HOT STORIES OF THE WEEK

Minomonitor na ng Department of National Defense o DND ang pagkilos ng pinakabago at pinakalamaking dredging vessel ng China.

Ito ang kinumpirma ni Defense Secretary Delfin Lorenzana matapos amining posibleng magdulot ng matinding pangamba sa Pilipinas kung ipadadala sa West Philippine Sea ang nasabing dredger vessel ng China.

Ayon kay Lorenzana, nakatanggap na sila ng ulat kaugnay ng pagpapasinaya sa nasabing dredger vessel bagama’t hindi pa nila batid kung saan ito ipadadala.

Tiniyak naman ni Lorenzana na nakaalerto ang puwersa ng DND sa mga islang okupado ng bansa sa West Philippine Sea kaya agad nilang malalaman kung ipadadala ito sa nasabing teritoryo.

Ang Tian Kun Hao na pinabagong dredger vessel ng China ay kasing laki ng siyam na basketball court at naisalang na sa water testing sa Jiangsu kamakailan.

—-

Magpapatupad na rin ng no fly zone sa kabuuan ng Metro Manila at mga karatig lalawigan sa Nobyembre 9 bilang bahagi pa rin ng inilatag na seguridad para sa ASEAN Summit.

Kasunod nito, inanusyo na rin ni Philippine National Police o PNP Chief Director General Ronald ‘Bato’ Dela Rosa na nasa full alert status na sila mula bukas, Nobyembre 8 bunsod na rin ng inaasahang pagdating ng mga world leaders tulad ni US President Donald Trump.

Ayon kay ASEAN Committee on Security Chairman at DILG OIC Undersecretary Catalino Cuy, bawal lumipad ang mga sasakyang panghimpapawid sa bahagi ng Clark Special Economic Zone sa Pampanga mula Nobyembre 9 hanggang 14 mula alas-4:00 ng umaga hanggang ala-5:00 ng hapon.

Mula ala-6:00 naman ng umaga hanggang ala-5:00 ng hapon at alas-11:00 ng gabi sa Nobyembre 12 hanggang 15, bawal lumipad ang anumang aircraft sa bahagi ng Rizal Park maging sa buong Maynila.

Sarado rin ang lahat ng maliliit na paliparan tulad ng Sangley Airport sa Cavite, Plaridel Airport sa Bulacan at ang Subic International Airport sa Olongapo sa nabanggit na mga petsa at oras.

—-

Kinilala na ng Pasay City Police ang suspek sa pagpatay sa Grab driver na si Gerardo Amolato Maquidato, Jr.

Ang suspek na nakilalang si Narc Tulod Delemios o tinatawag ding “Miko”, ayon sa mga otoridad ay natukoy sa tulong ng kanyang live in partner na umaming cellphone niya ang ginamit ni Delemios para mag – book ng Grab car.

Si Delemios ay nahaharap sa kasong murder at may arrest warrant na inilabas ng Paranaque Regional Trial Court o RTC noong Pebrero 2015.

Si Maquidato ay binaril noong Oktubre sa Pasay City.

Tinangay din ang sasakyan nito na kulay silver na Toyota Innova at may sticker na YV7-109.

Dahil dito, naglabas na ng alarma ang Land Transportation Office (LTO) at Highway Patrol Group (HPG) para mapabilis ang paghahanap sa nasabing sasakyan.

Matatandaang, si Maquidato ay binigyan ng parangal ng Grab noong nakalipas na taon makaraang mag-viral ang balita nang pagpapasakay niya ng libre sa isang maysakit na pasahero.

Tinatayang limang kilo ng shabu na nagkakahalaga ng dalawampung (20) milyong piso ang nasabat ng Philippine Drug Enforcement Agency o PDEA sa isang apartment na katabi lamang ng Malakanyang.

Ipinabatid ni PDEA Director General Aaron Aquino na pag – aari ng tatlumpu’t pitong (37) taong gulang na si Dianne, na anak nang tinaguriang “drug queen” Yu Yuk Lai, ang sinalakay na kuwarto.

Sinasabing legal ang negosyo ni Dianne na pagsu – supply ng bigas sa Correctional na una nang sinalakay ng mga otoridad at nakakumpiska ng illegal drugs.

Itinuro umano ni Lai ang anak na si Dianne na nagsu – supply din ng droga sa correctional kaya’t nagsagawa ng raid ang mga otoridad.

Si Lai ay nakakulong sa correctional institute for women sa Mandaluyong City sa kasong droga.

1/2#TINGNAN PDEA nasabat ang mga hinihinalang shabu na nagkakahalaga ng P5-M kay “drug queen” Yuk Lai Yu kaninang umaga; pic.twitter.com/Q28alEmTKY

— DWIZ Newscenter (@dwiz882) November 6, 2017

2/2
Anak ng naturang drug queen arestado sa kahiwalay na operasyon. | via PDEA-PIO pic.twitter.com/8LuJGwnq2d

— DWIZ Newscenter (@dwiz882) November 6, 2017

Dismayado ang mga senador sa aksyon ng University of Santo Tomas o UST para pigilan ang hazing activities sa kanilang paaralan.

Sa pagpapatuloy ng senate hearing ukol sa pagkamatay ng hazing victim na si Horacio “Atio” Castillo III, sinabi ni Senador Sherwin Gatchalian na walang kaalam-alam ang unibersidad na may nangyayari nang hazing.

Ang masaklap pa aniya sa nangyari ay naging kapalit ng kapabayaang ito ng UST ay buhay ng isang estudyante.

Kasabay nito, iginiit ni Senador Juan Miguel Zubiri na hindi na sana na-engganyo pang sumali sa Aegis Juris si Castillo, kung nalaman nitong hindi pala recognized ng UST ang naturang grupo.

Binigyang – diin ni Zubiri na nagawa pang makapag-recruit ng Aegis Juris ng mga freshmen sa kabila ng kabiguan nitong makapasa sa accreditation process.

Samantala, itinanggi ng family driver ng pamilya Trangia na si Romeo Laboga na siya ang nagmaneho ng pulang pick-up para dalhin sa Chinese General Hospital o CGH ang hazing victim na si Horacio “Atio” Castillo III.

Sa pagharap ni Laboga sa pagpapatuloy ng imbestigasyon ng senado, iginiit nitong kasama niya ang kanyang among si Antonio Trangia sa Meycauayan, Bulacan nang mangyari ang insidente.

Sa huli, natukoy ni Senadora Grace Poe na ang drayber pala ng akusadong si Arvin Balag ang nagmaneho ng pulang pick up ng mga Trangia.