilang ang Region 5, 6, at 7, nakapagtala ang DepEd ng 5,587 na silid-aralan na nagkaroon ng major damage.
Upang makapagpatuloy pa rin sa pag-aaral ang mga estudyante, pansamantalang ililipat ang mga ito sa home-based learning kaya’t nakahanda na rin ang DepEd sa pamamahagi ng mga module sa kanilang local field offices.