Nilinaw ni House Prosecution Counsel Atty. Lorna Kapunan na nananatiling kabilang si Office of the Vice President Chief of Staff Atty. Zuleika Lopez sa listahan ng mga testigo ng prosekusyon para sa isa pang articles of impeachment laban kay Vice President Sara Duterte.
Bagaman hindi na ihaharap bilang testigo si Lopez sa Article 4 na may kaugnayan sa umano’y grave threats, kinumpirma ni Atty. Kapunan na maaari pa ring ipatawag ang Chief of Staff ni VP Sara kaugnay sa kontrobersyal na confidential funds.
Ayon kay Prosecution Counsel Atty. Kapunan, nakalista pa rin si Atty. Lopez bilang testigo sa pre-trial order at pagdedesisyunan pa ng prosekusyon kung kailan ito ihaharap.
Binigyang-diin ng prosekusyon na hindi na kailangan ang testimonya ni Lopez sa Article 4 dahil napatunayan na ng mga naunang testigo ang mahahalagang ebidensya, kabilang ang pagiging tunay ng video at umano’y pagbabanta ng bise presidente kay Pangulong Ferdinand Marcos Jr.—sa panulat ni Jordan Gutierrez
