NATIONAL NEWS

Patuloy ang ikinakasang relief operation ng Tingog Partylist para tulungan ang mga pamilyang pinadapa ng magnitude 6.9 na lindol sa Cebu.

Libu-libong family food packs ang ipinamahagi ng partylist group para sa mga residenteng naapektuhan ng malakas na lindol.

Pinangunahan nina Tingog Partylist Rep. Yedda Romualdez; Rep. Jude Acidre; at Rep. Andrew Julian Romualdez katuwang si Cebu 4th District Rep. Sun Shimura at iba pang local leaders ang pamamahagi ng relief packs at mga tent sa mga residente ng Bogo City at mga bayan ng Medellin, Borbon, at San Remigio.

Layon ng operasyon na maiparamdam sa ating mga kababayan na hindi sila nag-iisa at agarang matugunan ang uhaw at kagutuman ng mga pamilyang tinamaan ng lindol.

Ayon kay Rep. Yedda Romualdez, ang kanilang misyon ay isang kongkretong pagpapakita ng bayanihan tungo sa ginhawa at matugunan ang pangangailangan ng ating mga kababayang nawalan ng tirahan at kabuhayan.

Nanawagan naman si Rep. Jude Acidre sa ating mga Cebuano na manatiling maging matatag at kaisa ang Tingog sa kanilang pagbangon mula sa trahedya.

Tiniyak naman ni Rep. Andrew Romualdez, na hindi matatapos sa pamamahagi ng relief ang kanilang pagtulong sa mga Cebuano.

Nagpaabot din ng pakikiramay ang Tingog Partylist sa mga pamilyang nawalan ng mga mahal sa buhay at binigyang-diin na ang tuluy-tuloy na pagtutulungan ng pamahalaan para sa mabilis na rehabilitasyon sa rehiyon.

Pinaiimbestigahan ni Senador Robin Padilla ang sinasabing pagtatalaga kay dating Senador Antonio Trillanes upang magsagawa ng welfare check kay dating Pangulong Rodrigo Duterte sa detention facility ng International Criminal Court.

Sa ipinasang Senate resolution ni Senador Padilla, sinabi nitong nagdudulot ng mga katanungan sa legalidad, constitutionality, at due process ang paghirang sa mga pribadong indibidwal upang katawanin ang bansa sa harap ng international tribunals.

Bukod dito, binigyang-diin din sa resolusyon ang pangangailangang linawin kung opisyal na pinahintulutan ng anumang sangay o ahensya ng gobyerno ang nasabing pagtatalaga, at kung sa ilalim ng anong otoridad at mandato ito isinagawa.

Dagdag pa ng Senador, may malawakang implikasyon sa soberanya ng Pilipinas, foreign relations, at sa proteksyon ng karapatan at kapakanan ng mga opisyal ng bansa ang naturang isyu.

Kaya naman, mahalagang aniyang magsagawa ng imbestigasyon ang Senado upang matiyak ang transparency at accountability, at kung kinakailangan ay makabuo ng batas na magtatakda ng mas malinaw na patakaran hinggil sa mga kinatawan ng gobyerno sa mga international institutions tulad ng ICC.

Kinumpirma ni Laguna Rep. Loreto Amante, na walang alokasyon sa ilalim ng 2026 National Expenditure Program o NEP ang Phivolcs modernization program.

Ayon kay Cong. Amante, dahil ang panukalang 30.4 billion pesos na 2026 budget ng Department of Science and Technology at attached agencies ay nai-susumite tuwing buwan ng Pebrero at Marso, hindi na naisama ang Phivolcs Modernization Law na napirmahan lamang ni Pangulong Ferdinand Marcos Jr. nitong Abril.

Paglilinaw naman ni Rep. Amante, hindi pa rin huli ang lahat dahil maaari pa rin namang paglaanan ng pondo ng Kongreso ang naturang programa.

Naniniwala rin ang kongresista na kapag napondohan ang modernization program, mas magiging maayos na ang serbisyo ng DOST-Phivolcs sa publiko.

Inirekomenda ng National Task Force to End Local Communist Armed Conflict o NTF-ELCAC kay Pangulong Ferdinand Marcos Jr. na palawigin ang amnesty program ng gobyerno hanggang March 13, 2028.

Ayon kay National Amnesty Commission chairperson Atty. Leah Tanodra Armamento, isa sa mga dahilan ng rekomendasyon ay ang ulat ng Task Force Balik Loob na nagsasabing may 50,000 pa silang potential applicants.

Nabatid na nakatakda sanang matapos ang programa sa March 13, 2026, subalit iminungkahi itong palawigin pa ng dalawang taon.

Gayunpaman, nakabinbin pa ang pag-apruba ng Pangulo para rito dahil kailangan pa niyang pag-aralan at rebyuhin ang naturang rekomendasyon.

Nilinaw ng Office of Civil Defense na wala silang in-activate na evacuation center matapos ang naranasang malakas na lindol sa Cebu.

Ayon kay OCD Assistant Secretary Bernardo Rafaelito Alejandro, karamihan ng mga evacuees ay nanatili lamang sa mga open area.

Ito’y dahil madedetermina lamang mula sa ongoing assessment sa mga gusali gaya ng mga paaralan at pagamutan, kung ligtas nang okupahan ng evacuees ang mga ito.

Gayunpaman, inihayag ni Asec. Alejandro na sa oras na matapos ang ginagawang assessment, matutukoy agad kung maaari nang i-activate ang paggamit ng evacuation centers.

Bukas at suportado ni Senator Mark Villar ang anumang imbestigasyon sa isyu ng maanomalyang flood control projects sa bansa.

Ito’y kaugnay sa pahayag ng Department of Justice na kasama siya at si Senador Camille Villar at maging ang kanyang ina na si dating Senator Cynthia Villar sa iniimbestigahan ng pamahalaan.

Iginiit naman ni Senador Villar na wala siyang itinatago at malaki ang kanyang paniniwala sa accountability at due process.

Tiniyak din ng Senador na wala siyang direct o indirect ownership at controlling interest sa alinmang kumpanya na lumalahok para sa mga infrastructure projects ng Department of Public Works and Highways.

Samantala, suportado naman ng Senador ang isinasagawang imbestigasyon ng Independent Commission for Infrastructure.

Tiniyak ng National Task Force to End Local Communist Armed Conflict o NTF-ELCAC na walang ghost at substandard projects sa mga proyektong nasa ilalim ng Barangay Development Program o BDP.

Ayon kay NTF-ELCAC executive director Usec. Ernesto Torres Jr., mahigpit ang guidelines at regular ang monitoring ng proyekto mula sa iba’t ibang antas ng pamahalaan upang matiyak ang kalidad ng mga ito.

Kasama rito ang Subaybayan Patrol, na isang online monitoring ng Department of Interior and Local Government, gayundin ang personal na pag-inspeksyon ng kanilang national, regional, provincial at municipal teams.

Binigyang-diin din ng NTF-ELCAC na ang mismong mga komunidad ang nakikilahok sa implementasyon, kaya’t naiiwasan ang “ghost” o pekeng proyekto.

Layon ng BDP na maghatid ng mga pangunahing serbisyo at kabuhayan sa mga lugar na dating apektado ng insurgency, tulad ng mga kalsada, silid-aralan, health stations, sistema ng tubig at elektripikasyon.

Magpapasaklolo na si Pangulong Ferdinand Marcos Jr. sa Kamara at Senado upang humiling ng karagdagang emergency fund para sa mabilis na pagtugon ng gobyerno sa mga kalamidad.

Ayon kay Pangulong Marcos, agad siyang hihingi ng suporta mula sa dalawang kapulungan ng Kongreso matapos na personal na makita ang sitwasyon sa Masbate na sinalanta ng Bagyong Opong at sa Cebu na niyanig naman ng 6.9 magnitude na lindol.

Paliwanag ng Pangulo, paubos na ang quick response fund ng iba’t ibang ahensya ng pamahalaan matapos itong magamit sa pagtugon sa serye ng mga bagyong humagupit sa bansa.

Dahil dito, kinakailangan na anya ang dagdag na pondo upang matiyak na tuloy-tuloy ang tulong at agarang rehabilitasyon para sa mga naapektuhang komunidad.