HOT STORIES OF THE WEEK

Nagmahal na rin ang cremation kasabay ng pagtaas ng presyo ng mga bilihin at serbisyo, dahil sa Oil Price Hike.

Halimbawa na lamang sa Caloocan City, sumampa na sa P40,000 ang halaga ng kada cremation kumpara sa dating P30,000.

Hindi pa rito kasama ang urn, na nasa P2,000 hanggang P13,000 depende sa materyales at disenyo, maging ang gastos sa funeral services.

Sa isang kilalang punerarya sa Quezon City, naglalaro sa P66,000 hanggang P99,000 ang cremation pero posibleng magmahal ito dahil sa taas ng presyo ng krudo, lalo ng diesel.

Karaniwang gamit ng mga funeral service sa cremation ay diesel kaya’t aminado ang mga may-ari at nangangasiwa ng mga punerarya at crematorium na hindi nila maiiwasang magtaas ng presyo.

Nananatiling mura ang cremation kumpara sa karaniwang paglilibing sa mga sementeryo na nangangailangan pa ng lote o lupang bibilhin.

Inaasahang tataas pa hanggang 150,000 mula sa 120,000 ang daily passenger traffic sa Parañaque Integrated Terminal Exchange (PITX), ilang araw bago ang Undas.

Ayon kay PITX Corporate Affairs and Government Relations head Jason Salvador, nakipag-ugnayan na sila sa mga ahensya ng gobyerno upang matiyak ang maayos na biyahe ng mga pasahero.

Kabilang sa kanilang katuwang ang Land Transportation Office at Land Transportation Franchising and Regulatory Board.

Maglalabas anya ang LTFRB ng special permits upang matiyak na sapat ang bilang ng mga Public Utility Vehicle na bibiyahe sa “Long Undas Weekend”.

Nakatutok naman ang LTO sa roadworthiness ng mga PUV maging ang physical at mental condition ng mga driver.

Handa na rin ang Land Transportation Office sa pagdagsa ng mga motorista at biyahero sa Undas.

Sa katunayan ay nakipag-pulong na ang LTO sa mga transport group, mga kinatawan mula sa mga Expressway at Bus terminal, bilang preparasyon sa inaasahang buhos ng mga pasaherong lalabas o papasok ng Metro Manila.

Ayon kay LTO Executive Director Horatio Bona, inaasahan na nilang mas marami ang daragsa ngayong taon dahil sa mas maluwag na COVID-19 restrictions, lalo sa weekend.

Gayunman, kanilang inabisuhan ang mga transport group at transport hub official na ipaalala sa mga pasahero ang palagiang pagsusuot ng face masks sa mga terminal building at dalhin ang vaccine cards sakaling tanungin ng mga otoridad ang kanilang destinasyon.

Samantala, hindi anya papayagan ang mga LTO personnel na mag-leave simula October 7 hanggang November 4 upang matiyak na matutugunan ng ahensya ang mga aberyang maaaring kaharapin ng publiko sa Undas.

Lumantad na ang kapatid na babae ng namatay na middleman sa Percy Lapid slay case.

Nakausap umano ni alyas Marissa ang kapatid na si Jun Villamor bago ito bawian ng buhay habang nakapiit sa New Bilibid Prison, Muntinlupa.

Ibinulgar ni ‘Marissa’ na binanggit umano ni Jun ang mga pangalang Alldren, Labra at Malfie na sinasabing mga commander ng Sigue-Sigue Sputnik, Batang City Jail at Happy Go Lucky Gang.

Kinontak at kinausap anya ng mga Gang Commander ang kanyang kapatid at nabanggit din ng tatlo kay Jun na nagmula ang utos na patayin si ka-Percy sa isang mataas na opisyal ng Bureau of Corrections.

Gayunman, hindi naman binanggit sa kanya ni Jun ang pangalan ng nasabing BuCor official.

Hawak na ng Department of Justice si Marissa at nakatakdang isailalim sa Witness Protection Program.

Kasado na bukas ang ipatutupad na rollback sa produktong petrolyo ng mga kumpanya ng langis.

Sa abiso ng Pilipinas Shell Petroleum Corp., at Seaoil Philippines Inc., magkakaroon ng P0.35 na tapyas-presyo sa kada litro ng gasolina, P1.10 sa kada litro ng diesel at P0.45 sa kada litro ng kerosene.

Ipapatupad din ng Petro Gazz ang kaparehong bawas-presyo maliban sa kerosene.

Sa pinakahuling datos mula sa Department of Energy, pumalo na sa P16.45 ang year-to-date total adjustments sa net increase ng kada litro ng gasolina, P38.50 sa kada litro ng diesel, at P29.65 naman sa kada litro ng kerosene.

Magagamit na ng mga kwalipikadong Solo Parents simula sa Nobyembre a-1 ang mga benepisyo sa ilalim ng expanded Solo Parent Welfare Act.

Ayon kay DSWD secretary Erwin Tulfo, kabilang sa mga maaaring mapakinabangan ng mga benepisyaryo ang iba’t ibang mga diskwento sa gamot, tuition fee, school supplies at iba pa.

Sinabi ng Kalihim na maaaring magamit ang nasabing mg benepisyo basta’t mayroong Solo Parent ID.

Mayroon din aniyang Grievance Commitee o desk kung saan maaaring magreklamo ang mga benepisyaryo.

May mga discounts po iyon for example sa mga bata; mga diaper, gatas.. wala pong VAT, wala pong value added tax, doon naman po sa school supplies may 15% po ‘yon na mga discounts, ganon din po sa mga hospital,  may 20% discount po ang solo parents pati po mga anak nila. Automatic din po na sila ay nagiging miyembro ng PhilHealth kapag sila po ay Solo parent, with Solo-parent ID…’’  -Tinig ni DSWD sec. Erwin tulfo.

Nagkasa na rin ng mga paghahanda ang pamunuan ng NLEX para sa nalalapit na Undas.

Sa panayam ng DWIZ, sinabi ni Robin Ignacio, senior manager for traffic operations ng North Luzon Expressway (NLEX), na sa darating na Biyernes pa lamang ay inaasahan na nila ang pagbuhos ng mga sasakyan dahil sa mga magsisiuwian sa probinsya.

Mula October 28 hanggang November 2 aniya ay pansamantalang ititigil ang mga road closures at road works upang madaanan ang lahat ng mga lanes sa NLEX at SCTEX o Subic-Clark-Tarlac Expressway, maliban sa Southbound ng Candaba viaduct.

Sinabi pa ni Ignacio na nagdagdag na rin sila ng mga tauhan, partikular ng mga patrol crews at tellers.

For safety ang emergency repair po talaga ito…mayroon pong isang lane na maiiwanan na naka-close po at bawal po ang truck pagdating ng mga araw na iyon. Mayroon din po kaming increase deployment ng mga patrol at teller na mag-a-assist sa ating mga bibiyaheng mga motorista.

Pinayuhan naman ni Ignacio ang publiko na iwasang bumiyahe tuwing peak hours upang maiwasan ang mga aberya.

Kaya kung kaya nila na huwag sabayan yung mga pagdagsa ng mga byahe na ‘yun e mas maganda po…pwede rin po nila tingnan ‘yung current situation ng NLEX at SCTEX, mayroon naman po kaming FB live na mga piling camera na naka-live stream.

Ang pahayag ni Robin Ignacio, Senior Manager for Traffic Operations ng NLEX, sa panayam ng DWIZ.

Kaduda-duda para kay senator Ronald Bato Dela Rosa ang timing ng pagkamatay ng sinasabing middleman mula sa New Bilibid Prison na sangkot umano sa pagpaslang sa broadcaster na si Percy Lapid Mabasa.

Ayon kay senator Dela Rosa bagamat sa autopsy report ay sinasabing heart hemorrage ang sanhi ng pagkamatay ng umano’y middleman na si Jun Globa Villamor, pero kaduda duda na namatay ito ilang oras matapos iprisinta sa media ang sumukong confessed gunman na si Joel Escorial.

Giit ni Dela Rosa kahit na ordinaryong tao ay magdududa sa timing ng pagkasawi ng itinurong middleman na nasa loob ng bilibid.

Bagamat malaking dagok sa imbestigasyon ang pagkamatay ng umanoy middleman pero tiwala si Dela Rosa na may magagawa pa ang PNP sa imbestigasyon para matukoy anng mastermind sa pagpaslang kay Lapid.

Sa tingin ni Dela Rosa hindi masisi ang PNP sa nangyari sa middleman dahil wala ito sa kanilang kostodiya.

Hindi naman anya maaaring basta pumasok ang mga Pulis sa NBP para mag inspeksyon bukod pa sa noong una ay itinanggi ng NBP na nasa loob ng bilibid ang umano’y middleman na si Villamor.

Gaganapin sa Pilipinas ang ika-27 Association of Southeast Asian Nation (ASEAN) labor ministers meeting ngayong linggo.

Ayon sa Department of Labor and Employment (DOLE), layunin ng pulong na tutukan ang mga programa para sa post pandemic recovery sa Timog-Silangang Asya.

Inaasahang darating sa bansa simula bukas, October 25 hanggang 29 ang iba’t ibang foreign labor ministers kabilang ang mga senior labor officials ng sampung bansang miyembro ng ASEAN.

Pangungunahan ang nasabing aktibidad ni labor secretary Bienvenido Laguesma.

Kabilang din sa tatalakayin ang deployment ng mga manggagawa sa iba’t ibang sektor, pagpapatuloy ng mga programa para sa mga nawalan ng trabaho, digitalization at migration. —mula sa panulat ni Jenn Patrolla

Patuloy pa ring binabantayan ng PAGASA Weather Bureau ang Low Pressure Area (LPA) na nasa loob ng Philippine Area of Responsibility (PAR) na huling namataan sa layong 790 kilometers silangan ng Hinatuan, Surigao Del Sur.

Ayon kay PAGASA Weather Specialist Aldczar Aurelio, ang LPA ay nakapaloob sa Inter-Tropical Convergence Zone (ITCZ) at may mataas na tiyansang maging bagyo sa loob ng linggong ito.

Ang naturang LPA ay posibleng baybayin ang bahagi ng silangang Visayas pero maari ring magtungo sa bahagi ng Northern Luzon.

Samantala ang dati namang Bagyong Obet na ngayon ay isa nalamang LPA na nasa labas ng PAR ay patuloy na humihina at huling namataan sa layong 660 kilometers kanlurang bahagi ng Calayan, Cagayan.

Asahan naman ang mas malamig na panahon sa malaking bahagi ng Luzon partikular na Northern Luzon dahil sa pag-iral ng Hanging Amihan habang ITCZ pa rin ang nakakaapekto sa Visayas at Mindanao maging sa bahagi ng Palawan.

Makararanas naman ng isolated rain showers at thunderstorms ang Batanes at Babuyan Islands habang magiging maaliwalas naman ang panahon sa Metro Manila at nalalabing bahagi pa ng bansa.

Agwat ng temperatura sa Metro Manila ay maglalaro sa 25°C hanggang 32°C habang sumikat ang haring araw kaninang 5:49 ng umaga at lulubog naman ito mamayang 5:31 ng hapon.