HOT STORIES OF THE WEEK

Inihayag ng Department of Trade and Industry (DTI) na humihirit ang ilang manufacturers ng taas-presyo sa sardinas, kape at gatas sa Pilipinas.

Ito’y bunsod ng patuloy na pagtaas sa presyo ng raw materials na ginagamit sa mga nabanggit na produkto.

Sinabi ni Department of Trade and Industry (DTI) Undersecretary Ruth Castelo na nasa P0.50 hanggang 20 pesos ang hinihiling na umento ng mga manufacturer.

Ngunit sinabi ni Castelo na hindi maaaring lumagpas sa 10% ang itataas sa presyo ng mga produkto sakaling aprubahan ito ng ahensya.

Nagsagawa ng pulong si Pangulong Ferdinand Bongbong Marcos Jr. sa mga kinatawan ng Private Sector Advisory Council (PSAC) sa Malakanyang kahapon.

Batay sa ulat ng Office of the Secretary, tinalakay sa naturang pagpupulong ang mga rekomendasyon para sa pagpapataas ng lokal na produksyon at suplay ng pagkain sa bansa.

Maliban dito, napag-usapan din ang mga istratehiya sa paggamit ng teknolohiya sa pagsasaka, pagsasaayos ng pondo at transportasyon ng mga produkto.

Kasama rin sa natalakay ay ang pagsusuri sa mga polisiya ng National Food Authority (NFA).

Inaasahan na magkakaroon ng rollback sa presyo ng produktong petrolyo sa susunod na linggo.

Ito’y matapos ang ilang linggong pagtaas ng presyong petrolyo sa bansa.

Posible naman na mas mababa sa piso ang bawas-presyo sa  kada litro ng oil products.

Samantala, maaaring ianunsiyo ng mga kompanya ng langis ang oil price rollback sa Lunes o kinabukasan kung kailan ito ipatutupad.

Ilang linggo matapos mag-resign si dating Commission on Audit Chairman Jose Calida, itinalaga ni Pangulong Ferdinand Marcos Jr. si National Telecommunications Commission Commissioner Gamaliel Cordoba bilang ad interim chairman ng COA.

Sa isang pahinang appointment letter, ipinagkakatiwala ng Presidente kay Cordoba ang pamunuan ng state audit institution.

Nanumpa na rin si Cordoba sa harap ni Chief Justice Alexander Gesmundo bilang COA chief.

Kinumpirma rin sa DWIZ Patrol ni Supreme Court spokesperson Brian Hosaka ang panunumpa ni Cordoba.

Matatandaang naging kontrobersiyal si Cordoba matapos ipatupad ang ‘cease and desist order’ laban sa ABS-CBN na nagdulot ng tigil-operasyon ng radyo at telebisyon ng kompanya dahil sa pagkapaso ng prangkisa nito noong Mayo 2020.

Si Cordoba ay dati ring direktor ng Philippine Amusement and Gaming Corporation (PAGCOR) bago iniluklok ni dating Pangulong Gloria Macapagal-Arroyo bilang NTC commissioner noong 2009.

Pinahihigpitan ng Department of the Interior and Local Government (DILG) sa Philippine National Police (PNP) na higpitan ang security measures para sa kaligtasan ng gunman ng radio journalist na si Percy Lapid.

Kasunod pa rin ito ng biglaang pagkamatay ng middleman o contact ng gunman sa loob ng National Bilibid Prison.

Sinabi pa ni Abalos na dapat masiguro ang pagbabantay kay Joel Escorial dahil ito ang susi sa pagresolba sa Percy Lapid killing.

Una nang ipinabatid ng kalihim na dismayado ang ahensya sa sinapit ng middleman dahil nasayang ang lahat ng pinaghirapan ng PNP sa pag-iimbestiga sa kasong ito.

Blangko ang pamilya Mabasa sa susunod na hakbang matapos mapatay ang umano’y middleman sa pagpaslang kay broadcaster Percy Lapid.

Inamin ito sa DWIZ ni Roy Mabasa, kapatid ni Lapid at nalulungkot sila sa nangyari lalo’t malaki sana aniya ang maitutulong ni Crisanto Villamor sa kaso nang pagpatay sa kanyang kapatid.

Dahil sa nangyari, iginiit ni Mabasa ang pagpapanagot sa NBP kung saan maraming parehong kaso na rin ang naganap ng hindi nareresolba.

Pormal nang sinampahan ngayong araw ni Roy Mabasa ng kasong murder ang mga suspek na pumaslang sa kanyang kapatid na si Percival Mabasa o mas kilala bilang Percy Lapid.

Partikular na sinampahan ng kaso nito ang umano’y gunman na kusang sumuko sa otoridad at humarap sa media kahapon na si Joel Escorial at hindi Estorial taliwas sa unang apelyido ng suspek na naiulat.

Gayundin ang mga isinawalat na pangalan ng kasabwat ng suspek na si alyas Orly at magkapatid na Israel at Edmun Dimaculangan na sa ngayon ay pinaghahanap pa rin ng pulisya.

Nabatid na kagabi ipinakita kay Mabasa ng suspek ang isang lugar sa Las Piñas City kung saan isinagawa ang surveillance, o pagmamatyag bago ang nangyaring pagpatay sa nasabing brodkaster.

Tinatayang aabot sa mahigit P366 million pesos (P366,058,240.16) ang iniwang pinsala sa agrikultura ng Bagyong Neneng sa Regions 1, 2 at Cordillera Administrative Region (CAR) .

Ayon sa National Disaster Risk Reduction Management Council (NDRRMC), 19,167 ektarya ng pananim ang nasira ng bagyo habang 14,578 na magsasaka ang naapektuhan ng kalamidad.

Pinakanapuruhan ng bagyo ang Cagayan Valley, kung saan tinatayang aabot sa mahigit P354 million (P354,499,525.78.) ang danyos sa agrikultura.

Sumampa naman sa mahigit P81.5 million ang halaga ng pinsala sa imprastraktura sa mga nasabing rehiyon habang 166 na bahayang nasira.

Aabot naman sa 175,275 katao ang naapektuhan ng Bagyong Neneng habang dalawa ang napaulat na nasugatan at walang naitalang namatay o nawawala.

Iniulat din ng NDRRMC na aabot sa mahigit P15 million (P15,347,070.07) ang halaga ng assistance na naipagkaloob sa mga naapektuhang lugar.

Nilinaw ni Senator Jinggoy Estrada na wala siyang intensyon na ipa ban o’  ipagbawal sa bansa ang mga Korean telenovela

Ayon kay Estrada, dahil lang sa frustration sa humihinang telenovela at   movie industry    sa bansa kaya nya nabanggit nya sa hearing ng budget ng Film Development Council of the Phils o’ FDCP na minsan napapa isip siya na ipa ban ang Korean telenovela.

Giit ni Estrada, wala siyang anumang pagkontra sa Korean telenovelas sa katunayan marami anya tayong maaring matutunan sa mga pelikula at telenovela ng Korea.

Mahal daw nya ang sariling atin at nais lang  nya na maproteksyunan ang ating mga artista  na mahuhusay sa pag arte.

Ayon kay Estrada marami tayong magagaling na  director, writer, photographer at artista na kung masusuportahan ay kayang kaya nating  makipag kumpetensya internationally pagdating sa paggawa ng de kalidad na pelikula.

Para kay Estrada mahalaga na mabigyan ng suporta ng ating pamahalaan ang pelikulang Filipino na sa ngayon ay halos naghihingalo na.

Sinabi anya ni  FDCP chairman Tirso Cruz  III na nakita at naobserbahan nila nung  magtungo sa South Korea na hindi lang pribadong sektor maging  gobierno nila ay sumusuporta  sa mga korean movie at telenovela.

Dapat anyang ganun din ang gawin sa ating local movie industry para muli itong sumigla.

Pag-aaralan ng Land Transportation Franchising and Regulatory Board (LTFRB), ang inihaing petisyon ng ilang grupo ng transportasyon hinggil sa surge fee sa pamasahe ng mga jeep at bus tuwing rush hour o peak hours.

Nabatid na humihirit ang mga jeepney driver ng karagdagang piso habang dagdag na dalawang piso naman sa mga bus driver tuwing peak hours mula alas-5 ng umaga hanggang alas-8 ng umaga at alas-4 ng hapon hanggang alas-8 ng gabi bilang tugon sa muling pagtaas ng presyo ng langis.

Kasama sa mga grupong humihiling ng surge fee ang grupong PASANG MASDA, Alliance of Transport Operators and Drivers Association of the Philippines (ALTODAP) at Alliance of Concerned Transport Organization (ACTO).

Ayon sa LTFRB, naiintindihan nila ang hinanaing ng mga driver at operators dahil sa patuloy na pagtaas ng presyo ng krudo sa international market.

Bukod diyan, naiintindihan din ng ahensya ang panawagan ng mga komyuter dahil lalo lamang magpapahirap sa pang-araw araw nilang gastusin ang dagdag-singil sa pamasahe kasabay narin ng pagkakaroon ng epekto sa ekonomiya ng bansa.

Sa ngayon, patuloy pang hinihimay ng LTFRB ang mga petisyong inihain sa ahensya at iba pang mga polisiya para sa kapakanan ng mga driver, operators, at mga pasahero.