NATIONAL NEWS

Inaprubahan na ni Pangulong Ferdinand Marcos Junior ang rekomendasyon ng National Amnesty Commission para sa siyam na aplikanteng nakapasa sa proseso ng aplikasyon para sa alok na amnestiya ng pamahalaan.

Ayon kay N.A.C. Chairperson Atty. Leah Tanodra Armamento, hinihintay na lamang mailabas ang certificate of amnesty para sa siyam na dating rebelde.

Kapag nabigyan ng amnestiya, mabubura ang lahat ng kasong kinakaharap ng mga aplikante at malaya na silang makababalik sa kanilang komunidad kasama ang pamilya.

Kabilang din dito ang mga tulong mula sa pamahalaan tulad ng pabahay, pangkabuhayan, at scholarship o libreng pag-aaral para sa kanilang mga anak.

Aminado si Atty. Armamento na masalimuot ang proseso ng pag-apruba sa amnestiya. Kaya naman ito pa lamang ang unang batch mula sa mahigit apatnalibong indibidwal na nag-apply.

Ipinaliwanag niya na ngayon pa lamang nakumpleto ang mga pirma ng mga miyembro ng N.A.C. May ilang karagdagang requirements din na hinihingi ang ibang miyembro ng komisyon gaya ng mga kalihim ng Department of Justice, Department of the Interior and Local Government, Department of National Defense, at Office of the Presidential Adviser on Peace, Reconciliation and Unity.

Bukod dito, isa-isang sinusuri at pinag-aaralan ng bawat miyembro ang rekomendasyon para sa bawat aplikante. Dahil dito, umaabot ng isa hanggang dalawang buwan ang buong proseso bago ito maisumite sa Pangulo para sa pag-apruba.

Iginagalang ng Office of the President ang desisyon ng Korte Suprema na nagpapawalang-bisa sa mga batas ng Bangsamoro Transition Authority ukol sa redistricting na naging dahilan upang makansela ang kauna-unahang Bangsamoro parliamentary elections na nakatakda sana sa Oktubre a-trese.

Ayon sa O.P., mahalaga ang desisyong ito upang matiyak na ang halalan sa Bangsamoro ay maisasagawa batay sa matibay na pundasyong legal at konstitusyonal.

Binigyang-diin ng Palasyo na tinututukan nito ang pagpapanatili ng kapayapaan, pagpapatatag ng mga demokratikong institusyon, at pagbibigay-proteksyon sa karapatang pampulitika ng lahat ng mamamayan sa BARMM.

Dagdag pa ng O.P., nakahanda ang administrasyon na magbigay ng buong suporta sa lahat ng mga institusyong nakasaad sa Saligang Batas upang matupad ang demokratikong hangarin ng mga mamamayan ng nabanggit na rehiyon.

Iginiit ni Pangulong Ferdinand Marcos Jr. na ang tunay na serbisyong publiko ay hindi nasusukat sa pagiging magkakaalyado sa politika, kundi sa sinseridad, agarang aksyon, at pananagutan sa tungkulin.

Ayon kay Pangulong Marcos, kailangang patunayan ng mga pinuno sa lahat ng antas ng pamahalaan ang kanilang malasakit sa mamamayan sa pamamagitan ng paglilingkod na nagmumula sa puso, konsensiya, at higit sa lahat, sa kongkreto at tapat na gawain.

Pinaalalahanan din ng Presidente ang mga lokal na opisyal na ang bawat posisyon sa pamahalaan ay may kaakibat na mabigat na tungkulin at responsibilidad na magtaguyod ng makabuluhang pagbabago sa kani-kanilang nasasakupan.

Kasabay nito, kinilala ni Pangulong Marcos ang nararamdamang pagkadismaya ng mga karaniwang Pilipino dahil sa patong-patong na isyung hinaharap nila araw-araw.

Gayunman, nananatili aniya ang kanyang kumpiyansa sa kakayahan ng mga lokal na lider na maibigay ang nararapat at de-kalidad na serbisyo sa kanilang mga nasasakupan.

Magkakasa muli ng panibagong malawakang kilos-protesta ang mahigit isandaang grupo sa Nobyembre a-trenta, Bonifacio Day, sa iba’t ibang panig ng bansa.

Ito’y bilang pagtutol pa rin sa korapsyon at katiwalian sa flood control projects.

Ayon sa grupong Trillion Peso March Movement, layunin nilang pagkaisahin ang mamamayan sa moral at makataong protesta laban sa katiwalian, sa pamamagitan ng pananampalataya, panalangin, at sama-samang pagkilos sa mga komunidad.

Kabilang sa mga aktibidad ang White Ribbon Campaign kung saan hihikayatin ang publiko na magsuot at maglagay ng puting laso sa bahay, sasakyan, pamilihan, at gusali bilang simbolo ng paninindigan laban sa korapsyon.

Itatakda rin ang isang araw ng pag-aayuno, lingguhang misa sa EDSA Shrine, interfaith prayer gatherings, at homily ng mga pari at pastor.

Kaugnay nito, isasagawa rin ang mga collective activities sa mga komunidad, paaralan, workplace, at freedom parks tulad ng 6 o’clock noise barrage for accountability, at 8 o’clock candle lighting against corruption.

Inatasan ni Pangulong Ferdinand Marcos Jr. ang mga cabinet members na magtungo sa Cebu para alamin ang sitwasyon at pangangailangan ng mga kababayan nating naapektuhan ng magnitude 6.9 na lindol.

Ito ang sinabi ni Presidential Communications Office o PCO Secretary Dave Gomez sa ambush interview bago ang kaniyang pagharap sa deliberasyon sa plenaryo ng Kamara para sa 2026 budget ng PCO.

Ayon kay Gomez, isa sa mga direktiba ni Pangulong Marcos ang magkasa ng assessment sa pinsala ng malakas na lindol at alamin ang pangangailangan ng mga Cebuano.

Anya, agad na tumugon ang mga cabinet secretary at nagpahayag ng kani-kanilang rekomendasyon partikular ang Office of Civil Defense o OCD at Bureau of Fire Protection na mabilis ding inaprubahan ni PBBM.

Nagdagdag na rin ng health workers ang pamahalaan mula sa Department of Health o DOH para asistihan ang mga biktimang apektado ng sakuna.

Bukod pa rito, nagpatupad na rin ng price freeze para sa mga basic necessities and prime commodities ang mga ahensya ng gobyerno partikular ang DOE at DTI para maiwasan ang price manipulation sa mga biktima ng lindol.

Tuloy-tuloy din ang pagpapaabot ng tulong ng Department of Social Welfare and Development o DSWD kabilang ang burial assistance para sa mga pamilyang nawalan ng mahal sa buhay sa Cebu.

Tiniyak naman ni Gomez na nakatutok ang pamahalaan sa mga biktimang pinadapa ng malakas na lindol.

Iginiit ng Commission on Elections o Comelec na hindi nila tinitira si Senador Francis “Chiz” Escudero sa isyu ng illegal campaign donations.

Ayon kay Comelec Chairman George Erwin Garcia, nauna lamang naimbestigahan si Senador Escudero dahil sa pag-amin ng senador at ng kontratista na si Lawrence Lubiano na nagbigay ng tatlumpung milyong pisong donasyon sa kanya noong 2022 elections.

Sinabi ni Commissioner Garcia na limampu’t lima pang kontratista ang kanilang iniimbestigahan, ngunit hindi pa nagbibigay ng kumpirmasyon ang Department of Public Works and Highways o DPWH.

Anya, kapag nakuha na ang mga impormasyon, kasunod na ring padadalhan ng notice ang mga iba pang kandidato at kontratista na sangkot sa naturang isyu.

Dapat nang magbitiw sa pwesto o mag-leave of absence ang lahat ng mambabatas na nasasangkot sa maanomalyang flood control projects.

Ito ang panawagan ng veteran election lawyer na si Atty. Romulo Macalintal sa panayam ng DWIZ, matapos mag-resign bilang miyembro ng Kamara si dating Ako Bicol Party-list Rep. Elizaldy Co.

Ipinunto ni Atty. Macalintal na dapat magkaroon ng delikadeza ang mga nasasangkot na opisyal at patunayan na hindi sila hahadlang sa imbestigasyong isinasagawa ng pamahalaan sa pamamagitan ng pagbibitiw sa pwesto o paghahain ng leave of absence.

Sa kabila nito, nilinaw naman ni Atty. Macalintal na hindi porket nag-resign na si Rep. Co ay absuwelto na ito sa mga kaso o pananagutan.

Nagbabala ang Land Transportation Office na huhulihin at pagmumultahin na ng 5,000 piso ang mga motorista na gagamit ng temporary o improvised plates simula Nobyembre a-primero.

Ayon kay LTO Chief Atty. Vigor Mendoza II, wala nang dahilan para gumamit ng pansamantalang plaka dahil naresolba na ang backlog para sa mga kotse at motorsiklo.

Ipinaliwanag ni Chief Mendoza na ang mahuhuling motorista ay mahaharap sa multa at kukumpiskahin ang kanilang plaka base sa Joint Administrative Order 2014-001.

Hindi rin tatanggapin para sa rehistro ang mga sasakyang may improvised o temporary plates.

Papayagan lamang ang paggamit ng improvised plates kung may otorisasyon mula sa LTO at dapat itong may nakalagay na official plate number at salitang “Improvised Plate.”

Kaya naman, hinihikayat ng ahensya ang mga motorista na kunin na ang kanilang plaka ngayong Oktubre upang maiwasan ang abala.