HOT STORIES OF THE WEEK

Nakikipagtulungan na ang Department of Agriculture (DA) sa mga tanggapan ng Sugar Regulatory Administration (SRA) maging sa  Kadiwa Rolling Stores at Kadiwa On Wheels para sa pagbebenta ng mababang presyo sa kada kilo ng asukal.

Ayon sa DA, layunin nitong mas maging accessible ang mas murang halaga ng asukal na nagkakahalaga lang ng P70 hanggang P80 kada kilo na mas magpa-pagaan para sa mga consumer dahil ang presyo ngayon ng asukal sa mga pamilihan ay naglalaro sa P90 hanggang P100 kada kilo.

Samantala, sa naging pahayag naman ng SRA, ang naturang inisyatibo ay pansamantalang solusyon habang hinihintay pa na mag-operate full swing ang mga sugar mill sa bansa.

Sakop ng SRA clearance ang 13 international sugar traders na may kabuuang volume na mahigit 33,772 metric tons ng refined sugar na tutugon din para mapababa ang presyo ng asukal sa ilang groceries at supermarkets.

Patuloy na lumalayo ng ating bansa si Bagyong Neneng na huling namataan sa layong 495 kilometers kanlurang bahagi ng Laoag City, Ilocos Norte.

Ayon kay PAGASA weather specialist Grace Castañeda, asahan ang mga pag-ulan sa Southern Luzon, Visayas, at Mindanao bunsod ng hangin na nagmumula sa timog kanluran ng bansa kaya’t asahan ang mga kalat-kalat na pag-ulan, pagkulog at pagkidlat partikular na sa buong bahagi ng Visayas, Northern Mindanao, Zamboanga Peninsula, Basilan, Sulu, at Tawi-Tawi.

Makararanas din ng mga pag-ulan sa lalawigan ng Palawan, at Occidental Mindoro, kaya’t paalala sa ating mga kababayan na panatilihing maging alerto sa biglaang pagbuhos ng ulan, pagbaha at pagguho ng lupa.

Wala namang binabantayang sama ng panahon ang PAGASA at malayang makakapalaot ang mga kababayan nating mangingisda at maliliit na sasakyang pandagat

Agwat ng temperatura sa Metro Manila ay maglalaro sa 26°C hanggang 33°C habang sisikat naman ang haring araw mamayang 5:47 ng umaga at lulubog naman ito mamayang 5:34 ng hapon.

Pinagkalooban ng puwesto ni Pangulong Ferdinand “Bongbong” Marcos Jr. si movie director Paul Soriano.
Ayon kay Office of the Press Secretary (OPS) Officer-in-Charge Usec. Cheloy Garafil, maglilingkod si Soriano sa Office of the President (OP) bilang Presidential Adviser on Creative Communications.

Si Soriano ay mister ng aktres na si Toni Gonzaga.
Nakatakda namang manumpa si Soriano sa harap ng Presidente ngayong araw.
Nakilala si Soriano dahil sa mga idinirehe nitong pelikula tulad ng A Journey Home (2009), Thelma (2011), Kid Kulafu (2015), at Dukot (2016).

Nasungkit naman niya ang Best Director at Best Screenplay sa 2012 FAP Awards para sa pelikulang “Thelma.”
Noong taon ding iyon, naisukbit naman ng “Thelma” ang Digital Movie of the Year, gayundin ang Digital Movie Director of the Year at Digital Movie Original Screenplay of the Year kasama si Froilan Medina, sa 28th PMPC Star Awards for Movies.

Nanawagan ng dayalogo ang Kapisanan ng mga Broadkaster ng Pilipinas (KBP) sa Philippine National Police (PNP) kaugnay sa kontrobersyal na pagbisita ng mga pulis sa bahay ng ilang miyembro ng media.

Sinabi ni KBP president Herman Basbaño na alanganin ang ginawang pagbisita ng mga Pulis sa bahay ng ilang taga-media dahil hindi naman sigurado kung tauhan ito ng ahensya.

Kaya aniya, dapat na mapag-usapan ito upang makabuo ng mekanismo para sa proteksyon ng media.

Iminungkahi din ni Basbaño dapat idaan na lamang ng PNP ang pakikipag-ugnayan sa media entity, opisina o organisasyon ukol sa nasabing usapin.

Pero kung may threat o banta aniya’y dapat itong i-direkta sa miyembro ng media.

Nabatid na humingi ng dispensa si Eastern Police District acting Director Col. Wilson Asueta sa kawani ng media na residente ng Marikina City na unang binisita ng PNP.

Paglilinaw ni Asueta nais lamang nilang masiguro ang kaligtasan ng media matapos ang pagpaslang sa broadcaster na si Percival Mabasa.

Samantala, sinabi ni PNP spokesperson Col. Jean Fajardo na ipinatigil na nila ang pagbisita ng mga Pulis sa bahay ng mga taga-media.

Muling tiniyak ng gobyerno ang pag-abot sa ligtas, masustansya at abot-kayang presyo ng pagkain sa ilalim ng Marcos administration.

Kasabay na rin ito, ayon sa Office of The Press (OPS) secretary  nang pakikiisa ng bansa sa buong mundo sa pagdiriwang n World Food Day sa gitna ng mga hamon sa global food security.

Magugunitang isinulong ng Pangulong Ferdinand Marcos Jr. ang pagtutok sa food security sa kanyang talumpati sa 77th United Nations General Assembly.

Dahil dito, hinimok ng OPS ang publiko na sama-samang suportahan ang mga magsasaka at mangingisda gayundin ang kalikasan na pinagmumulan ng pagkain.

Ang World Food Day ay ginugunita tuwing October 16 kung kailan din itinatag ang United Nations Food and Agriculture Organization.

Planong iapela ng grupo ng transportasyon ang dagdag-singil sa pasahe tuwing rush hour, matapos ang muling taas-singil sa presyo ng produktong petrolyo na ipatutupad bukas.

Ayon sa grupo ng PASANG MASDA, hihiling sila sa pamahalaan ng surge fee sa gitna ng inaasahang panibagong singil sa presyo ng langis.

Umaasa ang grupo na papayagan sila ng pamahalaan na makapaningil ng pisong dagdag-singil sa pamasahe tuwing rush hour.

Bukod kasi sa mataas na presyo ng langis, hindi pa rin makapaningil ang ibang mga tsuper dahil sa panibagong fare matrix ng Land Transportation Franchising and Regulatory Board (LTFRB) kung saan, hindi sila maaaring mag-dagdag singil ng pasahe hangga’t wala pang panibagong taripa.

Sa pahayag ng mga tsuper, sinabi nila na nahihirapan silang makabawi sa kanilang kita dahil nakakain umano ang kanilang oras tuwing alas-7 ng umaga hanggang alas-8 ng umaga at alas-5 ng hapon hanggang alas-6 ng gabi.

Samantala, iginiit naman ng grupo na kung papayagan ang kanilang hiling, hindi na sila aapela ng panibagong petisyon sa LTFRB.

Muli na namang tataas ang presyo ng produktong petrolyo sa martes.

Batay sa pagtaya ng ilang oil companies, aabot sa P2.70 centavos hanggang P3.00 ang dagdag sa presyo ng kada litro ng diesel at kerosene.

Maglalaro naman sa P.80 centavos hanggang P1.10 centavos ang posibleng umento sa kada litro ng gasolina.

Una nang sinabi ng Department of Energy na ang pagtaas ng presyo ng langis ay dahil sa pasya ng Organization of Petroleum Exporting Countries (OPEC) na magbawas ng 2 million barrels kada araw sa produksyon ng langis.

Nakatakdang ianunsyo ngayong araw ng mga kumpanya ng langis ang panibagong oil price adjustment na magiging epektibo simula bukas, October 18.

Nilinaw ng Department of Agriculture o da na hindi pa maaaring mag-angkat ng puting sibuyas ang Pilipinas.

Kasunod ito ng panawagan ng ilang grupo na payagang makapasok ang white onion products sa bansa para maiwasan ang kakulangan ng suplay nito sa mga pamilihan.

Ayon kay DA Undersecretary Kristine Evangelista, walang ibinibigay na import permit ang gobyerno para sa naturang produkto upang masiguro na walang maipupuslit na sibuyas sa bansa.

Sinabi ni Evangelista, na layunin ng ahensya na walang nakaimbak na sibuyas sa mga cold storage at maiwasan ang tone-toneladang onion products na nahaharang ng mga otoridad sa mga terminal at pantalan.

Nagbabala ang National Power Corporation (NAPOCOR) sa pagkawala ng kuryente kung hindi tataas ang budget nito para sa susunod na taon.

Ayon kay Jenalyn Tinonas, Financial Planning, Budget, at Program Review division ng NAPOCOR, imunukanghi sa Senado na posibleng magkaroon ng shutdown ang 278 existing plants sa katapusan ng Hulyo 2023 dahil ang budget para sa diesel fuel ay sasakupin lamang ang buwan ng Enero hanggang Hulyo 2023.

Nasa 1.3 milyong kabahayan ang maapektuhan kung magkaroon ng outage bilang resulta ng pagsasara ng mga power plant. —sa panulat ni Jenn Patrolla

Pinaplano ng administrasyong Marcos na palawigin pa hanggang sa susunod na taon ang mababang taripa na ipinapatong sa mga pangunahing produkto sa bansa tulad ng baboy, mais, bigas at uling.

Ito ang sinabi ni Finance Secretary Benjamin Diokno kasabay ng paraang ginagawa ng gobyerno upang mapigilan ang pagbilis ng inflation o bilis ng pataas ng presyo ng pagkain o mga pangunahing bilihin.

Ayon kay Diokno, noong nakaraang cabinet meeting ay isang comprehensive set of measures kabilang ang extension ng Executive Order 171 ang iniharap ng Department of Finance, na may kasama pang input ng buong gabinete.

Dahil dito, umaasa silang papatnubayan ito ng Pangulo na isasalin sa mga EO, circular at administrative order sa lalong madaling panahon.

Noong Mayo nang inilabas ni Pangulong Marcos ang EO 171, na layong palawigin ang mababang buwis na ipinapatong sa mga pangunahing produkto hanggang sa katapusan ng 2022.