HOT STORIES OF THE WEEK

Hawak na ng PNP ang passbook ng self-confessed gunman na si Joel Escorial kung saan kumpirmadong may nagdeposito sa bank account nito ng P550,000 bilang bayad sa pagpatay sa broadcaster na si Percival Mabasa o Percy Lapid.

Ayon kay Southern Police District Director, Brig. Gen. Kirby Kraft, nakasaad sa bank statements na nagkaroon ng limang deposit transactions mula September 15 hanggang October 4.

Batay sa Extra-Judicial Confession ni Escorial, kinontak siya ni Crisanto Villamor na bilanggo sa New Bilibid Prison at nagsilbing middleman sa pagpatay kay Mabasa noong September 15 upang ipaalam na naideposito na ang downpayment na P100,000 sa kanyang bank account.

Sinundan pa ito ng P100,000 kinabukasan, September 16 at nakita rin sa passbook na nagkaroon ng 20 withdrawal transactions na tig-P10,000 mula September 15 hanggang 29.

Noon namang October 4 o isang araw matapos paslangin si ka Percy, idineposito na ang balanseng P350,000 sa account ni Escorial habang P200,000 ang na-withdraw din noong araw na iyon.

Pinakahuling withdrawal naman ay noong October 11 na aabot sa P170,000.

Sinibak na sa pwesto ng National Capital Region Police Office (NCRPO) ang 11 pulis na kinasuhan ng National Bureau of Investigation dahil sa pagkawala ng apat na lalaki na nasa kanilang kustodiya noong 2021.

Alinsunod ito sa pagtitiyak ng NCRPO na linisin ang organisasyon.

Ayon kay acting NCRPO Regional Director, Brig. Gen. Jonnel Estomo, kinukundena nila at hindi kinukunsinte ang paglabag ng mga opisyal sa karapatang pantao at batas.

Kinilala ang mga opisyal na sina dating Regional Drug Enforcement Unit chief, Lt. Col Ryan Orapa, Lt. Jesus Menez;

Staff Sergeants Ronald Lanaria, Ronald Montibon, Troy Paragas, Roy Pioquinito, Robert Raz Jr.; Corporals Christal Rosita, Denar Roda, Alric Natividad at Ruscel Solomon.

Pawang nahaharap ang mga ito sa kasong Kidnapping, Serious Illegal Detention, paglabag sa Anti-Enforced o Involuntary Disappearance Act na inihain ng NBI Task Force Against Illegal Drugs noong October 19.

Nag-ugat ang kaso sa pagkawala at pinaghahanap pa ring magkapatid na Gio at Mico Mateo, maging ang mga Online sabungerong sina Garry Matreo Jr., at Ronaldo Añonuevo noong April 13, 2021.

Karagdagang 1,585 Covid-19 cases ang naitala ng Department of Health kahapon dahilan upang lumobo na sa halos apat na milyon ang total caseload.

Ito na ang ikatlong sunod na araw na mas mababa sa dalawanlibo ang daily COVID-19 cases sa bansa.

Tatlumpu’t pito ang nadagdag sa death toll kaya’t umakat sa 63,779 ang mga namatay.

Bahagya namang bumaba sa 23,369 ang aktibong kaso habang umabot na sa mahigit 3.9 million ang recoveries.

Sa mga pinakabagong infections, 465 ay mula sa Metro Manila.

Iniimbestigahan na ng mga otoridad ang isa pang may apelyidong villamor na nakakulong sa New Bilibid Prison, Muntinlupa City.

Ito ang kinumpirma ni Bureau of Corrections Deputy Director General Gabriel Chaclag matapos ibunyag ng self-confessed killer ni Percy Lapid na si Joel Escorial, na isang Palana Villamor mula NBP ang kumuha sa kaniya para patayin ang broadcaster.

Kinilala ni Chaclag ang dalawang bilanggong sina Jun Globa Villamor at Jose Palana Villamor, na napag-alamang mag-pinsan.

Una nang namatay si Jun sa NBP Hospital noong October 18 habang si Jose ay inilipat na sa Custodial Center ng PNP noong October 20.

Inihayag naman ni Justice secretary Jesus Crispin Remulla na mahigpit na ring binabantayan ang isang Christopher Bacoto alyas Jerry Sandoval na nakakulong sa Bureau of Jail Management and Penology.

Si Bacoto ay itinuro rin ni Escorial na kumausap umano sa iba pa niyang kasabwat sa pagpaslang kay Ka-Percy o Percival Mabasa.

Makararanas muli ng water interruption ang malaking bahagi ng Caloocan City at iba pang lugar sa Metro Manila at lalawigan ng Cavite, simula bukas hanggang linggo, Oktubre a – 30.

Ito, Ayon sa Maynilad, ay bilang bahagi ng kanilang isasagawang weekly maintenance activities para mapahusay ang water services sa West Zone Area.

Partikular na makararanas ng service interruption ang mga Barangay 8, 28, 31 86, 88, 90, 91, 112, 121 hanggang 125, 126, 127, 128, 129, 130 at 131 sa South Caloocan;

Barangay 18 at 20, 260 hanggang 267, 654, 655, 657, 658, 666 at 659-a sa Maynila; Barangay Sta. Monica, Nagkaisang Nayon, Sangandaan, Santo Domingo, Apolonio Samson, Bagbag, San Bartolome, Nova Proper, Pag-Ibig Sa Nayon at San Jose sa Quezon City;

Niog 2, Alima, Banalo, Digman at Poblacion sa Bacoor City at Bucandala 1, 3 at Carsadang Bago 2 sa Imus City, Cavite.

Hinimok naman ng Maynilad ang mga costumer nito na mag-imbak ng sapat na tubig upang magamit habang hindi natatapos ang maintenance activities.

Itinalaga bilang bagong Undersecretary ng Department of Health (DOH) si retired police general Camilo Cascolan.

Ito ang kinumpirma ng kagawaran kung saan natanggap na nila ang appointment papers ni Cascolan, Atty. Charade Mercado Grande at iba pang directors.

Samantala, marami naman ang tumutol sa appointment ni Cascolan dahil hindi naman raw linya ng dating PNP chief ang health sector.

Si Cascolan ay naging hepe ng Philippine National Police (PNP) noong 2020.

Maliban dito, kilala rin siya bilang malapit kay dating Pangulong Rodrigo Duterte.

Hinihikayat ni Pangulong Ferdinand Bongbong Marcos Jr. ang publiko na umpisahan ang pagpapalakas ng turismo para sa pagbangon ng ekonomiya ngayong darating na Undas.

Sa kanyang lingguhang vlog, iginiit ng Punong Ehekutibo ang kahalagahan ng turismo para magtuloy-tuloy ang pagbangon ng bansa matapos malugmok sa COVID-19 pandemic.

Isa sa mga dahilan kung bakit ginawang holiday ang October 31 ay para magkaroon ng mas maraming panahon na magkakasama ang pamilya at maplano ang kanilang bakasyon.

Ayon pa sa Pangulo na ang industriya ng turismo ang isa sa mga susi para sumigla muli ang ekonomiya lalo na sa mga malalayong lugar na mayroong magagandang tanawin at magiging daan para magkaroon ng trabaho at kabuhayan ang mga tao.

Binigyang-diin pa ni Pangulong Marcos na nais niyang makilalang muli ang Pilipinas sa buong mundo sa pamamagitan ng turismo kaya isusulong nito ang pagpapalakas sa turismo para mas maraming turistang lokal at mga dayuhan ang bibisita sa Pilipinas.

Patuloy na nagkukulang ang ibinibigay ng Philippine Statistics Authority (PSA) ng plastic version ng mga Philippine Identification System o PhilSys card.
Dahil dito, inihayag ng PSA na maglalabas muna sila ng National ID na nakaimprenta sa papel.
Ipinabatid naman ni Dennis Mapa, PSA head, ang paper ID ay ang digital version ng National ID, na iprinint sa papel.
Kaugnay nito, tiniyak ni Mapa na lahat ay magkakaroon ng plastic card na National ID kahit kumuha na ng paper version nito.
Maaari aniyang makakuha ng paper version ng National ID sa mga PhilSys registration center nationwide.

Inaasahan na magkakaroon ng rollback sa presyo ng produktong petrolyo sa susunod na linggo.

Batay sa pagtaya ng oil industry, posibleng mabawasan ng P0.80 hangang P1.10 ang kada litro ng diesel.
Nasa P0.10 hanggang P0.40 naman ang tapyas-presyo sa kada litro ng gasolina.

Nabatid na kadalasang ipinapatupad ng mga oil companies ang price adjusment sa produktong petrolyo tuwing Martes.

Inanunsiyo ng Department of Foreign Affairs – Office of Consular Affairs na tinatanggap na nito bilang government-issued valid ID ang digitized version ng National ID simula kahapon, Oktubre 21.

Ayon sa DFA, dapat malinaw ang mga detalye sa naka-print na ePhilID o PhilSys ID, readable at naglalaman ng mga impormasyon sa isinumiteng documentary requirements sa passport application.

Inabisuhan din ang publiko na bisitahin ang philsys.gov.ph at dfa-oca.ph para sa karagdagan detalye ukol sa passport requirements.