HOT STORIES OF THE WEEK

Ikinatuwa ng Malacañang ang pagpapalawig ni US President Donald Trump sa kaniyang pananatili rito sa Pilipinas.

Ito’y makaraang kumpirmahin ng White House ang mas mahabang pananatili sa bansa ni Trump para dumalo sa East Asia Summit sa Nobyembre 13 hanggang 15.

Ayon kay Presidential Communications Secretary Martin Andanar, magandang pagkakataon ito para mapaigting ang relasyon sa pagitan ng Pilipinas at ng Amerika.

Patunay lamang ito ayon kay Andanar na bukas pa rin ang Pilipinas para makipagkaibigan sa mga bansang nakakabangga nito tulad ng Amerika na madalas makatikim ng pambibira kay Pangulong Rodrigo Duterte dahil sa pakiki-alam nito sa mga usaping panloob ng bansa.

—-

Nanawagan ang Simbahang Katolika sa Pilipinas na magbalik-loob, pumanig sa katotohanan at itigil na ang kultura ng walang habas at walang habag na patayan sa bansa.

Ito ang nagkakaisang panawagan ng Catholic Bishops’ Conference of the Philippines o CBCP nang matapos nilang pangunahan ang “Start the Healing Rally” sa EDSA Shrine kahapon.

Sinimulan ang aktibidad ng isang misa sa EDSA Shrine dakong alas-3:00 kahapon ng hapon at saka sinundan ito ng isang prusisyon patungong EDSA People Power monument para sa isang programa.

Iginiit ni Villegas sa kaniyang homily na kung hindi ititigil ang patayan, tiyak na sumpang parusa aniya ang bayang pumapatay sa sariling kababayan na siya aniyang nararanasan sa ilalim ng kampaniya kontra iligal na droga.

Nagpatutsada pa si Villegas sa administrasyon na tanging ang Diyos lamang ang forever at hindi ang pamahalaan maging ang mga pulitiko.

Tinatayang aabot sa mahigit 20,000 ang mga nagsidalo sa nasabing pagtitipon.

Kabilang sa mga sumama sa rally ang mga miyembro ng opposition group na Tindig Pilipinas na kinabibilangan ng mga miyembro ng Liberal Party, mga dating opisyal ng nakalipas na administrasyon, mag-aaral, civil society at religious groups.

Naroon din si dating Vice President Jejomar Binay at mga senador na sina Antonio Trillanes IV na mahigpit ding kritiko ni Binay at Senador Bam Aquino habang nagpaabot naman ng mensahe ng pagsuporta ang nakakulong na si Senadora Leila de Lima.

Nagdala ng mga placards at kandila ang mga dumalo kung saan nakasulat ang kanilang panawagang itigil na ang karahasan at isulong ang kapayapaan para sa ganap na paghilom ng bayan.

Iginiit ni De Lima sa kaniyang liham na kung patuloy aniyang magububulag-bulagan ang taumbayan sa mga pagkakasala ng administrasyong duterte sa bayan, tiyak na malulugmok ang bansa sa kahirapan at hindi aniya matatapos ang problema sa halip ay lalo pang lalala ito.

‘Heal our Land’ campaign in Cebu

Samantala, nakiisa rin ang mga Cebuano sa panawagan na itigil na ng pamahalaan ang mga patayan o extrajudicial killings sa ilalim ng war on drugs.

Ayon kay Cebu Archbishop Jose Palma, dapat ipagdasal ang Pilipinas na maghilom ang sugat na idinulot ng walang habas na patayan sa ilalim ng kampaniya ng administrasyon.

Nilinaw ni Palma na suportado naman ng simbahan ang kampaniya kontra droga ngunit hindi aniya nila mapalalampas ang pagpatay sa mga inosente na siya aniyang nadadamay.

Kasunod nito, umapela rin ang arzobispo sa mga drug surenderees na tulungan ang sariling magbagong buhay at tumulong para mai-alis sa sumpa ng droga ang iba pang nalululong dito.

—-

60,000 multi – agency forces at resources ang pormal nang pinakilos para sa Association of Southeast Asian Nations o ASEAN summit mula Nobyembre 13 hanggang 17.

Kasunod na din ito ng isinagawang send-off ceremony na pinangunahan ni Department of Interior and Local Government o DILG OIC Catalino Cuy, chairperson ng ASEAN 2017 Committee on Security, Peace and Order, Emergency Preparedness and Response.

Bahagi din ng send-off ceremony sina Ambassador Marciano Paynor, Jr., Director General for Operations ng Association of Southeast Asian Nations – National Organizing Council o ASEAN – NOC; executive Secretary Salvador Medialdea, Chairperson ng ASEAN – NOC;

Police Director Napoleon Taas, Commander ASEAN Security Task Force; Armed Forces of the Philippines o AFP Chief of Staff Lieutenant General Rey Leonardo Guerrero; at Philippine National Police o PNP chief Director General Ronald “Bato” Dela Rosa.

Sinabi ni Cuy na nagsanib puwersa ang dalawampu’t isang (21) ahensya ng gobyerno para ikasa ang seguridad ng mga delegado ng ASEAN Summit.

Maliban sa malaking deployment ng tropa, ipinabatid ni Cuy na magpapakalat din sila ng mahigit dalawandaang patrol cars, halos 400 motorsiklo, dalawampu’t dalawang (22) armoured cars, tatlumpung (30) helicopters, halos 60 fire trucks, 94 na ambulansya, mahigit 100 explosive detection dogs/k9 at 82 sniper teams.

Kasado na din aniya ang mga binuong joint task groups, task groups at sub task units para matiyak ang maayos at matahimik na ASEAN Summit.

PNP handa nang magbigay seguridad sa ASEAN Summit

Handa na ang puwersa ng PNP para magbigay ng seguridad sa ASEAN Summit.

Tiniyak ito ni PNP Chief Director General Ronald Dela Rosa matapos ang isinagawang send-off ceremony sa halos 60,000 puwersa na magbibigay ng seguridad sa mga delegado sa ASEAN Summit.

Ang ASEAN Summit na itinakda sa Nobyembre 13 hanggang 17 ay dadaluhan ng mga lider ng sampung ASEAN member nations, dialogue partners, observer states at iba pang inimbitahang delegado mula sa Asia Pacific Region.

(Ulat ni Jonathan Andal)

Isinalang na sa preliminary investigation ng Department of Justice o DOJ si Karen Aizha Hamidon, ang itinuturing na recruiter ng Islamic State of Iraq and Syria o ISIS at may kaugnayan din sa grupong Maute.

Nabigo namang makapagsumite ng counter affidavit si Hamidon dahil nilabag aniya ng National Bureau of Investigation o NBI ang kanyang karapatan para personal na makapagsulat ng kontra salaysay.

Walang ding kasamang abogado si Hamidon para mag-representa sa kanya sa pagdinig.

Samantala, humarap naman ang mga operatiba ng NBI Counter Terrorism Division at Personal na pinanumpaan ang kanilang complaint affidavit sa harap ni Senior Assistant State Prosecutor Peter Ong.

Kasabay nito, nanindigan ang NBI na kanilang binigyan ng abogado mula sa Public Attorney’s Office o PAO si Hamidon nang kanilang isalang ito sa inquest proceeding

Iginiit din ng NBI na dapat kumuha na si Hamidon ng sariling abogado para naman sa mga susunod na regular preliminary investigation.

Muli namang itinakda ang susunod na pagdinig sa Nobyembre 6, kung saan inaasahang makapagsusumite na ng kontra salaysay si Hamidon.

(Ulat ni Bert Mozo)

Gagawa ng isang special court ang Korte Suprema para tumutok sa kaso ng mga posibleng manggugulo sa gaganaping bar examinations sa University of Santo Tomas o UST ngayong buwan simula sa Linggo.

Nabatid na maaaring masampahan ng kasong direct contempt at sampung araw na pagkakakulong ang mga mapatutunayang nanggulo sa bar exam.

Sinabi naman ni Manila Mayor Joseph Estrada na nasa 700 mga Pulis – Maynila ang kanyang itinalaga para magbantay ng seguridad sa apat na linggong bar examinations.

Dagdag ni Estrada, magpapahiram din siya ng electronic tricycles o e-trikes na magbibigay ng libreng sakay para sa mga may edad o may kapansanang bar examinees papasok ng UST.

Samantala, nagpaalala naman si Manila Police District o MPD Director Joel Coronel kaugnay sa isasagawang re-routing sa bahagi ng España Boulevard patungong Quiapo mula 4:00 hanggang 7:00 ng umaga at 4:00 ng hapon hanggang 7:00 ng gabi sa apat na linggo ng Nobyembre.

Magpapatupad din ng liquor ban sa loob ng 100 metro mula UST, sa loob ng apat na linggo ng bar examinations ngayong buwan.

(Ulat ni Aya Yupangco)