NATIONAL NEWS

Pinalawig ng Land Transportation Office (LTO) ang bisa ng mga rehistro ng sasakyan at driver’s license na nag-expire noong Setyembre 30, bilang tulong sa mga apektado ng mga nagdaang bagyo at lindol.

Ayon kay LTO Chief, Assistant Secretary Atty. Vigor Mendoza II, naglabas na siya ng memorandum sa lahat ng regional directors at district office heads para sa pagpapalawig ng validity hanggang Oktubre 15, 2025.

Tiniyak ni Atty. Mendoza na walang multa o penalty na ipapataw sa mga motorista at may hawak ng lisensya na apektado ng extension.

Bukod dito, pinalawig din ng LTO hanggang Oktubre 15 ang 15-araw na palugit para sa pag-areglo ng mga traffic apprehension cases na epektibo mula Setyembre 26.

 Hindi sapat ang pagbibitiw para maabswelto ang mga taong nasa likod ng katiwalian sa gobyerno.

Ito ang binigyang-diin ni Pangulong Ferdinand Marcos Jr. sa gitna ng isinasagawang imbestigasyon sa maanomalyang flood control projects.

Ayon sa Pangulo, kailangang talagang mapanagot ang sinumang mapapatunayang nagkasala sa paglulustay ng pondo ng taumbayan dahil malaki ang idinulot na pinsala nito hindi lang sa ekonomiya kundi sa buhay rin ng mga tao.

Inihalimbawa ng Pangulo ang mga nasasayang na buhay dahil sa palpak na proyekto na hindi dapat basta na lamang palampasin.

Sinupalpal ng Malacañang ang panawagan ni Senador Alan Peter Cayetano na mag-resign ang lahat ng opisyal ng gobyerno at magsagawa ng snap election.

Ayon kay Palace Press Officer at Presidential Communications Office Undersecretary Claire Castro, ito ay “wishful thinking” lamang ng senador at walang basehan.

Giit ng opisyal, abala si Pangulong Ferdinand Marcos Jr. sa pagtatrabaho para sa bayan, lalo na sa pagtulong sa mga mamamayang naapektuhan ng lindol at bagyo, kaya’t wala aniya siyang oras sa ganitong uri ng pamumulitika.

Dagdag pa ni Usec. Castro, mas makabubuting ituon na lamang ng lahat ang pansin sa mga tunay na pangangailangan ng taumbayan kaysa sa mga pansariling interes lamang.

Hindi solusyon ang eleksyon para maibalik ang tiwala ng publiko sa pamahalaan, ito man ay regular o snap election.

Ito ang naging tugon ni Senate President Pro Tempore Panfilo Lacson sa mungkahi ni Senate Minority Leader Alan Peter Cayetano na magbitiw ang pangulo, pangalawang pangulo, at mga kongresista.

Iginiit ni Senador Lacson na tiyak na kaparusahan para sa mga kurap na pulitiko ang dapat pairalin at hindi snap election.

Samantala, wala pang tugon si Senador Cayetano kung handa itong simulan ang kanyang suhestiyon hinggil sa pagbibitiw sa pwesto ng lahat ng opisyal sa pamahalaan.

Nanindigan si 1-Sambayanan convenor Atty. Howard Calleja na panibagong gulo lamang ang idudulot ng panukalang snap election ni Senador Alan Peter Cayetano.

Aniya, hindi dapat ituring na labanan ng pulitika ang mga kinakaharap na kontrobersya ng bansa kundi laban kontra korapsyon at laban para mapanagot ang lahat ng personalidad na sangkot sa mga maanomalyang proyekto ng gobyerno, anuman ang kanilang posisyon.

Dagdag pa ni Atty. Calleja, kung talagang seryoso si Senador Cayetano sa kanyang panawagan, ay siya ang maunang mag-resign at magsilbing halimbawa sa iba.

 “Madaling sabihin pero mahirap gawin.”

Ito ang tugon ni Committee on Games and Amusement Chairman Senador Erwin Tulfo sa panawagan ni Senate Minority Leader Alan Peter Cayetano na mag-resign ang lahat ng opisyal ng pamahalaan mula sa pinakamataas na posisyon at magsagawa ng snap elections.

Sa panayam ng DWIZ, sinabi ng chairman ng nasabing kumite na malaking pondo ang kailangan para magsagawa ng snap elections kaya’t tila “malabo pa sa sabaw ng pusit” ang hirit ni Cayetano lalo’t dumaan ang bansa sa sunud-sunod na kalamidad, bukod pa sa naunang midterm elections na ginastusan din ng bilyun-bilyong piso.

Ayon pa kay Senador Tulfo, walang problema kung magbitiw silang lahat ng government official, pero malaking palaisipan pa kung sino naman ang magpapatakbo at mamumuno sa bansa.

Nanindigan si Land Transportation Franchising and Regulatory Board Chairman Teofilo Guadiz III na hindi siya magbibitiw sa pwesto.

Kasunod ito ng panawagan ng mga transport group na bumaba na sa pwesto ang opisyal dahil bigong magampanan ang kanyang tungkulin.

Ayon kay Chairman Guadiz, na kay Pangulong Ferdinand Marcos Jr. na ang desisyon kung aalisin siya sa pwesto.

Sa kabila nito, sinabi ng LTFRB official na 99.9 percent ng mga transport group ay nagpahayag na ng kanilang suporta sa ahensya at sa DOTr.

Narito ang tinig ni LTFRB Chairman Guadiz.

Samantala, nanawagan ang LTFRB sa mahigit 100 transport leaders na ayusin ang kanilang mga aplikasyon upang tuloy-tuloy ang implementasyon ng Public Utility Vehicle (PUV) Modernization Program.

Pinatawan ng anim na buwan na preventive suspension ng Office of the Ombudsman si San Simon, Pampanga Mayor Abundio Punsalan.

Ito’y matapos sampahan ng kasong grave misconduct, serious dishonesty, at conduct prejudicial to the best interest of the service matapos umano nitong mangikil ng milyon-milyong piso mula sa isang kompanya kapalit ng pagpapatuloy ng operasyon nito sa lungsod.

Batay sa reklamo nina Irwin Chua at Melodie Arellano, mga kinatawan ng RealSteel Corporation, at sa letter-complaint ng National Bureau of Investigation (NBI), paulit-ulit umanong humingi ng pera ang alkalde sa kumpanya sa iba’t ibang petsa noong Hulyo 2025.

Ayon sa mga complainant, tatlong beses umanong humingi ng pera ang alkalde ng 125 milyon pesos noong Hulyo 3; 155 milyon pesos noong Hulyo 12, at kalaunan ay ibinaba sa 80 milyon pesos kapalit ng umano’y “proteksyon” at pagpapatuloy ng negosyo ng RealSteel sa San Simon.

Nagbanta rin umano si Punsalan na kung hindi magbibigay ng hinihinging halaga ang RealSteel Corp., ay ipapawalang-bisa nito ang mga business permit at babawiin ang mga insentibong ipinagkaloob sa kumpanya.

Patuloy na tututukan ng Department of Education ang kapakanan ng mga guro sa bansa.

Ito ang tiniyak ni Education Secretary Sonny Angara matapos pangunahan ang pagtatapos ng National Teacher Month sa Pasay City.

Ayon sa kalihim, kabilang sa mga ibibigay na suporta ng kagawaran ay ang dagdag benepisyo tulad ng teaching, medical, overtime at overload pay, hanggang sa pagbawas ng admin tasks.

Gayundin ang pagbabawas ng mga school forms na kailangang tapusin ng mga guro at ang paglikha ng 60,000 bagong teaching positions sa ilalim ng panukalang pambansang badyet para sa 2026.

Dagdag pa ni Secretary Angara, makakatanggap din ang mga guro sa pribadong paaralan ng ₱6,000 dagdag sa taunang salary subsidy sa ilalim ng Teachers’ Salary Subsidy (TSS) ng Government Assistance to Students and Teachers in Private Education (GASTPE) program.

Kabilang sa iba pang hakbang ang pagpapalabas ng 2023 performance-based bonus, pagpapalawak ng vacation service credits mula 15 hanggang 30 araw, at pagpapatupad ng mas malinaw na career progression system na magbibigay ng karagdagang teaching at administrative positions upang matugunan ang matagal nang hinaing ng mga guro sa promosyon.