NATIONAL NEWS

Ipinagharap na ng mga kasong kriminal sa piskalya ang isang babae na nagpakalat ng fake news ukol sa umano’y kidnap attempt sa kanya sa Caloocan City.

Ayon kay NCRPO Acting Director Brig. Gen. Jonnel Estomo, nag-post sa social media ang suspek na si Samantha Pargad ukol sa sinasabing pangha-harass at tangkang pagdukot sa kanya ng isang lalaking nagpakilalang pulis sa Alma Jose Street, Barangay 177, Caloocan noong September 4, 2022.

Ngunit sa ikinasang imbestigasyon ng Caloocan PNP at base na rin sa pahayag ng mga testigo at CCTV footage ay natuklasan na ang rider at si Pargad ay magkakilala.

Kasabay nito, kinumpirma rin ni NPD Acting District Director Col. Rogelio Peñones na sinampahan na ng mga reklamong libel at unlawful means of publication si Pargad sa City Prosecutor’s Office.

Ayon kay Estomo, ang kaso ni Pargad ay magsisilbing aral at babala sa mga nagpapakalat ng maling balita na nagdudulot ng takot sa publiko.

Muli ring nagbabala si Estomo sa lahat na mag-ingat at maging responsable sa pagpo-post sa social media platforms.

Naaresto ng PNP Criminal Investigation and Detection Group (CIDG) ang tatlong no.1 Most Wanted Criminals sa magkakahiwalay na operasyon na bahagi ng “Oplan Pagtugis”.

Kinilala ni CIDG Director Police Brig. Gen. Ronald Lee ang mga naaresto na sina: Jonathan Cotelo Mandap, Top 1 Most Wanted Person sa Pampanga; Mario Baquelta alyas Mario Makosado Baquilta, Top 1 Most Wanted sa Cebu; at Elmo Galus Gumalog, Top 1 Most Wanted sa Pozzurubio, Pangasinan at Top 10 most wanted sa lalawigan.

Ang tatlo ay nasakote sa bisa  ng mga magkakahiwalay na Warrant of Arrest para sa mga kasong Rape at Acts of Lasciviousness.

Binati ni Brig. General Lee ang mga operatiba sa matagumpay na pagsisilbi ng Arrest Warrant sa mga wanted na indibidwal. —ulat mula kay Gilbert Perdez (Patrol 13)

Hinatulan ng 28 buwan na pagkakakulong ang isang Overseas Filipino Workers (OFW) na Pinay sa Hong Kong.

Ito’y matapos mangolekta ng pera sa mga kapwa Pinoy kapalit ng trabaho sa Hong Kong at Macau na hindi naman naibigay ng mga ito.

Napatunayan ding Guilty ang Pinay domestic worker na si Marijane Biscocho, 45 taong gulang sa kasong Breach Condition of Stay at Money Laundering.

Maliban dito, 30 buwan namang pagkakakulong ang hinatol sa kasabwat pa nitong Pinay na may ari ng employment agency sa Hong Kong na isang lokal doon.

Maaari pang humina ang halaga ng piso kontra dolyar at umabot ng hanggang P60 ayon sa isang ekonomista.

Sa panayam ng DWIZ, sinabi ni Astro Del Castillo, Economical Analyst at U.P. Professor na bahagi ito ng depensa ng Estados Unidos dahil sa patuloy na pagtaas ng bilihin sa kanila.

Dagdag pa ng ekonomista, hindi lang mga OFW ang apektado ng mataas na spending rate sa ibang bansa, kundi maging ang mga namumuhunan sa Pilipinas lalo pa at import-dependent ang bansa.

Nagsara ang palitan kahapon sa P58.49 kada isang dolyar, na ikatlong sunod na araw na sumadsad ang halaga ng piso at ika-walong all time low ngayong 2022.

Binabasa ko nga iyong balita at iyong mga indicators,economic indicators sa US mukhang magkakaroon ng technical recession early as now,ibig sabihin talagang humihina ang kanilang ekonomiya, so ang comment mo kanina na masaya ang OFW family ,tama iyon dahil mas malaki ang suspending power nila pero tandaan natin halos lahat ng OFW ay apektado rin. Mahina ang ekonomiya ng America,doon nangagagaling ang pinakamalaking remittance sa North America tapos sa Europa humihina rin, hindi lang iyon tumataas din ang bilihin sa kanila.”—Economical Analyst at U.P. Professor Astro Del Castillo

Samantala, naniniwala pa rin si Del Castillo na magiging maayos pa rin ang ekonomiya ng bansa sa kabila ng mga problemang kinakaharap nito.

Naniniwala pa rin naman tayo na sisigla pa din ang ating ekonomiya, isa pa rin tayo sa magiging maayos na ekonomiya for this year, however we have to really bite, swallow the bitter pill before things got better”  —Economical Analyst at U.P. Professor Astro Del Castillo sa panayam ng DWIZ.

—sa panulat ni Hannah Oledan