Nangangailangan ng mas maraming English Language Teacher ang Taiwan.
Hinikayat ng Taipei Economic and Cultural Office ang mga Pinoy na lumahok sa Foreign English Teacher Program sa pamamagitan ni TECO Representative Peiyung Hsu.
Ayon kay Hsu, ngayong taon lamang ay 77 guro at 11 teaching assistants ang nakapasok sa programa mula sa 6K aplikante.
Bumuo na anya ang Ministry of Education ng Taiwan ng programang magpapaunlad ng english proficiency ng mga Taiwanese student.
Aabot sa 5,000 bilanggo ang target palayain ng Department of Justice (DOJ) sa June 2023.
Ayon kay Justice secretary Jesus Crispin Remulla, nagsasagawa na sila ng decentralization para maayos ang masisikip na kulungan sa bansa.
Katuwang ng DOJ sa gawain ang Department of Interior and Local Government at Supreme Court sa pamamagitan ng Justice Sector Coordinating Council.
Una rito, sinabi ni Remulla sa United Nations Human Rights Council Session na committed siyang ipagpatuloy ang regular na pagpapalaya.
Dahil dito, noong Setyembre ay aabot sa halos 400 Persons Deprived of Liberty ang napalaya mula sa New Bilibid Prison, Correctional Institution for Women sa Mandaluyong at iba pang prisons at penal farms sa bansa.
Naglabas na ang National Capital Region Police Office (NCRPO) ng larawan at wanted poster ng sinasabing suspek na pumatay sa broadcaster na si Percival Mabasa o mas kilala bilang Percy Lapid noong October 3 sa Las Piñas City.
Ayon kay NCRPO Chief Police Brigadier General Jonnel Estomo, nakita ang person of interest sa pamamagitan ng pag-backtrack sa CCTV footage mula sa ruta ng biktima bago mangyari ang krimen.
Itinaas na rin sa 1.5 million pesos mula sa 500,000 pesos ang iniaalok na pabuya para sa sinumang makapagbibigay ng impormasyon sa kinaroroonan ng hindi pa rin nakikilalang suspek.
Nabatid na mula ang karagdagang cash reward sa mga kaibigan ng biktima at concerned citizens.
Sinabi pa ng hepe na mula kay Interior Secretary Benjamin Abalos ang inisyal na pabuyang 500,000 pesos kapalit ng impormasyon ng nasabing suspek.
Samantala, tiniyak ni Estomo ang kaligtasan at seguridad ng sinumang informant.
Inihayag ng Office of the Vice President (OVP) na “best accomplishment” sa unang 100 araw ni Department of Education (DepEd) Secretary at Vice President Sara Duterte-Carpio ang pagbalik ng face to face classes sa bansa sa gitna ng COVID-19 pandemic.
Ayon kay Vice President Duterte, kanila nang isinasapinal ng OVP ang lalamanin ng kaniyang ulat para sa ika-100 araw niya bilang pangalawang pangulo ng bansa, bukas.
Sinabi ni VP Duterte, na isang malaking tagumpay ang pagbabalik sa normal ng klase ng mga estudyante.
Pinasalamatan ni Pangulong Ferdinand “Bongbong” Marcos Jr. ang kaniyang mga gabinete maging ang economic managers sa pagtulong sa kaniyang unang 100 araw bilang pangulo ng Pilipinas.
Ayon kay Pangulong Marcos, malaki ang naging papel ng mga opisyal sa pagbibigay ng magagandang ideya para mapaunlad ang ekonomiya ng bansa sa panahon ng COVID-19 pandemic.
Nabatid na magtatapos na ang unang 100 araw ni PBBM sa Sabado, Oktubre 8.
Hindi patas para sa mga bansang walang kakayahang mag-produce ng sariling langis ang pasya ng Organization of Petroleum Exporting Countries (OPEC) na bawasan ang kanilang oil production ng dalawang milyong bariles kada araw.
Ayon kay Senate President Migz Zubiri, tiyak na magdudulot na naman ito nang sunud-sunod na pagtaas ng presyo ng produktong petrolyo na susundan ng pagtaas ng presyo ng iba pang produkto.
Isa anya sa nakikita niyang solusyon ay ang pagkakaisa ng iba’t ibang bansa upang palakasin ang paggamit ng mga alternatibong source of energy upang mabawasan ang pagiging dependent sa oil products.
Inihalimbawa ng senador ang pagpapalakas at pagpapabilis ng pagpapasok sa pilipinas ng mga E-Vehicle kasabay ng pagdevelop ng mga alternative energy tulad ng solar at wind.
Kasabay din nito ang pagsasaayos ng mass transportation ng bansa tulad ng ipinangako ng Department of Transportation na 1,200 kilometer railway line sa Metro Manila patungong Central Luzon.
Nangangamba ang mambabatas na dahil sa desisyon ng opec ay patuloy na tataas ang inflation rate ng bansa. —sa ulat ni Cely Ortega-Bueno (Patrol 19)
Mag-iikot ang Energy Regulatory Commission (ERC) sa mga probinsya upang busisiin ang mga kontratang pinapasok ng mga electric cooperative sa mga power generation company.
Sa gitna ito nang pagtaas ng singil ng kuryente sa mga rehiyon, partikular sa Eastern Visayas at Cordillera na aabot sa 20 pesos per kilowatt hour ang singil.
Gayunman, aminado si ERC Chairperson Monalisa Dimalanta na hindi ura-urada ang solusyon sa taas-singil at puwede pang lumala ang sitwasyon.
Ipinaliwanag ni Dimalanta na hindi “fixed” ang presyo ng mga power supply contract ng mga electric cooperative at power generation companies sa mga probinsya kaya’t hindi napigilan ang rate hike.
Tiniyak ni House Speaker Martin Romualdez na ipaprayoridad ng liderato ng Kamara ang kapakanan at karapatan ng mga guro sa bansa.
Kasunod ito ng naging selebrasyon ng National Teachers’ Day kahapon kung saan, sinabi ni Romualdez na mananatiling masigasig ang mababang kapulungan sa pagpasa ng mga panukalang batas na may kaugnayan sa mga guro.
Ayon kay Romualdez, dapat lang na pasalamatan at kilalanin ang mga guro na nagsasakripisyo, naglilingkod, at nagtiyaga para sa kanilang serbisyo lalo na ngayong pandemya.
Iginiit ni Romualdez, na ang mga guro ang siyang nagbibigay ng malaking ambag para sa paghubog sa pagkatao at tamang-asal ng mga mag-aaral.
Tumaas pa ang bilang ng mga Pilipinong walang trabaho noong Agosto.
Batay sa datos ng Philippine Statistics Authority (PSA), sinabi ni Chief at National Statistician Claire Dennis Mapa na sumampa sa 2.68 million o 5.3% ang bilang ng unemployed individuals, edad 15 pataas mula sa 2.60 million o 5.2% noong July.
Mas mababa naman ang unemployment rate na naitala noong August kumpara sa kaparehong buwan noong nakaraang taon na may 8.1% o 3.88 million Pinoy na walang trabaho.
Samantala, tumaas din ang underemployment rate o ang kabuuang bilang mga manggagawa na naghahanap ng mas maraming trabaho sa 14.7% o 7.03 million noong August mula sa 13.8% o 6.54 million noong July.
Magpupulong pa ang Inter Agency kaugnay sa plano ng Department Of Migrant Workers (DMW) na bumalangkas ng scholarship fund para sa healthcare workers na magta trabaho sa ibayong dagat.
Ayon kay DMW Secretary Susan Toots Ople, tinututukan na nila ang paghahanap nang pagkukunan ng scholarship fund sa pamamagitan ng bilateral talks sa ibang bansa kung saan hihilingin nilang makapag contribute ang ibang bansa para rito partikular ng medical technologist.
Nagmula mismo aniya ang nasabing ideya sa Minister of Health ng Singapore at bukas ang Singapore Based Temasek Foundation at US Based Staffing Agencies para tumulong sa nasabing panukala.
Aminado si Ople na hindi talaga maiiwasang umalis ng bansa ang healthcare workers para mag trabaho sa ibang bansa.
Isasagawa sa susunod na linggo ang nasabing pulong ng Inter Agency na kinabibilangan ng DOH, DFA at DOLE.
