HOT STORIES OF THE WEEK

Pumasok na rin ang Commission on Human Rights sa imbestigasyon sa pagpatay sa beteranong broadcaster na si Percival Mabasa o “Percy Lapid”.

Ayon sa CHR nakikiisa sila sa media community sa pagkundena sa naturang krimen.

Mahalaga anila ang papel ng mga mamamahayag sa pagtataguyod sa demokrasya.

Hinimok din ng ahensya ang gobyerno, partikular ang mga law enforcer, na tiyaking mananagot sa batas ang mga nasa likod ng pamamaslang.

Samantala, bumuo na ng Task Force ang Philippine National Police upang tutukan ang kaso ng pagpatay kay Ka-Percy.

Nababahala si Pangulong Bongbong Marcos sa nangyaring walang-saysay na pagpatay sa beteranong mamamahayag at radio commentator ng DWBL na si Percival Mabasa na kilala bilang Percy Lapid.

Inihayag ni Senior Deputy Executive Secretary Hubert Guevarra na sa katunayan ay inatasan na sila ni Pangulong Marcos na tutukan ang imbestigasyon sa pagpatay sa mamamahayag.

Nakikipag-ugnayan na anya sila sa Presidential Task Force on Media Security at Southern Police District upang matiyak ang mabilis na imbestigasyon at makapagsumite ng report sa susunod na pitong araw.

Tiniyak naman ni Task Force executive director Joel Egco na hindi sila titigil hangga’t hindi nabibigyan ng hustisya si Ka-Percy.

Dakong alas 8:30 noong Lunes ng gabi nang pagbabarilin ng riding-in-tandem si Mabasa sa BF Resort Subdivision, Las Piñas City.

Nakikipag-ugnayan na ang Department of Health sa Department of Education hinggil sa umano’y hawaan ng Covid-19 sa mga paaralan simula nang magbalik ang face-to-face classes.

Ayon kay DOH-OIC Undersecretary Maria Rosario Vergeire, layunin ng kanilang pakikipag-usap sa DepEd na pagsamahin at pag-isahin ang datos dahil hindi pa rin kumpleto sa ngayon ang kanilang report.

Ibinabase anya ng DOH sa kanilang talaan kung saan nakikita at kung ilan na ang nagkakasakit sa mga age group ng mga bata.

Nilinaw naman ni Vergeire na sa ngayon ay wala pa silang maibigay na eksaktong bilang o statistics.

Bagaman may mga kaso ng COVID-19 sa kabataan, hindi naman anya ito malubha.

Nakahanda si Pangulong Ferdinand Marcos Jr. na idetalye sa publiko ang resulta ng kanyang pagtungo sa Singapore nitong nakalipas na week end.

Sa facebook post ni Pangulong Marcos, inihayag nito na naging produktibo ang kanyang week end sa Singapore dahil may kaugnayan ito sa kanyang pagnanais at pagsisikap na makahikayat ng mga foreign investor para mamuhunan sa bansa.

Nakasaad din sa post ng punong ehekutibo ang tila pagpapahiwatig na may dala syang magandang balita na may kinalaman sa pagnenegosyo.

Dagdag pa ni Pang. Marcos, napaka- fulfilling na maimbitahan sa nangyaring aktibidad nitong nakaraang linggo, kasama ang ilang dignitaries at nakaharap din ang mga bagong negosyanteng mga kaibigan na pawang nagpahayag ng kahandaang magtayo ng puhunan dito sa Pilipinas.

Giit ng punong ehekutibo, kanyang ibabahagi ang mga detalye nito sa mga darating na araw. —sa ulat ni Jopel Pelenio (Patrol 17)

Inaprubahan na ng pamahalaan ang karagdagang 1.04 billion pesos special allotment release order para sa Special Risk Allowance ng mga eligible health workers.

Ayon sa Department of Budget and Management (DBM), sakop ng nasabing pondo ang hindi pa nababayarang COVID-19 SRA claims ng 55,211 health workers.

Ang mga ito ay tatanggap ng 5,000 pesos kada buwan para sa period ng State of National Emergency.

Ang paglabas ng sra ay bilang pagsunod sa Bayanihan to Recover as One Act na pinalawig hanggang June 30, 2021.

Nabatid na ang SRA ay pinalitan ng Health Emergency Allowance (HEA), na nagsasaad na ang halaga ng benepisyo ay nakadepende sa sumusunod na risk levels:

Para sa mga health workers na nasa “low risk areas” makatatanggap ang mga ito ng 3,000 pesos.

6,000 pesos naman para sa mga naka-deploy sa “medium risk areas” habang 9,000 pesos sa mga nasa “high risk areas”

Tiniyak naman ng DBM na makikipag-ugnayan ito sa Department of Health (DOH) para matanggap ng mga naturang indibidwal ang kanilang benepisyo.

Umabot na sa mahigit P68 million (P68,372,574.03) na halaga ng tulong ang naipamahagi ng Department of Social Welfare and Development, mga lokal na pamahalaan at iba pang partners, sa mga biktima ng bagyong Karding.

Batay sa inilabas na DSWD Disaster Response Operations Monitoring and Information Center report, nasa 275,742 pamilya o 983,952 indibidwal ang naapektuhan ng bagyo.

Mula ito sa 1,939 barangays sa Regions I, II, III, CALABARZON, V at CAR.

Nananatili sa 24 evacuation centers ang 817 pamilya habang 8,784 pamilya naman ang nanunuluyan sa ibang lugar.

Nasira ng bagyong Karding ang ilang mga kabahayan kung saan 7,424 ang totally damaged habang 38,609 ang totally damaged.

Plano ng Department of Agrarian Reform (DAR) na gawing online ang pagbebenta ng ani ng mga Agrarian Reform Beneficiaries Organization (ARBO).

Ayon kay DAR secretary Conrado Estrella III, palalawakin ang kasalukuyang DAR database upang maisama ang impormasyon kaugnay sa estado ng mga lupang sakahan na ipinamahagi sa magsasakang benepisyaryo.

Sa pamamagitan anya ng Online selling malalaman ng publiko at mga buyer kung kailan mag-aani at saan makakapag-order ng maramihan bago pa mag-anihan.

Gayunman, aminado ang Kagawaran na magiging hamon ang nasabing plano dahil hindi lahat ng magsasaka ay may kaalaman sa internet. —sa panulat ni Jenn Patrolla

Inaasahang ipatutupad na ngayong buwan ang Implementing Rules and Regulations para sa expanded Solo Parents Welfare Act, na magbibigay ng cash subsidy at discount sa mga kwalipikadong solo parents.

Kinumpirma ni DSWD secretary Erwin Tulfo na nilagdaan na ang IRR noong Biyernes.

Ayon kay Tulfo, kailangan pang maghintay ng 15 hanggang 30 araw bago maging fully operational ang IRR dahil ipa-publish pa ito sa mga pahayagan.

Sa ilalim ng nasabing batas, entitled sa P1,000 monthly cash subsidy mula sa local government ang Solo parent na kumikita ng minimum wage o mas mababa basta’t hindi benepisyaryo ng anumang cash assistance program ng government.

Entitled din sa 10% discount ang solo parents na kumikita ng mas mababa sa P250,000 kada taon at VAT exemption sa gatas ng bata, food and micronutrient supplements, sanitary diapers, gamit, bakuna at iba pang medical supplements para sa kanilang anak na hanggang anim na taong gulang.

Umabot na sa P4.4 Billion ang nakolektang tax ng Bureau of Internal Revenue mula sa Philippine Offshore Gaming Operators (POGO) sa unang walong buwan ng taon o simula Enero hanggang Agosto.

Ito ang inihayag ng BIR sa pagdinig sa Senate Ways and Means Committee hinggil sa POGO, kahapon.

Ayon kay BIR director, Atty. Sixto Dy Jr., nalampasan ng revenue ngayong taon ang nakolekta ng ahensya na P3.91 billion noong 2021.

Magugunitang bumaba noong nasabing panahon ang nakolektang buwis sa kabila na ipinasang Republic Act 11590 o POGO Law ni dating Pangulong Rodrigo Duterte.

Gayunman, hindi na nagbalikan ang POGO entities sa Pilipinas at hindi naabot ang pre-pandemic level na bilang ng mga dayuhang POGO worker na kalauna’y nabawasan.

Sa iprinesentang datos ng ahensya sa Senado, mayroon na umanong 163 POGO entities sa bansa sa nitong Hunyo 2022 na binubuo ng 35 licensees at 130 service providers.

Samantala, mayroon namang 34,245 POGO industry workers kung saan 17,509 ang dayuhan at 16,736 ang Pilipino.

Patay ang isang beteranong radio broadcaster makaraang tambangan sa Barangay Talon Dos, Las Piñas City.

Kinilala ng Las Piñas City Police ang biktimang si Percival Mabasa na mas kilala bilang Percy Lapid ng DWBL.

Lulan si mabasa ng kanyang Black Toyota Innova na may plakang NGS-8294 nang pagbabarilin ng isang lalaking sakay ng Toyota Fortuner sa Sta. Cecilia Gate, BF Resort Village, mag aalas-9 kagabi.

Matapos nito dalawang lalaking lulan ng motorsiklo ang sumulpot at pinagbabarilin din ang biktima.

Patungo na sana si Ka-Percy sa studio ng DWBL sa EDSA-Reliance, Mandaluyong City para sa kanyang Online program nang maganap ang krimen.

Nagsasagawa na ng imbestigasyon sa krimen ang Las Piñas City Police.

Maliban sa pagiging hard-hitting commentator, naging anchor din si Lapid ng DWIZ at DZRJ.

Si Ka-Percy ay kapatid ni dating National Press Club president Roy Mabasa ng Manila Bulletin.