HOT STORIES OF THE WEEK

Isa nang ganap na bagyo ang Low Pressure Area (LPA) na nasa Philippine Sea sa loob ng Philippine Area of Responsibility (PAR).

Sa panayam ng DWIZ, sinabi ni PAGASA weather specialist Aldczar Aurelio, na si Bagyong Obet ay namataan sa layong 1,055 kilometers silangang bahagi ng extreme northern Luzon.

Si bagyong Obet ay may lakas ng hanging aabot sa 45 kilometers per hour na may lakas ng hanging aabot sa 55 kilometers per hour.

Kumikilos ito patungong north-north-westward sa bilis na 10 kilometers per hour kung saan, apektado ng mga pag-ulan ang bahagi ng Babuyan Islands, Ilocos Norte, Apayao, at ang northern portion ng Mainland Cagayan.

Asahan din ang mga pag-ulan sa bahagi ng Batanes, northern portion ng Ilocos Sur, Abra, Kalinga, nalalabing bahagi ng mainland Cagayan.

Samantala, nakataas parin ang gale warning signal ng PAGASA partikular na sa Batanes, Cagayan kabilang na ang Babuyan Islands, Ilocos Norte, Illocos Sur, La Union, at Pangasinan kaya’t hindi muna pinapayagang pumalaot ang mga kababayan nating mangingisda maging ang maliliit na sasakyang pandagat.

Humiling ang kapatid ng pinaslang na broadcaster na si Percival “Percy Lapid” Mabasa na magkaroon ng crime scene walkthrough sa confessed gunman na si Joel Escorial.

Ayon sa beteranong mamamahayag na si Roy Mabasa, nais niyang makipagkita kay Escorial upang masubukan ang kredibilidad nito para maalis ang kanilang agam-agam.

Magugunitang itinuro ng suspek ang tatlo pang kasabwat sa krimen na si Edmon at Israel Dimaculangan at isang alyas “Orlando”.

Aminado si Roy na nais nilang isalaysay ni Escorial kung paano isinagawwa ang karumal-dumal na krimen.

Bagama’t nagpapasalamat ang nakababatang Mabasa sa mga pulis na nakabantay sa labas ng bahay ng kanyang kapatid upang protektahan ang kanilang pamilya, iginiit niya ang mas mahigpit na seguridad.

Ito’y dahil hindi pa anya nahuhuli ang mastermind at iba pang suspek sa pagpatay sa kanyang kuya.

Kinuwestyun ni Senate Agriculture and Food Committee chairperson Cynthia Villar ang P15.4 billion na inilaan ng Department of Agriculture para sa importasyon ng chemical fertilizer habang P1 billion lamang para sa composting.

Sa gitna ng pagtalakay sa panukalang budget ng kagawaran para sa taong 2023 na P163.8 billion, aminado si Villar na nagtataka siya kung anong mayroon sa importation bakit lagi itong gustong gawin ng D.A. na tinatawag na niyang Department of Importation.

Dapat tinuturuan anya ang mga magsasaka na mag-composting kung saan sila na mismo ang gagawa ng pataba pero ayaw turuan ng D.A. sa halip ay nag-i-import lagi ng chemical fertilizer na nagreresulta sa degradation o paghina ng kalidad ng lupa sa matagal na paggamit.

Iginiit ng Senador na kahit sa hybrid seedlings, nais ng kagawaran na mag-import nito kahit mas malaki ang gastos at kakaunting magsasaka ang makikinabang dahil mahal ang farm inputs na kailangan dito.

Mas dapat umanong pagtuunan ang inbred seeds o locally produced na punla ng palay para ang lokal at mas maraming magsasaka ang makikinabang.

Ipinunto ng mambabatas na mas dapat tulungan ang local farmers para lumaki naman ang kanilang kita at maging middle class o lower middle class. —ulat mula kay Cely Ortega Bueno (Patrol 19)

Posibleng sumipa hanggang 18,000 ang daily Covid-19 cases pagsapit ng Nobyembre a – 15.

Ito, ayon kay DOH officer-in-charge Maria Rosario Vergeire, ay batay sa October 11 projection, kung saan hindi pa kasama ang pagkakadiskubre sa Omicron XBB subvariant at XBC variant.

Pinaka-mababa na anyang maitatala kada araw ay 2,400 pero kung darami ang susuway sa minimum public health standards, ay maaaring humantong sa 18,000 cases per day pagsapit ng November 15.

Sa kabila nito, ipinunto ni vergeire na “manageable” ang Covid-19 situation sa bansa dahil matagal nang nakapaghanda ang gobyerno.

Idinagdag ni Vergeire na sa susunod na taon naman ay inaasahan nilang mayroon pa ring mga kaso pero umaasang hindi na darami ang mga ma-o-ospital dahil patuloy ang pagbabakuna.

Hanggang nitong October 17, mahigit 73.4 million individuals na ang fully vaccinated laban sa Covid-19, kabilang ang nasa 20.3 million na nakatanggap ng first booster dose at 3.2 million na tinurukan ng second booster.

Hawak na ng pulisya ang gunman sa pamamaslang sa brodkaster na si Percy Lapid matapos sumuko sa awtoridad kahapon.

Sa ginanap na press briefing ni DILG Sec. Benhur Abalos, iprinisenta nito sa media kung saan kinilala itong si Joel Estorial, 39 na taong gulang na taga-Quezon City.

Sinalaysay ni Estorial ang dahilan ng kanyang kusang pagsuko sa otoridad at ang ilang impormasyon sa nag-utos sa kanya upang patayin si Lapid.

Ayon ka Estorial, hindi niya intensyon ang pamamaslang sa brodkaster at iniutos lamang ito ng isang nagngangalang Orly na taga Batangas.

Habang ang kumontrata naman aniya sa kanila ay mula sa Bilibid kapalit ng 550,000 pesos na pinaghatian nilang anim kung saan 140,000 pesos ang kanyang nakuhang parte.

Kusang loob din aniya siyang sumuko dahil  nakokonsensya na ito sa ginawang pamamaslang at humingi ng tawad sa pamilya ni Lapid.

Samantala, kasalukuyan pang pinaghahanap ng mga pulis ang mga kasabwat ni Estorial kabilang na dito ang dalawang magkapatid na sina Edmun at Israel Dimaculangan.

Habang hindi muna pinayagan ng mga otoridad na magtanong ang media sa nasabing suspek habang umuusad pa anila ang naturang imbestigasyon. —sa ulat ni Tina Nolasco (Patrol 11)

Idineklara na ni Pangulong Ferdinand “Bongbong” Marcos Jr. ang October 31 ngayong taon bilang special non-working holiday.

Ito ang inanunsyo ni Office of the Press Secretary Officer In Charge Undersecretary Cheloy Garafil sa press briefing ng Malakanyang kanina, matapos aniyang lagdaan ng pangulo ang isang proklamasyon na may kinalaman dito.

Ayon kay Garafil, ginawa ang nasabing hakbang upang mabigyan ng mahaba-habang panahon ang ating mga kababayan na gunitain ang panahon ng Undas.

Dahil ang October 31 ay Lunes, magiging long weekend ang bago magkatapusan ng buwan o mula Sabado, October 29 hanggang sa November 1, All Saints Day, araw ng Martes.

Bunga nito, sinabi ni Garafil na magkakaroon ng sapat na panahon ang ating mga kababayan para makauwi sa kani-kanilang mga probinsya para dalawin ang mga namayapa nilang mga mahal sa buhay. —sa ulat ni Gilbert Perdez (Patrol 13)

Nakiusap ang Department of Agriculture sa importers na ibenta sa gobyerno sa 70 pesos kada kilo ang alokasyon nila sa importasyon ng asukal.

Sinabi ng DA na magkakaroon ng sapat na supply ng asukal sa abot-kayang halaga kung maibebenta sa kanila ang 10% ng imported sugar allocation ng kada importer, base na rin sa sugar importation policy para sa crop year 2022-2023.

Una nang nagsanib-puwersa ang DA at Sugar Regulatory Administration (SRA) para maibenta sa merkado ang nakapakong 70 pesos kada kilo na halaga ng asukal.

Epektibo na ngayong araw ang panibagong dagdag-presyo sa produktong petrolyo.

Dakong alas-12:01 ng madaling araw nang ipatupad ng Caltex ang P.80 centavos na taas presyo sa kada litro ng gasolina,  P2.70 centavos naman sa kada litro ng diesel at P2.90 centavos sa kada litro ng kerosene.

Kaninang ala-6 ng umaga naman ng ipatupad din ng Shell at Seaoil ang kaparehong price adjustment habang ganap na alas-4:01 ng hapon naman magpapatupad ng umento sa produktong petrolyo ang Cleanfuel.

Sinabi ng Department of Energy na ang pagsirit ng presyo ng petrolyo ay dahil sa pagbabawas sa produksiyon ng langis ng OPEC plus  at pagpaparami ng imbentaryo ng langis ng Estados Unidos.

Nasabat ng Bureau of Customs – Manila International Container Port (BOC-MICP) ang 228 million pesos na halaga ng mga ipinuslit na asukal mula sa Thailand.

Ayon sa BOC, naglalaman ng 1,906 metrikong tonelada ng cane refined sugar ang 76 containers.

Kaugnay nito, hiniling ng MICP Customs Intelligence and Investigation Service (CIIS) ang pagpapalabas ng alert order laban sa kargamento dahil hindi ito sakop ng import clearance mula sa Sugar Regulatory Administration (SRA).

Dahil dito, binigyan ng warrant of seizure and detention ang mga nasabing kargamento. —sa panulat ni Jenn Patrolla

Sisimulan na sa November 2 ang limang araw na face-to-face classes sa mga pampublikong paaralan sa bansa.

Kasunod ito ng pag-apruba ng Department of Education (DepED) sa hinggil sa pagpapatupad ng in-person classes maging sa distance at blended learning.

Sa inilabas na department order kahapon, sinabi ni Vice President at Education secretary Sara Duterte-Carpio, na sa ilalim ng blended learning scheme, ang mga pribadong paaralan ay maaari nang magsagawa ng tatlong araw na face-to-face classes at dalawang araw na distance learning o kaya ay apat na araw na in-person classes at isang araw na distance learning.

Ang mga pampublikong paaralan naman, ay obligadong bumalik sa limang araw na face-to-face classes.

Layunin ng DepEd na maibalik ang traditional classroom set up upang matugunan ang learning losses ng mga mag-aaral dulot ng pagsasara ng mga paaralan dahil narin sa Covid-19 pandemic.