Kasado na ngayong araw ang Day 6 ng impeachment trial ni Vice President Sara Duterte, kung saan inaasahang sesentro ang pagdinig sa oral arguments ng magkabilang panig hinggil sa selyadong kahon ng Bureau of Internal Revenue (BIR).
Ang naturang kahon ay naglalaman ng mga income tax records ni VP Sara at ng kaniyang asawa na si Atty. Mans Carpio.
Matatandaang hindi pa nabubuksan ang BIR sealed box dahil sa patuloy na pagtutol ng defense team dahil labag umano ito sa batas at sa karapatan ng akusado, at hindi dapat ito tanggapin bilang ebidensya.
Inaasahan ngayong araw na ilalatag ng House Prosecution Team ang kanilang mga legal na argumento kung bakit dapat pahintulutang buksan at malaman ang nilalaman ng kahon bilang bahagi ng kanilang ebidensya.
Sa kabila nito, nasa impeachment court pa rin ang pinal at mahalagang desisyon kung bubuksan o hindi ang selyadong kahon ng BIR.
Sakaling payagang buksan ng senator-judges ang BIR box, malalaman ng taumbayan ang katotohanan hinggil sa kwestiyonableng yaman ng bise presidente. | Geli Mendez (Patrol 30)
