HOT STORIES OF THE WEEK

Umakyat na sa 12 ang bilang ng mga nasawi dahil sa hagupit ng Bagyong Karding.

Batay sa ulat ng National Disaster Risk Reduction and Management Council (NDRRMC), walo pa lamang ang nabeberipika kabilang ang limang rescuers mula sa San Miguel Bulacan, isa sa Baliuag, Bulacan, isa sa Zambales at isa sa Burdeos, Quezon.

Habang hindi pa nakukumpirma ang dalawang nasawi sa Tanay Rizal, isa sa Antipolo, Rizal at isa sa Zambales.

Ayon pa sa NDRRMC, anim pa ang napaulat na nawawala sa Bicol at CALABARZON habang 52 naman ang naiulat na mga nasugatan sa Central Luzon at CALABARZON.

Nasa 911,404 na indibidwal o 245,063 na pamilya ang naapektuhan ng bagyo sa 1,759 na barangays sa Ilocos, Cagayan, Central Luzon, CALABARZON, MIMAROPA, Bicol, at Cordillera.

Samantala, nasa mahigit tatlong bilyong piso na ang halaga ng pinsala ng Bagyong Karding sa sektor ng agrikultura sa Ilocos, Cagayan, Central Luzon, Bicol at Cordillera.

Hindi pa kailangang mag-angkat ang bansa ng bigas sa kabila ng matinding pinsalang dulot ng Bagyong Karding sa sektor ng agrikultura.

Tiniyak ito ni Agriculture Senior Undersecretary Domingo Panganiban kay Pangulong Bongbong Marcos, na tumatayong kalihim ng DA.

Ipinaliwanag ni Domingo na mayroon pang sapat na “buffer stock” ang Pilipinas.

Sa datos ng DA-Disaster Risk Reduction and Management Operations Center, halos dalawang bilyong piso na ang halaga ng pinsalang dulot ng bagyo sa agrikultura.

Pinaka-matinding naapektuhan ang nasa 145,000 hectares ng palayan, maisan at gulayan, lalo sa Central Luzon; Cordillera Administrative Region, Ilocos Region, CALABARZON at Bicol.

Pumalo na sa 10 ang bilang ng mga nasawi dahil sa pananalasa ng Bagyong Karding.

Batay sa datos ng National Disaster Risk Reduction and Management Council (NDRRMC), nadagdag sa bilang ang isang nalunod sa Baliwag, Bulacan at isa pa sa Tanay, Rizal.

Dahil sa tala, 10 na ang nasawi sa bansa dahil sa bagyo kung saan una sa tala ang limang rescuers sa San Miguel, Bulacan; dalawa sa Zambales at isa sa Burdeos, Quezon.

Maliban sa mga nasawi, umabot sa walo ang mga nawawala dahil sa bagyo kung saan nadagdag ang; isa sa Antipolo, Rizal; isa sa Patnanungan, Quezon at dalawa sa Mercedes, Camarines Norte.

Batay pa sa ulat ng NDRRMC, nasa 157,023 indibidwal o 39,893 pamilya ang naapektuhan ng bagyo sa 1,318 barangays sa Ilocos, Cagayan, Central Luzon, CALABARZON, MIMAROPA, Bicol, at CAR.

Aabot sa kabuuang 37,135 katao o 8,825 pamilya ang nananatili sa 574 evacuation centers, habang 15,759 na mga indibidwal o 3,778 pamilya ang nanunuluyan sa ibang mga lugar.

Nananatiling stranded naman ang 613 passengers, 190 rolling cargoes, limang vessels, at isang motorbanca sa CALABARZON, MIMAROPA, at National Capital Region.

Umabot naman sa kabuuang p5,532,150.18 assistance ang naipagkaloob sa mga apektadong residente sa Ilocos, Cagayan, Central Luzon, Bicol, at Cordillera.

Umabot na sa kabuuang P23,050,000 ang halaga ng pinsala sa imprastraktura ng bagyong Karding sa Ilocos, MIMAROPA, at Cordillera Administrative Region (CAR).

Ayon sa National Disaster Risk Reduction and Management Council (NDRRMC), mayorya ng pinsala ay naitala sa Cordillera na umakyat na sa P19.6 million; sinundan ng MIMAROPA, P3 million; at Ilocos, P450k.

Pumalo naman sa P108,837,409.87 ang pinsala sa agrikultura ng bagyo sa Ilocos, CALABARZON, Bicol, at CAR.

Samantala, nakapagtala naman ang  National Irrigation Administration ng P1.3 million na halaga ng pinsala sa Bicol.

Dapat nang ikunsidera ngayon pa lamang ng Department of Agriculture ang pag-a-angkat muli ng bigas sakaling maberipika ang matinding pinsalang dulot ng bagyong karding sa mga palayan sa Central Luzon.

Para kay Albay Rep. Joey Salceda, dapat nang mag-advance order ang Pilipinas ng imported na bigas, bilang paghahanda sa pagtaas ng presyo, lalo’t humihina ang piso laban sa dolyar.

Ayon kay Federation of Free Farmers National Manager at Agriculture secretary Raul Montemayor, dahil bumaba ang halaga ng piso, asahang mas magiging mahal ang imported rice.

Ito anya ang dahilan kaya’t dapat nang ilarga ng gobyerno ang subsidiya at income support para sa mga magsasaka upang makapagsimula muli silang makagpagtanim.

Una nang tiniyak ni D.A. Spokesperson at Undersecretary for Consumer and Political Affairs Kristine Evangelista na may sapat na rice stocks ang bansa dahil sa mga naunang import at nagpapatuloy na anihan.

Gayunman, batay sa projection ay aabutin lamang ng dalawa’t kalahating buwan ang stock na bigas ng bansa malayo sa kailangang 100-day buffer stock na requirement upang mapunan ang pangangailangan sa susunod na taon kasabay ng planting season.

“I can’t be in the back, I can’t be in the middle, I have to be in the FRONTROW” – Floyd Mayweather

Dumating na sa Pilipinas ang undefeated world boxing champion na si Floyd Mayweather.

Si Mayweather ay dumating Martes ng gabi sakay ng kaniyang private gulfstream jet, buhat sa Japan.

Napag-alaman na mayroong isang pribadong beauty product company ang nag-imbita kay Mayweather para sa kanyang product endorsement.

Inaasahang makikipugpulong din ito sa ilang mga executives ng isang beauty product para sa kanyang promotional trip sa ating bansa.

Ikinatuwa naman ni Mayweather ang pagbalik sa Pilipinas at sinabi niya na lagi siyang nag-eenjoy sa pagbisita sa bansa, kung kaya’t inaasahang magpapabalik-balik ito sa Pilipinas. —larawan, panulat, ulat mula kay Raoul Esperas (Patrol 45)

Agad na aprubahan sa bicameral conference committeee kagabi ang Senate Bill number 1310 o SIM Registration biill.

Matapos na makalusot sa ikatlo at pinal na pagbasa ng senado ang naturang bill kagabi agad itong isinalang sa bicam at mabilis na naaprubahan makaraang mareconcile ang disagreeing provision o magkaibang probisyon sa pagitan ng naipasang bersyon ng senado at kamara.

Ayon kay senator Grace Poe, sponsor at isa sa mga author ng nabanggit na bill, raratipikahan nila sa sesyon mamayang hapon ang bicam report para maipadala na ito sa Malacanang para sa paglagda ng pangulo.

Samantala sinabi ni Senator Win Gatchalian na oras na maging ganap na batas na ang SIM Registration bill inaasahang makakatulong ito sa pagsugpo ng iba’t ibang uri ng cybercrime gaya ng pagnanakaw ng pagkakakilanlan o identity theft at paglaganap ng mga mensaheng spam at phishing.

Ang pagpaparehistro ng SIM ay magbibigay daan anya para itatag ang pagkakakilanlan ng mga SIM card users at inaasahan matutugunan nito ang problema ng pagtaas ng mga insidente ng krimen na may kinalaman sa paggamit ng mga SIM card.

Magiging madali na para sa mga awtoridad na matukoy ang mga kawatan o grupong gumagawa ng online crimes.

Ayon kay gatchalian ang mga telecommunications companies, na madalas na sinisisi sa ilang mga cyber atrocities ay nagsabi na rin na ang SIM card registration ay makakabawas nang husto sa spam at phishing text messages.

makatutulong din anya ito sa pagtugon sa isyu ng iligal na pagbebenta o pautang ng mga mobile o e-wallet account.

ang mga cyber criminal ay karaniwang anyang gumagamit ng mga e-wallet account na hindi nakarehistro sa ilalim ng kanilang mga pangalan sa pagsasagawa ng mga cyber crimes bagay na mapipigilan sa mandatory na pagpaparehistro ng mga SIM card.

Ang panukala ay magpapalakas din ng kumpiyansa ng publiko na magsagawa ng mga digital na transaksyon at mabawasan ang takot na makatagpo ng mga masasamang grupo o indibidwal na gumagawa ng mga cyber crime.

Arestado ang 75 taong gulang na American passenger na dumating sa bansa matapos na ito’y magtangkang magpuslit ng 3.7 kilos ng high-grade na Cocaine.

Ayon kay Airport Customs District collector Carmelita Talusan, ang suspek ay nakilalang si Stephen Joseph Szuhar, na dumating sakay ng Qatar Airways Flight QR 932 galing sa São Paulo, Brazil via Doha, Qatar, at dumating sa NAIA Terminal 3, Martes ng gabi.

Matapos ang inspeksiyon na isinagawa ng pinagsanib-pwersa ng Bureau of Customs, Philippine Drug Enforcement Agency, Airport Police at Philippine National Police Aviation Security Group. Nakita sa kanyang bagahe ang 3.7 kilos ng Cocaine na itinangkang ipuslit sa bansa.

Umamin naman ang suspek na siya ay babayaran ng hindi pinangalanang courier o contact sa São Paulo, Brazil, na nagpadala ng bag na naglalaman ng droga.

Kasalukuyang isinasagawa ng mga awtoridad ang inbentaryo habang inihahanda ang kaukulang demanda laban sa 75 taong gulang na American national na nagtangkang magpuslit ng cocaine sa ating bansa.

Tinatayang aabot sa P19.6-M ang halaga ng cocaine na nasabat sa paliparan. —ulat mula kay Raoul Esperas (Patrol 45)

Umakyat na sa halos P1.3 billion ang halaga ng pinsalang dulot ng bagyong Karding sa sektor ng agrikultura.

Pinaka-matinding naapektuhan ang Central Luzon na pangunahing rice producing region habang damay din ang Cordillera, na major vegetable producer; Ilocos, Cagayan Valley, CALABARZON at Bicol regions.

Ayon sa Department of Agriculture, karamihan sa mga palayan at iba pang taniman ay pinadapa ng malakas na hangin at nalubog sa baha.

Aabot sa 82,158 farmers at fisherfolk habang 141,312 hectares ng agricultural land ang apektado, na may volume ng production loss na 72,231 metric tons.

Magbibigay naman ang D.A. ng tulong sa mga naapektuhang magsasaka at mangingisda, kabilang ang nasa P27 million na halaga ng binhi ng palay at P13.2 million na halaga ng binhi ng mais.

Samantala, para sa agarang rehabilitasyon ng mga apektadong lugar, maglalaan ang kagawaran ng P500 million mula sa quick response fund.

Binigyang pagkilala at parangal ng Senado ang limang rescuer na nasawi sa gitna ng kanilang rescue operations sa San Miguel, Bulacan dahil sa pananalasa ng Typhoon Karding.

Nabatid na apat na magkakahiwalay na resolusyon ang inihain nina Senators Joel Villanueva, Robin Padilla, Bong Revilla at Lito Lapid, upang kilalanin ang kabayanihang ipinakita ng mga nasawing rescuer na miyembro ng Provincial Disaster Risk Reduction and Management Office (PDRRMO).

Sa inihaing Resolution 240 ni Senator Villanueva, bibigyang papuri at pagkilala ang “extraordinary heroism” ng limang rescuer dahil sa pagtupad sa kanilang serbisyo sa bayan.

Batay naman sa Resolution 235 ni Lapid, kinikilala ang katapangan, pagiging makatao at pagmamalasakit sa kapwa ng mga nasawing rescuers na kinabibilangan nina Marvy Bartolome; Narciso Calayag Jr.; Troy Justin Agustin; George Agustin; at Jerson Resurecion.

Samantala, nakapaloob naman sa inihaing resolusyon ni Lapid, ang ipinamalas na kabayanihan ng mga rescuer ay sumasalamin sa pagmamahal sa Bayan, at pagiging kapwa-makatao.

Bukod pa dito, nakapagbibigay din ito ng inspirasyon sa kanilang mga kapwa rescuers at mga kapwa lingkod-bayan.

Sa Resolution 234 naman na inihain ni Padilla, nakasaad dito na ang ipinakitang dedikasyon, tapang at commitment sa serbisyo publiko ng mga rescuer ay dapat mabigyang papuri ng taumbayan at pamahalaan.