NATIONAL NEWS

Nakikipag-ugnayan na ang Department of Agriculture (DA) sa attached agency nito na nangangasiwa sa suplay ng mantika.

Ito ay dahil sa reklamo na diumano’y tumataas ang presyo ng mantika kada buwan.

Ayon kay DA Undersecretry Kristine Evangelista, kausap na nila ang Philippine Coconut Authority (PCA) upang matukoy ang supply situation ng nasabing produkto.

Paliwanag niya, nakabatay sa sitwasyon ang hakbang na kailangang ipatupad ng kagawaran upang matugunan ang problema sa presyo ng mantika.

Halimbawa na aniya rito kung dapat silang magtakda ng suggested retail price (SRP).

Iginiit naman ni Evangelista na sa ngayon ay hindi pa nila masasabi kung may kakulangan sa suplay ng naturang produkto.

Kasado na ang idaraos na malawakang Konsultasyong Sulit at Tama (KONSULTA) Program ng Philhealth bukas, araw ng Sabado.

Ayon sa Philhealth, gagawin ang programa sa 13 registration sites sa Metro Manila mula alas-8:00 ng umaga hanggang alas-5:00 ng hapon.

Binigyang diin ng Philhealth na ang KONSULTA package ay pinakabagong benepisyong handog nito para mapalakas, mapagtibay at mabigyan ng primary health care services ang lahat ng mga Pilipino tungo sa maayos at sapat na pangangalaga sa kalusugan.

Kabilang sa mga itinalagang Philhealth KONSULTA registration sites ang West Rembo Sports Complex sa Makati City; Executive Building, Maysilo Circle, Plainview sa Mandaluyong City; Skydome, SM City North Edsa sa Quezon City; Marikina Sports Complex sa Marikina City; at Barangay 17 Covered Court sa Tondo, Maynila.

Bukod pa ito sa Pulang Lupa Uno Covered Court sa Las Piñas City; Don Galo Elementary School sa Paranaque City; Wes Arena, Barangay Punturin sa Valenzuela City; San Jose Academy Covered Court sa Navotas City; Riverside Covered Court, Riverside Subdivision, Barangay Sto. Domingo sa Cainta, Rizal; at Pateros Municipal Hall sa Pateros.

Tutulong ang French experts para matutukan at matugunan ng Pilipinas ang mga usapin ng energy at food security ng bansa.

Ipinabatid ito ni French Ambassador to the Philippines and Micronesia Michele Boccoz matapos ang face to face meeting nina Pangulong Ferdinand Bong Bong Marcos, Jr. at French President Emmanuel Macron sa New York nuong Setyembre.

Sinabi ng French Ambassador na masusing pinag usapan ng dalawang lider ang resulta nang pagsalakay ng Russia sa Ukraine sa sitwasyon at presyuhan ng pagkain at langis na aniya’y na weaponized na.

Tiniyak ng ambassador ang commitment nilang makipag ugnayan sa Pilipinas sa pag shift nito sa green energy, sustainable agriculture at green development kaya’t agaran na silang bumuo ng French Task Forces para sa food at energy security.

Tiwala ang Employers’ Confederation of the Philippines (ECOP) na makakatulong ang mga biyahe ni Pangulong Bongbong Marcos Jr., sa ibang bansa upang matugunan ang pagdami ng mga walang trabaho sa bansa.

Sa panayam ng DWIZ, sinabi ni Sergio Ortiz-Luis Jr., pangulo ng ECOP, na malaki ang maitutulong nito upang makapag-uwi ng investments sa bansa na makalilikha ng maraming trabaho.

Paliwanag pa ni Ortiz-Luis na nakakadagdag sa bilang ng mga walang trabaho ang mga estudyanteng nagtatapos taon taon gayundin ang mga sektor na naaapektuhan ng kalamidad.

Sa datos ng Philippine Statistics Authority, umakyat sa 5.3% ang unemployment rate sa bansa noong Agosto, o katumbas ng 2.68 milyong Pilipino na walang trabaho.

Sinabi pa ni Ortiz-Luis na manageable pa rin ang 6.9% na inflation rate na naitala noong Setyembre.

Batay aniya ito sa kanilang isinagawang pag-aaral kaugnay sa inflation, kung saan, ikinikunsiderang manageable ang 5% hanggang 8%.