NATIONAL NEWS

Mayorya ng mga pilipino ang nagpahayag na ang pagkontrol sa inflation ang pangunahing national issue na dapat agad aksyunan ng Marcos administration.

Batay ito sa pinakabagong Pulse Asia survey na inilabas kahapon.

Sa September 17 hanggang 21 survey sa 1,200 adult respondents, 66% ng mga pinoy ang nagsabing dapat unahing aksyunan “agad” ng gobyerno ang patuloy na pagtaas ng presyo ng mga pangunahing bilihin.

Pangalawang nais ng mga pinoy na dapat agarang tutukan ng gobyerno ang pagtaas ng sahod ng mga manggagawa, 44%; pangatlo ang job creation, 35% habang 34% ang nais maibsan ang kahirapan.

Nitong Miyerkules lamang nang i-anunsyo ng Philippine Statistics Authority na lumobo ang September inflation rate sa 6.9%, na pinakamataas sa loob ng apat na taon.

Muling binuksan ng Philippine National Railways ang Calamba-Lucena line nito.

Isinagawa ito ilang oras matapos saksihan ni Pangulong Bongbong Marcos ang paglagda sa kontrata ng apat na north-south commuter railway projects.

Umarangkada ang unang biyahe ng rutang Calamba-Lucena ala sais y medya kagabi.

Ayon kay Transportation Secretary Jaime Bautista, hindi lang turismo ang mabibigyang kulay sa muling pag-arangkada ng Calamba-Lucena route.

Mas magiging mabilis at komportable rin anya ang biyahe ng mga galing at patungong Laguna at Quezon kasabay ng mabilis na pag-usad ng ekonomiya ng bansa.

Tuwing alas kwatro singkwenta ng umaga ang unang biyahe mula Lucena station habang ala sais y medya ng gabi ang last trip mula Calamba station.

Kinse pesos ang minimum fare mula Lucena hanggang san pablo habang bente pesos kung hanggang Calamba.

Naglaan na ang Department of Labor and Employment-Central Luzon ng P476 million para sa emergency employment program sa rehiyon matapos ang pananalasa ng bagyong Karding.

Inihayag ni DOLE-Region 3 Regional Director Geraldine Panlilio na nasa apatnapu’t dalawanlibong manggagawa ang kasalukuyang nagtatrabaho nang hindi bababa sa sampung araw upang tumulong sa clearing operations at rehabilitation activities sa kanilang komunidad.

Partikular anya nilang inilunsad ang tulong panghanapbuhay sa ating disadvantaged/displaced workers o tupad para sa mga biktima ng bagyo.

Ang tupad ay isang institutionalized program na ipinapatupad lalo na sa panahon ng kalamidad, gaya ng bagyo at lindol.

Karagdagang 2,562 covid-19 cases ang naitala ng Department of Health kahapon kaya’t sumampa na sa halos apat na milyon o 3,961,349 ang total caseload.

Umakyat din sa 63,149 ang death toll matapos madagdagan ng 38 habang lumobo na sa 3,871,820 ang recoveries.

Bahagya namang tumaas sa 26,380 ang aktibong kaso kahapon kumpara sa 25,733 noong Miyerkules.

Samantala, sa mga pinaka-bagong kaso, pinakamarami rito 1,174 ay mula sa Metro Manila.

Ibinabala ni Vaccine Expert Panel Chief Dr. Nina Gloriani na posibleng magkaroon ng covid-19 breakthrough infections sa mga indibidwal na hindi pa natuturukan ng booster.

Ito’y dahil sa humihina nilang immunity at increased mobility habang papalapit ang christmas season.

Ayon kay Gloriani, nananatiling mabagal ang pagtuturok ng booster doses sa bansa, kung saan 25% lamang ng target population ang nabigyan.

Mahalaga anyang maintindihan ng publiko, lalo ng mga senior citizen at may mga sakit na ang booster ay nagpapataas muli ng proteksyon laban sa mga variant ng covid-19.

Batay sa national covid-19 vaccination dashboard ng DOH, umabot na sa 73.2 million individuals ang fully vaccinated na sa bansa.

Namataan ng mga tauhan ng Philippine Coast Guard (PCG) ang apat na barko ng China Coast Guard sa bisinidad ng Bajo De Masinloc o Scarborough Shoal sa West Philippine Sea.

Kasunod ito ng aerial surveillance ng PCG sakay ng Cessna 208 caravan sa WPS kahapon.

Ayon kay PCG Commandant Admiral Artemio Abu, dalawang Chinese armed service ang nakita sa loob ng territorial waters ng Bajo De Masinloc habang ang dalawa pa ay nasa labas naman ng nasabing lugar.

Nilinaw naman ni Abu, na hindi nagkaroon ng tensiyon makaraang umikot ang tropa ng gobyerno sa lugar.

Sinabi pa ni Abu, na nakapuwesto na ngayon malapit sa bukana ng lugar ang BRP o barko ng Republika ng Pilipinas at BRP Suluan upang masiguro ang kaligtasan at seguridad ng mga pilipinong mangingisda sa lugar.