HOT STORIES OF THE WEEK

Nanganganib na muling tumaas ang singil sa kuryente ng Meralco.

Aminado ang Energy Regulatory Commission na kahit ibinasura ang hirit na power rate hike ng Meralco at power units ng San Miguel Corporation, hindi nila matiyak na hindi tataas ang singil sa mga susunod na buwan.

Maaari namang kumuha ng kuryente sa ibang source ang Meralco sakaling umatras na sa power supply contracts ang mga planta ng SMC matapos ibasura ang kanilang hiling na nag-ugat sa pagsirit ng presyo ng panggatong.

Gayunman, iginiit ni Department of Energy Spokesman Wimpy Fuentebella na dapat igalang ng power distributor at SMC ang pasya ng ERC.

Inisnab naman ni ERC Chairperson, Atty. Monalisa Dimalanta ang kalkulasyon ng San Miguel na 30 centavos per kilowatt hour lang ang itataas ng singil kung pinagbigyan ang hiling.

Samantala, nagbanta naman si Meralco Regulatory Management Head, Atty. Romulo Valles na maniningil sila ng sangkaterbang multa kung kakalas sa kontrata at tumigil ang mga planta sa pagsu-supply ng kuryente sa kanila.

Malaki pa rin ang ginagastos ng mga Filipino sa pagpapa-ospital kahit mayroong expanded healthcare sa ilalim ng universal health care o UHC Law.

Inamin ito ng Philippine Health Insurance Corporation o PhilHealth sa hearing ng Senate Committee on Government Corporations, kahapon.

Sa katunayan, ayon kay PhilHealth Officer-In-Charge Eli Dino Santos, ay 34% ng hospital bill ay mula mismo sa sariling bulsa ng mga pinoy batay sa isinagawang pag-aaral ng nasabing health insurer noong 2019.

Nangangahulugan anya ito na sa bawat pisong gastos ay trenta’y kwatro sentimos ang out-of-pocket expense.

Mayroon ding pag-aaral ang Philippine National Health accounts ng Philippine Statistics Authority na 44.7% ng hospital bill ay mula sa bulsa ng mga pasyente.

Dahil dito, umaasa si Senator Joel Villanueva na babalangkas ng mekanismo ang PhilHealth upang mapababa ang out-of-pocket hospital expenses ng mga pinoy.

Gayunman, inihayag ni Senator Alan Peter Cayetano, chairman ng kumite, na base sa OCTA Research survey, 57% ang hindi mga miyembro ng PhilHealth.

Idinagdag ni Cayetano na sa katunayan ay mas maraming mayaman at may-kayang pasyente ang gumagamit ng PhilHealth benefits kumpara sa mga indigent, dahil hindi alam ng mga mahirap na otomatikong miyembro sila ng PhilHealth.

Inanunsiyo ng Office of the President ang dalawang accomplishment sa unang isandaang araw ni Pangulong Ferdinand “Bongbong” Marcos Jr. sa darating na October 8, 2022 para sa kaniyang puwesto bilang pangulo ng Pilipinas.

Kabilang sa dalawang accomplishment na ipinangako ni PBBM sa kaniyang unang State of the Nation Address (SONA) ay ang pagpirma ng executive order na nagpapataw ng isang taong moratorium sa pagbabayad ng land amortization at interest payments ng agrarian reform beneficiaries.

Pangalawa, ang paglulunsad ng One Repatriation Command Center (ORCC) para sa mga distressed overseas filipino workers.

Layunin ng administrasyon na matulungan ang mga magsasaka at mga ofw sa kanilang mga pangangailangan upang maging maganda ang kanilang resources at mas maging produktibo ang mga ito para sa pag-angat ng ekonomiya ng bansa.

Bukas ang PCSO sa isinusulong na imbestigasyon ng senado hinggil sa resulta ng grand lotto draw 6/55 noong nakalipas na linggo matapos na umabot sa 433 na mga mananaya ang idineklarang nanalo.
Sa laging handa briefing sinabi ni PCSO Gen-Man. Mel Robles, handa silang dumalo sa anumang senate inquiry sakaling ipatawag sila ng mga senador.
Maganda aniya itong pagkakataon upang malaman at maipakita sa mga tao kung ano talaga ang nangyayari sa mga ginagawang lotto draw ng PCSO.
Sa ganitong paraan mabibigyan nila ng kapanatagan ang isipan at kalooban ng publiko partikular na ng mga mananaya.
Naniniwala si Robles na lalabas ang katotohanan sa imbestigasyon na ito at makikita ng mga Pilipino na walang mali o anomalya sa kanilang mga proseso at inilalabas na resulta.

Pinangunahan ni Vice President at Education Secretary Sara Duterte ang pagdiriwang ng National Teachers’ Day ngayong araw sa Abra Sports Complex sa Bangued kasama ang Department of Education – Cordillera Administrative Region (DepEd-CAR).

Nilahukan ng 4,000 mga guro ang pinaka-unang in-person celebration ng Teachers’ Day matapos ang dalawang taong COVID-19 pandemic.

Nagsilbi bilang guest of honor para sa aktibidad si First Lady Liza Araneta-Marcos na nagbigay ng inspirational message sa mga guro.

Pinuri din ni Araneta-Marcos ang effort ng mga guro sa pagbibigay ng kalidad na edukasyon sa mga mag-aaral sa gitna ng pandemya.

Maliban kay Duterte, kabilang din sa dumalo ang mga opisyal ng DepEd mula sa Central Luzon, Regional at School Division Offices, local government officials at mga partner ng DepEd mula sa private at non-government organizations.

Bahagyang bumilis ang inflation rate o pagtaas ng presyo ng pangunahing produkto sa 6.9% nuong Setyembre.

Ayon sa Philippine Statistics Authority (PSA), ito’y mula sa 6.3% na naitala nuong Agosto.

Paliwanag ng PSA na ang gastos sa pagkain at enerhiya ang nagtutulak umano sa pagtaas ng presyo ng mga bilihin sa bansa.

Tumaas din sa 7.4% ang inflation sa pagkain at non-alcoholic beverages.

Samantala, sinabi ng BSP na ang pagtaas ng singil sa kuryente at presyo ng mga pangunahing pagkain, kasama ang mahinang performance ng piso, ay maaaring nagdulot ng inflation noong nakaraang buwan.

Namigay ang Overseas Filipino Workers Welfare Administration (OWWA) ng kabuuang P400,000 na halaga ng tulong pangkabuhayan sa isang grupo ng mga distressed overseas Filipino workers (OFWs) sa rehiyon ng Cagayan Valley.

Ipinabatid ng OWWA Regional Welfare Office-2 (RWO-2) na ang mga beneficiaries ay mga sakop ng balik Pilipinas, balik-hanapbuhay (BPBH) program mula sa Quirino Province.

Ayon sa OWWA RWO-2, nakatanggap ang 17 benepisyaryo ng kabuuang halaga na P20,000 habang anim sa kanila ang nabigyan naman ng P10,000.

Layon ng naturang programa na magbigay ng agarang tulong sa mga bumalik na miyembro-OFWs na nagkakahalaga ng P20,000 bilang panimulang kapital para sa livelihood project.

Inihayag ni Roy Mabasa, kapatid ng brodkaster at komentaristang si Percy Lapid na walang nabanggit o nasabing personal kaugnay sa pagbabanta sa kaniyang buhay bago mangyari ang pamamaril.

Sa panayam ng DWIZ, sinabi ni Mabasa na sa pagkakakilala nito sa kanyang kapatid na halos 35 taon na sa industriya ay marami na itong natanggap na threat ngunit hindi nito sinasabi sa kanya maging sa kanyang pamilya.

Dagdag pa ni Mabasa na tanging katotohanan lamang ang bitbit ng kanyang kapatid pagdating sa mga pinag-uusapang isyu ng bayan.

Dumating siya sa panahon na nagkalat ang fake news sa gitna non nagsasalita si Percy bitbit ang katotohanan, dinidiscuss, nagkokomento sa mga bagay na usaping pang bayan na ang tanging sandigan ay katotohanan yun lang yung malinaw don.”

Umaasa naman si Roy na matitigil na ang mga nangyayaring karahasan laban sa mga mamamahayag.

Tayo’y nalulungkot sapagkat ang inaasahan sana natin ay matigil na yung karahasan laban sa mga mamamahayag, ito yung adbokasiya na isinusulong natin labimlimang taon na ang nakaraan, kasama na ang mga paghahain ng mga libelo sa mga mamamahayag pero alam mo hindi natin malaman kung kailan ba matitigil ang mga ganito…”

                                       —Ang tinig ni Roy Mabasa, kapatid ng brodkaster at komentaristang na si Percy Lapid

Kinumpirma ng Palasyo na nagbitiw na sa puwesto sina Press secretary Trixie Cruz-Angeles at Commission on Audit (COA) chairman Jose Calida.

Ayon kay Senior Deputy Executive Secretary Hubert Guevara, kapwa medical reasons ang ibinigay na dahilan nina Cruz-Angeles at Calida.

Nagpasalamat naman anya si Cruz-Angeles kay Pangulong Ferdinand “Bongbong” Marcos Jr.

Nilinaw ni Guevarra na nasa proseso pa sila ng pagtulong sa tanggapa ng Press Secretary at paghahanap ng kapalit sa nabakanteng posisyon.

Bukod kay Angeles, inihayag naman ni Executive secretary Lucas Bersamin na tinanggap na ng Pangulo ang pagbibitiw ni Calida.

Nagresign si Calida matapos ma-bypass ng Commission on Appointments.

Nanghihinayang anya si Pangulong Marcos sa pagbibitiw ng COA chief na wala pa ring kapalit.

Samantala, kinumpirma rin ni Bersamin na wala nang kahit anong posisyon sa Marcos Administration si dating Executive secretary Vic Rodriguez.

Kinondena na rin ng mga foreign embassy sa Pilipinas ang pagpatay sa beteranong broadcaster na si Percival Mabasa o Percy Lapid.

Kasabay nito ang pagpapahayag ng kanilang pagkabahala sa pinaka-bagong insidente ng pagpatay sa mga mamamahayag sa bansa.

Hinimok ng mga Embahada ng Canada at Netherlands, na kapwa tagapangulo ng Media Freedom Coalition in the Philippines, ang Gobyerno ng Pilipinas na tiyaking makakamit ang katarungan at ligtas ang mga mamamahayag.

Kinatigan naman ng Embassy ng France at Micronesia ang pahayag ng Media Freedom Coalition.

Samantala, nananawagan din ng hustisya para kay Mabasa ang Foreign Correspondents Association of the Philippines.