HOT STORIES OF THE WEEK

Hahanapan ng Manila Police District (MPD) ng pansamantalang malilipatan ang mga informal settler na nasa loob ng Manila North Cemetery.

Sinabi ni MPD Director Police Brigadier General Andre Dizon na ito’y bilang bahagi ng ginagawa nilang paghahanda sa nalalapit na Undas 2022.

Maliban dito, pinaalalahanan din ni Dizon ang mga nagbabantay at nakatira sa loob ng nabanggit na sementeryo na huwag maging pasaway at sumunod sa inilalabas na abiso ng awtoridad.

Samantala, nasa halos 1,000 pulis ang idineploy ng ahensya, ilang linggo bago ang Undas.

Nagbabala ang Asosasyon ng Panaderong Pilipino (APP) sa tuluyang pagsasara ng mga community bakery sa gitna ng nagtataasang presyo ng mga sangkap sa paggawa ng tinapay.

Sa katunayan, sinabi ni APP President Chito Chavez na marami nang maliliit na panaderya ang nagsara dahil sa pagkalugi.

Aniya, ito na ang pinakamatindi at pinakamahabang krisis sa industriya ng tinapay dahil sa pandemya, pagtaas ng presyo ng sangkap ng tinapay, paghina ng piso kontra dolyar at ang giyera sa pagitan ng Russia at Ukraine.

Giit pa ni Chavez, suportado nila ang layunin ng malalaking bakery at ng Department of Trade and Industry (DTI) na makapag-alok ng murang tinapay sa Pilipino, pero dahil aniya rito ay hindi makapagpatupad ng maayos na taas-presyo ang mga maliliit na panaderya.

Apektado rin ng murang Pinoy tasty at Pinoy pandesal ang kabuhayan ng nasabing panaderya.

Samantala, sinabi ni Chavez na nahihirapan silang magtaas ng presyo dahil karaniwang customer nila ay mga mamamayan na maliit lang din ang kinikita.

Inihayag ng isang grupo na nahihirapan ang ilang operators na kumuha ng bagong fare matrix online na kailangan upang makapaningil ng taas-pasahe.

Ayon kay National President Mody Flora ng pinagkaisang Samahan ng mga Tsuper at Operators Nationwide (PISTON), ito ay dahil hindi aniya sanay ang mga operator sa online na proseso nito.

Giit niya na kung maaari sana ay kada asosasyon na lamang ang aplikasyon ng fare matrix para mapadali ang pagkuha ng kopya nito.

Batay sa datos ng Land Transportation Franchising and Regulatory Board (LTFRB), nasa 4,000 o 10% pa lang ang nakakakuha ng naturang matrix.

Winelcome ng Cybercrime Investigation and Coordinating Center (CICC) ang Sim Card Registration Act na nilagdaan ng Pangulong Ferdinand Marcos, Jr.

Sinabi ng CICC na malaking tulong ang nasabing batas para mabilis na matukoy ang mga hacker at scammer at magbibigay din ng proteksyon sa responsible users.

Una nang tiniyak ng National Privacy Commission ang paggalang sa karapatan ng mga datos na kinakailangan ang malawakang pagkuha ng personal data na iwas security risks at data breaches.

Kasabay nito, tiniyak ng telcos na tutulong sila sa gobyerno sa pagbuo ng implementing rules and regulations (IRR) sa nasabing batas na dagdag ngipin laban sa cyber threats at iba pang krimen gamit ang mobile phones.

Bahagya na namang humina ang performance ng piso kontra dolyar.

Nagsara kahapon ang palitan sa P58.99 halos P59 na kada dolyar.

Ganito rin ang naitala na halaga ng palitan noong Lunes, October 3.

Ang paghina ng halaga ng piso ay bunsod ng pagtaas ng interest rates ng US Federal Reserve kontra inflation. —sa panulat ni Jenn Patrolla

Tiniyak ni House Speaker Martin Romualdez ang agarang pagpasa sa 30 panukalang batas na inirekomenda ng Legislative Executive Development Advisory Council (LEDAC).

Ayon kay Romualdez, mayroong mekanismo para mapabilis ang proseso ng pag-apruba na nakasaad sa Rule 10, Section 48 ng House Rules of Procedure kung saan mapabibilis ang pag-endorso ng alinmang komite ng anumang sakop na panukalang batas.

Sa 30 priority measures ay 20 ang nabanggit ni Pangulong Bongbong Marcos sa kanyang State of the Nation Address (SONA). —sa panulat ni Jenn Patrolla

Pinag-aaralan ng Office of the Press Secretary (OPS) ang akredistasyon ng mga vloggers na nagnanais na mag-cover sa Malakanyang.

Ito ang tugon ni Press Secretary OIC Cheloy Garafil sa tanong ni Senador JV Ejercito kung itutuloy ang planong akreditasyon sa mga vloggers.

Ayon kay Garafil, naumpisahan na noong huling administrasyon ang posibleng accreditation at nagpapatuloy ang pag-aaral dito.

Hihingin din anya nila ang rekomendasyon ng ibang sektor kaugnay sa nasabing hakbang.

Sinusuri rin ng pamahalaan kung isasama sa mga regular member ng Malacañang Press Corps ang mga vlogger o magkakaroon ng ibang events para sa kanila. —sa panulat ni Jenn Patrolla

Isa nang ganap na bagyo ang Low Pressure Area (LPA) na namataan sa loob ng Philippine Area of Responsibility (PAR) at patuloy na binabantayan ng PAGASA Weather Bureau.

Huling namataan ang Tropical Depression “Maymay” alas-5 kaninang umaga sa layong 300 kilometers silangang bahagi ng Casiguran, Aurora na may lakas ng hanging aabot sa 45 kilometers per hour at pagbugsong aabot naman sa 55 kilometers per hour.

Kumikilos ang bagyo patungong timog-kanluran sa bilis na 10 kilometers per hour at posibleng magtungo pahilaga-hilagang-kanluran ng Philippine Sea sa susunod na 12-oras.

Nakataas ang Signal no. 1 sa Isabela, Quirino, Nueva Vizcaya, Aurora, Nueva Ecija, at Extreme Northern portion ng Quezon kabilang na ang General Nakar, at Infanta kasama na ang Pollilo Islands.

Asahan naman ang pag-ulan sa hilagang bahagi ng Luzon kabilang na ang Cagayan, Isabela, Apayao Batanes, Ilocos Norte, Aurora, at Kalinga.

Samantala, binabantayan naman ng PAGASA ang isa pang LPA na namataan sa labas ng Philippine Area of Responsiility (PAR) kung saan, sakaling pumasok ito ng bansa ay posible itong tawaging bagyong Neneng.

Patuloy namang nagpapaalala sa publiko ang PAGASA na panatilihin ang pagdala ng payong at iba pang panangga sa biglaang pagbuhos ng ulan at matinding sikat ng araw.

Nailibing na ang tatlong Abu Sayyaf detainees na nagtangkang tumakas mula sa PNP-Custodial Center sa Kampo Crame.

Dinala ang mga labi nina Idang Susukan, Feliciano Sulayao Jr., at Ariel Cabintoy sa Blue Mosque and Cultural Center sa Maharlika Village, Taguig City upang ihimlay alinsunod sa tradisyon ng Islam.

Ayon sa National Commission on Muslim Filipinos (NCMF-NCR), pawang Balik Islam ang tatlong ASG member.

Una nang hiniling ni PNP chaplain, Pastoral Outreach Division chief, Col. Zainalabiden Ismael ang tulong ni NCMF-NCR Regional Director Adzhar Albani upang mailibing ang mga nasabing bilanggo sa Taguig.

Nahaharap ang tatlo sa patung-patong na kaso ng Murder, Kidnapping, Arson at Illegal Firearms Possession sa Mindanao, partikular sa Sulu at Zamboanga del Norte.

Sina Susukan at Cabintoy ang unang pinagbabaril matapos pagsasaksakin ang isang pulis na maghahatid ng almusal sa loob ng Custodial Center noong linggo napatay si Sulayao makaraang i-hostage si dating Senador Leila De Lima.