HOT STORIES OF THE WEEK

Pinaghahandaan na rin ng Philippine National Police (PNP) ang full implementation ng face-to-face classes sa Nobyembre.

Ayon kay PNP Chief Police General Rodolfo Azurin Jr., nakikipag-ugnayan na ang mga Pulis sa mga paaralan para sa seguridad ng mga estudyante at pagpapatupad ng health protocols katuwang ang mga lokal na pamahalaan.

Matatandaang naglabas ng guidelines ang PNP kaugnay sa paglulunsad nito ng Ligtas Balik Eskwela para sa S.Y. 2022-2023 para sa proteksyon ng mga mag-aaral. —ulat mula kay Tina Nolasco (Patrol 11)

Walang magiging pagtaas sa presyo ng kandila sa gitna ng pagtaas sa demand nito habang papalapit ang All Saints’ Day at All Souls’ Day.

Ayon sa Department of Trade and Industry (DTI), mananatili ang Suggested Retail Prices (SRP) sa Basic Good and Prime Commodities (BNPC) na inisyu noong August 12, 2022.

Sa August 2022 SRP list, ang candle brand na 5-star Esperma ay mabibili mula P49.83 hanggang P137.93; Export candles, mula P29.75 hanggang P99.75; Liwanag Esperma candle, ay nagkakahalaga ng P46.42 hanggang P177.71; at Manila Wax, mula P47.74 hanggang P82.76.

Binalaan naman ang mga retailer na huwag taasan ang presyo ng unscented candles nang higit sa SRP dahil ikinukunsidera pa rin ito bilang basic goods.

Pinapayuhan din ang mga konsyumer na bumili ng mga kandila sa mga grocery at supermarket.

Samantala, sinabi ng DTI na wala silang ilalabas na SRP sa bulaklak dahil hindi ito kabilang sa basic goods.

Hindi na hahanapan ng Covid-19 vaccination card ang mga biyaherong gagamit ng Parañaque Integrated Terminal Exchange.

Ito’y ayon kay PITX Corporate Affairs and Government Relations head Jason Salvador, ngunit inirekomenda pa rin nito sa mga biyahero na dalhin pa rin ang kanilang vaccination card sakaling hanapin ito sa lugar na kanilang patutunguhan.

Pinayuhan din ni Salvador ang mga pasahero na huwag nang magdala nang marami upang maging maginhawa ang kanilang biyahe.

Una nang sinabi ng PITX na inaasahang tataas pa hanggang 150,000 ang daily passenger traffic sa PITX simula sa darating na long weekend.

Epektibo na ngayong araw ang tapyas-presyo sa produktong petrolyo matapos ang dalawang linggong dagdag-singil sa presyo ng langis.

Ayon sa kumpaniyang Cleanfuel, Petro Gazz, Seaoil, at Shell, nasa 35 centavos ang magiging bawas-singil sa kada litro ng gasolina habang P1.10 centavos naman ang magiging tapyas-presyo sa kada litro ng diesel.

Aabot naman sa 45 centavos ang magiging bawas-singil sa presyo ng kada litro ng kerosene ng mga kumpaniyang Seaoil at Shell.

Ayon sa Department of E­nergy (DOE), ang paggalaw sa presyo ng langis ay kasunod ng anunsyo ng Organization of the Petroleum Exporting Countries (OPEC) at mga kaalyado ng OPEC+ na bawasan ng dalawang milyong bariles kada araw ang produksyon ng langis.

Nabatid na nito lamang October 18 hanggang 20, pumalo na sa P62.5 centavos hanggang P73.5 centavos ang presyo sa kada litro ng gasolina; P77. 50 centavos hanggang P83. 80 centavos naman ang presyo sa kada litro ng diesel; habang pumalo naman sa P80. 15 centavos hanggang P89. 40 centavos ang presyo sa kada litro ng kerosene sa bansa.

Nagpaalala sa publiko ang Bureau of Fire Protection (BFP) hinggil sa pagsunod sa health and safety protocols para sa Undas 2022.

Ayon sa BFP-San Jose De Buenavista, kailangang alalahanin ng bawat isa ang Three K’s o ang Kandila, Kuryente, at Kalan hinggil sa paggunita ng All Saints’ Day At All Souls Day.

Sinabi ng ahensya na nagsimula narin silang maglinis at mag-inspeksiyon sa mga sementeryo sa kanilang lugar bilang bahagi ng kanilang programa na Oplan Kaluluwa na nagsimula noong October 17 at magtatapos sa November 2.

Siniguro rin ng mga tauhan ng BFP na nakahanda ang kanilang ahensya sakaling magkaroon ng sakuna o sunog partikular na sa mga bahay.

Bukod pa dito, pinayuhan din ng ahensya ang publiko na mag-obserba at siguraduhing nakapatay ang mga appliances at nakabunot ang mga sasakan ng kuryente maging ang mga cooking stove o kalan bago umalis ng bahay.

Kinumpirma ng Land Transportation Office (LTO) na nangunguna ngayon ang Social Media platforms sa ginagamit ng mga fixer para mag-alok ng serbisyo.

Ayon kay Alex Abaton, LTO Special Legal Assistant ng Office of the Assistant Secretary, kadalasang ginagamit ng mga fixer ang FaceBook na mayroong pekeng account para makapang-hikayat ng mga nais mag-apply ng lisensya sa mabilis na paraan.

Batay sa post ng mga fixer, hindi na kailangan pang sumipot ng mga aplikante sa tanggapan ng LTO dahil ang mga fixer na mismo ang siyang maglalakad ng lisensya ng kanilang mga kliyente.

Sinabi ni Abaton, na pawang mga peke ang mga dokumento o driver’s license na ibinibigay sa mga aplikante, kapalit ng malaking halaga na hinihingi ng mga fixer.

Iginiit pa ni Abaton na marami na silang ikinasang operasyon, kasama ang Anti-Cybercrime Group ng Philippine National Police (PNP) laban sa mga fixer pero marami pa rin umano ang nakalulusot.

Dahil dito, nagbabala si Abaton sa mga mahuhuling gumagamit ng pekeng lisensya, dahil maari silang pagmultahin ng P3,000 at hindi na ring papayagang makakuha ng tunay na driver’s license o makapagmaneho sa loob ng isang taon.

Nakakatanggap ng death threats ang ilang miyembro ng pamilya ng nasawing batikang broadcaster-columnist na si Percy Lapid.

Sa Facebook post, kinumpirma ni Roy Mabasa, kapatid ng nasawing mamamahayag, na naglipana ang ibat-ibang uri ng pananakot para wakasan ang kanilang determinasyon na panagutin ang mga sangkot sa pagpatay kaniyang kapatid na si Percy.

Ayon kay Roy, marami ring “extortionists’’ at mga nananamantala na nais umanong pagkakitaan ang mga pamilya ng kaniyang kapatid.

Sa kabila nito, iginiit ni Roy na kanilang ipagpapatuloy ang laban upang makamit ang hustisya sa pagpatay sa kaniyang kuya.

Samantala, pinasalamatan naman ni Roy ang mga sumusubaybay at walang sawang nagpapaabot ng mensahe bilang suporta para mahuli ang mga nasa likod ng krimen.

Tatlo hanggang limang preso ang namamatay kada araw sa mga bilangguang pinangangasiwaan ng Bureau of Corrections (BuCor) sa bansa.

Ito ang nilinaw ng BuCor sa gitna ng agam-agam sa sanhi pagkamatay sa New Bilibid Prison, Muntinlupa ng sinasabing middleman sa Percy Lapid slay case.

Ayon kay BuCor spokesman Gabriel Chaclag, natural cause, gaya ng katandaan at sakit ang karaniwang dahilan ng pagkamatay ng mga bilanggo.

Aabot anya sa halos 49K ang Persons Deprived of Liberty ang nasa iba’t ibang prison facilities sa bansa.

Ipinaliwanag din ni Chaclag na kahit naman bago pa magkaroon ng Covid-19 pandemic, hanggang tatlong bilanggo ang namamatay sa BuCor facilities kada araw.

Aminado ang BuCor official na sa katunayan isa sa kanilang problema ang malaking bilang ng mga bangkay ng mga PDL sa mga accredited funeral parlors na walang umaako.

Sumampa na sa P594 million ang halaga ng pinsala sa agrikultura matapos ang magkasunod na bagyong Maymay at Neneng.

Ayon sa Department of Agriculture-Disaster Risk Reduction and Management Operations Center, umakyat na rin sa halos 37,000 metric tons ang production loss.

Nasa 22,000 hectares naman ng lupang sakahan ang napinsala dahilan para maapektuhan ang mahigit 22,000 magsasaka at mangingisda sa Cordillera, Ilocos at Cagayan Valley Regions.

Pinakamalaki ang pinsalang dulot sa mga palayan na aabot sa kalahating bilyong piso.

Samantala, tiniyak ng D.A. ang tulong sa mga apektadong magsasaka.

Isinailalim na sa Witness Protection Program (WPP) ng Department of Justice ang kapatid na babae ng New Bilibid Prison inmate na nag-ayos umano ng transaksyon upang patayin ang broadcaster na si Percy Lapid.

Ito ang kinumpirma ni Justice secretary Boying Remulla makaraang lumantad si alyas Marissa, kapatid ng namatay na middleman na si Jun Villamor.

Ayon kay Remulla, sasailalim pa sa evaluation si Marissa bago tuluyang mapasailalim sa WPP.

Hinatid anya ni Social Welfare secretary Erwin Tulfo ang kapatid ni Villamor sa DOJ matapos magpasaklolo.

Hawak umano ni Marissa ang ilang impormasyon na mahalaga sa kaso, partikular kung sino ang nag-utos na ipapatay si ka Percy.