HOT STORIES OF THE WEEK

Sinibak ang hepe ng PNP Custodial Unit matapos ang pangho-hostage kay Senador Leila De Lima.

Ayon kay PNP Chief General Rodolfo Azurin, Jr., gusto nilang malaman ang mga naging lapses sa pagpapatupad ng seguridad sa Custodial Center.

Tuluy tuloy na rin naman aniya ang imbestigasyon ng PNP-CIDG at forensic teams sa nasabing insidente.

Inihayag ni Azurin na inilipat nila kaagad si De Lima sa pnp General Hospital para makapagpahinga ito  habang inaayos ang pasilidad nito.

Naghahanap na rin aniya sila ng pasilidad sa Custodial Center kung saan uubrang ilipat si De Lima.

Muling tiniyak ni Azurin na walang sinumang masasaktan na papasok sa Custodial Center kaya’t ipinag utos niya ang physical security check at pag review sa mga panuntunan hinggil dito

Hinimok ni Executive Secretary Lucas Bersamin ang lahat ng mga kawani ng Malakanyang na maging totoo at tapat sa kanilang sinumpaang tungkulin.

Ito ang inihayag ni Bersamin sa kauna-unahang flag raising ceremony na dinaluhan nito ngayong umaga kasama ang iba pang matataas na opisyal ng palasyo.

Ayon kay Bersamin, mawawalan nang saysay ang public servant kung wala itong sinseridad at dedikasyon sa tungkulin.

Aniya, dapat sundin ng mga kawani ng gobyerno ang Rule of Law sa bawat aksyong kanilang gagawin.

Sinabi ni Bersamin na laging itatak sa kanilang mga isip na sila ay nagsisilbi para maging patas at sumusunod sa batas.

Nagpositibo si Department of the Interior and Local Government (DILG) Secretary Benhur Abalos sa COVID-19.

Ito’y matapos sumailalim sa pagsusuri kagabi.

Nakatakda sanang dumalo si Abalos sa LEDAC meeting sa Malakanyang ngunit nang matanggap nito ang resulta dakong alas-9:00 kagabi na positibo ito sa nasabing virus.

Sa ngayon, inaantabayanan na lamang nito kung ilang araw siya isasailalim sa quarantine sa kanilang tahanan.

Samantala, makikipag-ugnayan naman si Abalos kay DOH Officer-In-Charge Maria Rosario Vergeire para malaman kung ilang araw ito mananatili para mag quarantine.

Tiniyak naman ni Abalos na tuloy pa rin ang kanyang trabaho kahit nakasailalim sa quarantine.

Ginamit ng mga bilanggong nang hostage kay Senador Leila De Lima ang oras ng kanilang pagpapahangin at pagpapaaraw para sa tangkang pagtakas.

Ayon ito kay PNP Spokesperson Col Jean Fajardo kaya’t dapat nilang busisiin ang pinaiiral na security protocols partikular sa PNP Custodial Center.

Sinabi sa DWIZ ni Fajardo na gumagawa na rin sila ng mga paraan para hindi na maulit ang nasabing insidente.

Ginalugad ng mga tauhan ng Manila Police District (MPD) – Sta. Ana Police Station ang Manila South Cemetery bilang paghahanda sa Undas 2022.

Kabilang sa tinipon ng MPD ang mga lalaking residente sa sementeryo para malaman ang pagkakakilanlan at matukoy kung may warrant of arrest ang mga ito.

Ayon kay MPD – Station 6 Commander, Lt. Col. Orlando Mirando Junior, isa sa mga residente ay natuklasan nilang may warrant of arrest habang may isa pang naaktuhan na gumagamit na iligal na droga.

Kabilang ang South Cemetery sa mga sementeryong dinaragsa sa Metro Manila ng tuwing Undas. —sa panulat ni Jenn Patrolla

Nakatakda nang i-convene mamaya ni Pangulong Bongbong Marcos ang unang Legislative-Executive Development Advisory Council (LEDAC) sa ilalim ng kanyang administrasyon.

Ito’y upang mapabilis ang pagsasabatas ng priority measures, kabilang ang mga panukalang batas na binanggit ng pangulo sa kanyang unang State of the Nation Address noong July 25.

Ayon sa Malakanyang, kabilang sa priority measures na inaasahang tatalakayin sa LEDAC ang National Government Rightsizing Program; Budget Modernization Bill;

Government Financial Institutions Unified Initiatives to Distressed Enterprises for Economic Recovery at Unified System of Separation, Retirement and Pension.

Kabilang naman sa economic bills na inaasahan ding tatalakayin ang E-Governance Act; National Land Use Act; Tax Package 3: Valuation Reform Bill; Passive Income and Financial Intermediary Taxation Act at Internet Transaction Act o E-Commerce Law.

Idinagdag pa ng palasyo na sa aspeto naman ng national security, pag-uusapin din sa LEDAC ang National Defense Act; Mandatory Reserve Officers’ Training Corps and National Service Training Program;

Pagtatatag ng Medical Reserve Corps, National Disease Prevention Management Authority, Virology Institute of the Philippines at Department of Water Resources;

Pagpapatupad ng enabling law para sa natural gas industry; amendments sa Republic Act 9136 o Electric Power Industry Reform Act (EPIRA) at amendments sa Build-Operate-Transfer Law maging ang posibleng amendments sa RA 11525 o COVID-19 Vaccination Program Act.

Dapat direktang tugunan ni Pangulong Bongbong Marcos ang mga issue sa food at energy inflation.

Ito ang panawagan ng Trade Union Congress of the Philippines (TUCP) sa unang 100 araw sa pwesto ni Pangulong Marcos.

Ayon kay TUCP Vice President Luis Corral, maituturing na “perfect storm” ang nagbabadya sa ekonomiya ng bansa, sa gitna nang kinakaharap na problema sa pagkain, tumataas na presyo ng enerhiya, maging ang unemployment at underemployment rates.

Dapat anyang mag-doble o triple-kayod ang pamahalaan at maglatag ng agarang mga solusyon sa lalong madaling panahon.

Kabilang sa mga tinukoy ng TUCP na dapat kumayod nang husto ang Department of Trade and Industry (DTI), National Economic Development Authority (NEDA) at Department of Finance (DOF).

Hinimok naman ni Corral ang mga nasabing ahensya na magbigay ng financial at technical assistance sa medium and small-scale enterprises, dahil 63% ng workforce ng bansa ay kabilang sa nabanggit na sektor.

Samantala, ipinanawagan din ng TUCP kay PBBM na magtalaga na ng “full-time secretary ng agriculture”.

Sinimulan na ng Commission on Human Rights (CHR) ang motu proprio investigation nito sa paghostage kay dating Senador Leila De Lima at pagkakapatay sa tatlong hostage taker na nagtangkang tumakas sa Camp Crame.

Ayon sa CHR, layunin ng imbestigasyon na matukoy ang katotohanan at sino ang mga dapat managot.

Nangangamba rin ang komisyon para sa kaligtasan ni De Lima, na nagsilbing chairperson nito noong 2008 hanggang 2010.

Naganap ang insidente kahapon habang naghahatid ng pagkain ang duty personnel na si Corporal Roger Agustin sa mga persons under police custody sa maximum security compound.

Pinagsasaksak si Agustin ng mga hostage-taker gamit ang improvised na kutsilyo subalit nakaligtas at sa gitna ng komosyon ay hinostage ng isa sa mga bilanggo si De Lima.

Gayunman, nakaligtas ang dating mambabatas habang napatay ng mga pulis ang tatlo na napag-alamang pawang miyembro ng teroristang grupong Abu Sayyaf.

Nasa ligtas nang kondisyon ang 74 anyos na tigawalis o street sweeper na sinagasaan ng SUV sa Barangay BF Homes, Parañaque City noong September 24.

Magugunitang dalawang beses nag-agaw-buhay si Doreen Bacus nang isugod sa ospital dahil sa tinamong pinsala sa dibdib at iba’t ibang bahagi ng katawan.

Bagaman naaresto ang suspek at Mitsubishi Pajero driver na si Raymond Zaparain, nakalaya ito matapos magpiyansa.

Kamakailan naman ay inoperahan ang biktimang senior citizen dahil sa natamo nitong pinsala sa ulo, natanggal na kaliwang tainga, natapyas na kanang pisngi at nabaling dalawang daliri sa kaliwang kamay.

Makaraan ang ilang araw ay nakarekober at tuluyan nang nailayo sa kapamahakan ang biktimang empleyado ng City Environment and Natural Resources Office.

Samantala, nagpaabot na rin ng tulong si Parañaque City Mayor Edwin Olivarez Kay Bacus.

Kinumpirma ng National Capital Region Police Office (NCRPO) na itinaas na sa P6.5 milyon ang alok nitong reward money  para sa sinumang makapagbibigay ng impormasyon ukol sa ‘person of interest’ sa kasong pagpatay sa brodkaster na si Percy Lapid.

Naglabas din ng iba pang mga larawan ang NCRPO ng isa mga hinihinalang suspek sa krimen.

Matatandang inihatid na sa kanyang huling hantungan kahapon si Lapid, Percival Mabasa sa tunay na buhay, kahit hindi pa nareresolba ang kaso.

Si Lapid ay nasawi matapos tambangan sa Las Piñas City noong Lunes ng gabi.