Ilang paaralan na ang nagsuspinde ng klase ngayong araw dahil sa masamang lagay ng panahon.
Kabilang sa mga nagsuspinde ng klase sa lahat ng lebel ang Cavite City at munisipalidad ng Naval sa Biliran.
Wala ring pasok sa munisipalidad ng Montalban sa Rizal mula preschool hanggang senior high school.
Pinaplano ng Department of Public Works and Highways (DPWH) na magtayo ng expressways na may habang 1,800 kilometers.
Ayon kay Manuel Bonoan, kalihim ng DPWH, gagawin ang plano sa susunod na anim na taon.
Nagmula ang tala sa kasalukuyang 510 kilometers.
Samantala, pinaplano rin ng DPWH na magkaroon ng big road network development program na sosolusyon sa mabigat na daloy ng trapiko.
Si Bonoan ay parte ng delegasyon ni Pangulong Ferdinand Bongbong Marcos Jr. sa anim na araw nitong pagbisita sa Estados Unidos.
Target ng gobyerno na paabutin pa sa 1.7 milyon ang mga turistang dumarating sa Pilipinas hanggang sa pagtatapos ng 2022.
Ayon kay Department of Tourism secretary Christina Frasco, nasa 1.5 milyong turista pa lamang ang kanilang naitatala.
Magandang balita naman ito para sa DOT lalo’t malapit na nilang maabot ang target na 1.7 milyon.
Bilang solusyon, nakikipag-ugnayan na ngayon ang DOT sa Department of Transportation para mapaganda ang mga paliparan sa bansa.
Matatandaang noong nakaraang taon, bumagsak sa 163,879 ang bilang ng mga turistang dumarating sa Pilipinas dahil sa paghihigpit sa mga borders dulot ng COVID-19 pandemic.
Puspusan na ang paghahanda ng Metropolitan Manila Development Authority (MMDA) para sa Christmas rush o pagdagsa ng mga tao sa loob ng mga mall ngayong Pasko.
Ayon kay Engr. Carlo Dimayuga, acting chairman ng MMDA, nakikipag-ugnayan na sila sa mga mall para ipabatid sa mga ito na bawal na magpatupad ng sale tuwing weekend.
Isa kasi ito sa nakikita ng MMDA na magiging malaking epekto sa bigat ng daloy ng trapiko sa mga kalsada.
Sa huling tala ng MMDA, nasa 10 hanggang 15% ang nadagdag sa volume ng traffic sa mga kalsada.
Nasa 400,000 sasakyan naman kada araw ang bumabaybay sa mga kalsada sa Metro Manila simula nang luwagan ang restriksyon.
Suportado ng liga ng mga barangay na ipagpaliban muna sa susunod na taon ang pagdaraos ng barangay at Sangguniang Kabataan Elections (BSKE).
Ayon kay Dr. Eden Chua Pineda, pangulo ng grupo, walang sapat na panahon ang mga opisyal ng barangay na gawin ang kanilang proyekto dahil abala sila sa pagiging frontliner sa kasagsagan ng pandemya.
Sang-ayon naman aniya sila sa panukala ng ilang mambabatas na pahabain ang termino ng mga opisyal ng Barangay at SK hanggang anim na taon, mula sa kasalukuyang tatlong taon.
Makatutulong kasi aniya ito sa pagsulong ng kapayapaan sa mga barangay.
Matatandaang sa huling datos, nakalusot na sa ikalawang pagbasa ng senado ang BSKE matapos makapasa sa ikatlo at huling pagbasa ng kamara.
Pinasasama sa panukalang 2023 National Budget ang P10,000 ayuda para sa mga mahihirap na pamilya sa bansa.
Sa House Joint Resolution na inihain nina Gabriela Rep. Arlene Brosas, ACT teachers Rep. France Castro, at kabataan Rep. Raoul Manuel, layunin ng mga itong maglaan ng P10,000 ayuda sa 3.5 milyong mahihirap na pamilya sa ilalim ng 5.268 trillion pesos na budget.
Binigyang-diin ng mga ito ang kahalagahan na mabigyan ng tig-dalawang libong pisong ayuda ang 19.9 milyong indibidwal o 3.5 milyong pamilyang natukoy ng Philippine Statistics Authority na mahihirap.
Samantala, iminungkahi pa ng mga ito na maaaring kuhanin ang pondo sa modernization program fund ng Armed Forces of the Philippines.
Nabunyag sa deliberasyon ng pondo sa kamara na wala ng pondo ang Department of Labor and Employment (DOLE) para sa libreng COVID-19 test ng mga first time job seekers sa susunod na taon.
Ayon kay House Assistant Minority Leader at Gabriela Rep. Arlene Brosas, mayroong 100 million pesos na pondo ang DOLE ngayong taon para sa libreng COVID-19 test ng mga bagong naghahanap ng trabaho.
Pero hindi na aabot sa susunod na taon ang pondo kaya posibleng mabalik sa mga naghahanap ng trabaho ang gastos sa testing.
Idinagdag naman ni Quezon Rep. David Suarez, sponsor ng budget ng DOLE na naglabas ng resolusyon ang employees compensation commission na isa-subsidize nito ang antigen test kits para sa mga first-time job seekers.
Pinarerepaso sa senado ni senator Sherwin Gatchalian ang paggamit ng Filipino Sign Language o FSL bilang language of instruction o wika sa pagtuturo sa deaf education.
Kasabay ito ng paggunita ngayong araw ng International Day of Sign Language.
Sa Senate Resolution No. 14, napansin ni Gatchalian na hindi naipatutupad nang maayos ang mga batas na nagbibigay halaga sa FSL, kabilang na ang Filipino Sign Language Act o Republic Act No. 11106 na naisabatas noong 2018.
Bukod aniya sa paggamit ng FSL bilang language of instruction sa deaf education, mandato rin ng FSL Act na gawing opisyal na wika ang FSL sa lahat ng transaksyong may kinalaman sa mga bingi.
Samantala, pinuna rin ni Gatchalian ang kakulangan ng teacher training para sa FSL, mobilization ng mga deaf teachers at ng mga FSL materials.
Naabot na ng National Capital Region (NCR) ang target na bilang ng mababakunahan sa PinasLakas vaccination campaign ng Department of Health (DOH).
Batay sa datos ng DOH-Metro Manila Center for Health Development o MMCHD-DOH, umabot na sa 90% ng mga senior citizen sa Metro Manila ang nakatanggap ng initial dose ng bakuna habang 50.04% ang nakatanggap ng kanilang booster shot.
Tiniyak naman ni MMCHD-DOH assistant regional director Dr. Aleli Sudiacal na patuloy ang pagbabakuna sa bansa lalo’t isang rehiyon pa lamang ang nakaabot sa target.
Matatandaang una rito, ibinaba ng DOH sa 30% ang target na booster coverage sa bansa mula sa 50% na itinakda hanggang October 8.
Umani ng kaliwa’t kanang papuri ang bagong lunsad na ‘Bigas sa Basura’ program ng lokal na pamahalaan ng Muntinlupa sa ilalim ni Mayor Ruffy Biazon.
Ayon kay Public Information Office Chief Tez Navarro, ang implementasyon ng programa ay pinangungunahan ng Environmental Sanitation Center (ESC) at Gender and Development Office (GAD).
Sinabi ni Navarro na kung gaano kabigat ang basura ay ganoon din ang makukuhang bigas ng mga babaeng Muntinlupeño.
“Bigas sa Basura aim is to gather household waste, we encourage women/mothers to segregate waste and bring to ESC in exchange for rice. Since this is Gender Development program, we empower women to earn by getting kilos of rice. We call them Women Eco Warriors. The head of GAD is Mr. Reggie Salonga,” wika ni Navarro.