HOT STORIES OF THE WEEK

Patuloy pa ring umiiral sa bansa ang Southwest Monsoon o Hanging Habagat partikular na sa Southern Luzon at Western Visayas.

Ayon kay PAGASA weather specialist Daniel James Villamil, huling namataan ang bagyong karding sa layong 1,005 kilometers kanlurang bahagi ng northern Luzon sa labas ng Philippine Area of Responsibility (PAR).

Taglay nito ang lakas ng hanging aabot sa 165 kilometers per hour at pagbugsong aabot naman sa 205 kilometers per hour habang papalayo ng pilipinas at kumikilos patungong west-north-west sa bilis na 15 kilometers per hour pero walang direktang makakaapekto sa loob at labas ng ating bansa.

Samantala, patuloy namang minomonitor ng PAGASA weather bureau ang Low Pressure Area (LPA) na namataan sa 1,385 kilometers silangang-hilaga ng Luzon at posible itong maging bagyo at pumasok sa loob ng par sa susunod na 24 na oras.

Asahan naman ang maulap na kalangitan na may pag-ulan sa bahagi ng palawan kasama na ang Kalayaan Islands maging sa Zambales, Bataan, Visayas, at nalalabing bahagi ng Mindanao dahil sa patuloy na pag-iral ng hanging habagat

Generally fair weather condition naman ang mararanasan sa nalalabing bahagi pa ng Luzon.

Nagpaabot ng tulong ang mga pribadong sektor sa mga naapektuhan ng bagyo Karding.

Ayon kay Philippine Disaster Resilience Foundation president Butch Meily, kabilang sa mga pribadong kumpanya na ito ang telco, water at energy distributors, at mga mall at restaurant operators, na nagbigay ng pagkain, tubig at iba pang pangunahing pangangailangan sa mga apektadong indibidwal.

Batay sa inisyal na pagtataya ng ndrrmc, umabot na sa mahigit P60-M ang danyos sa agrikultura.

Umabot na sa mahigit 16k hectares ng agricultural land ang naapektuhan ng bagyong Karding sa Luzon.

Sa panayam ng DWIZ, sinabi ni Department of Agriculture (DA) undersecretary Kristine Evangelista na nasa 740 magsasaka rito ang apektado.

Anya, tuloy pa rin ang   assessment ng kagawaran sa mga lugar na tinamaan ng bagyo.

Dagdag pa ni Evangelista, tinitingnan din nila kung gaano kalaki ang epekto ng bagyo sa rice situation.

Samantala, sinabi ni Evangelista na mamimigay sila ng binhi sa mga apektadong magsasaka.

Nanumpa na bilang bagong Executive Secretary si dating Supreme Court chief Justice Lucas Bersamin.

Ayon kay Press secretary Trixie Cruz-Angeles, pinangunahan mismo ng Pangulong Ferdinand Bongbong Marcos Jr., ang panunumpa ni Bersamin.

Nanumpa muna si Bersamin bago dumalo sa ika-9 na cabinet meeting ng Administrasyong Marcos.

Si Bersamin ay kabilang sa mga bumoto pabor sa paglilibing sa dating Pangulong Ferdinand Marcos Sr., sa Libingan ng mga Bayani, patuloy na pagkakakulong ni Senador Leila De Lima at pagdedeklara sa pork barrel bilang Unconstitutional.

Nadagdagan pa ang bilang ng mga nasawi sa pananalasa ng bagyong Karding.

Ito ang inihayag ng National Disaster Risk Reduction and Management Council (NDRRMC) matapos umakyat sa walo ang mga biktimang nasawi sa Luzon.

Sa panayam ng DWIZ, sinabi ni NDRRMC spokesperson Asec. Bernardo Rafaelito Alejandro IV, mayroon ng initial reports ang kanilang ahensya habang nagpapatuloy pa ang assesment sa mga apektadong lugar.

Kabilang sa mga biktimang nasawi sina George Agustin, 45 anyos; Marvy Bartolome, 36; Narciso Calayag Jr., 33; Troy Justin Agustin, 30 anyos at Jerson Resurecion na pawang mga rescuer na tutulong sana sa mga residenteng binaha sa San Miguel, Bulacan.

Isa din ang nasawi sa bayan ng Burdeos sa Polillo Islands, Quezon at dalawa naman sa Zambales.

Nalampasan na ng bagong kaso ng COVID-19 sa National Capital Region ang naunang peak nito noong Agosto.

Ito ang inihayag ng OCTA Research Group makaraang makapagtala ng additional 1,600 COVID-19 cases sa Metro Manila kumpara sa 1,502 new cases noon namang Agosto a – 7.

Ayon kay OCTA Research Fellow, Dr. Guido david, tumaas sa 18.5% ang positivity rate kumpara noong 15.7% habang sumampa sa 1.30 ang reproduction rate kumpara sa 1.21%.

Dumoble rin anya ang one-week growth rate ng kaso ng COVID-19 sa 25% noong linggo, September 25 kumpara sa 13% noong September 18.

Inaasahan ng OCTA na tataas pa ang mga kaso ng COVID-19 hindi lamang sa NCR kundi sa iba pang bahagi ng bansa sa mga susunod na araw.

Muling magpapatupad ng rollback ang mga kumpanya ng langis bukas.

Sa abiso ng Pilipinas Shell at Seaoil Philippines Inc., magkakaroon ng tapyas na P1.65 sa kada litro ng gasolina; P1.35 sa bawat litro ng kerosene; at P1.25 naman sa kada litro ng diesel.

Magpapatupad din ng kaparehong price adjustment ang Petrogazz at Cleanfuel maliban sa kerosene.

Sa datos ng Department of Energy, ang kabuuang year-to-date adjustments ay mayroong net increase na P18.15 sa kada litro ng gasolina, P31.70 sa kada litro ng diesel, at P27.10 sa kada litro ng kerosene, hanggang nitong August 23, 2022.

Aabot sa 643 indibidwal o 164 pamilya ang naapektuhan ng bagyong Karding sa 28 barangay sa Cagayan, MIMAROPA, Bicol, western Visayas, at Cordillera.

Batay sa ulat ng  National Disaster Risk Reduction and Management Council (NDRRMC), nasa 147 pamilya ang nananatili sa 34 na evacuation centers, habang labing tatlong pamilya naman ang nasa labas ng evacuation centers.

Tinaya sa P1-M ang halaga ng pinsala sa imprastraktura na naitala sa MIMAROPA, habang dalawang kalsada sa Bicol ang hindi pa rin madaaanan.

Samantala, sinabi pa ng NDRRMC na 12 siyudad at munisipalidad ang nakaranas ng power interruptions.

Nananatili namang stranded ang mahigit 2,700 pasahero sa iba’t ibang pantalan sa Luzon, kung saan karamihan ay mula sa Bicol region na may 1,944; MIMAROPA, 472; at CALABARZON 321.

Umabot na sa 2,293 pamilya o mahigit 8,300 katao sa Luzon, karamiha’y sa Metro Manila, ang nagsilikas dahil sa bagyong Karding.

Ayon sa National Disaster Risk Reduction and Management Council (NDRRMC) kabilang sa mga evacuee ang nasa 900 pamilya o 3,400 katao sa NCR, partikular sa Marikina at Quezon cities.

Bukod sa NCR, apektado rin ang mga residente sa Central Luzon, CALABARZON, Cagayan Valley, Ilocos Region at Bicol Region.

Unang naglandfall ang bagyo sa Burdeos, Quezon kahapon na nasundan ng ikalawang landfall sa Dingalan, Aurora kagabi.