HOT STORIES OF THE WEEK

Ibinabala ng Samahang Industriya ng Agrikultura o SINAG ang pagtaas ng presyo ng lahat ng uri ng karne sa bansa.

Sa harap ito ng plano ng National Meat Inspection Service o NMIS na itaas ng 1,000 porsyento ang sinisingil nila sa pagkatay at inspeksyon ng mga karne bago ito mailabas sa pamilihan.

Ayon kay Rosendo so, Pangulo ng SINAG, kapag natuloy ito, ang dating tatlong piso (P3) kada ulo na sinisingil ng NMIS ay magiging tatlumpung piso (P30), na malaki ang magiging impact sa presyo ng karne.

“Yung computation nila is hindi lang yung lightweight yung increase pati yung cartas, dalawang increase yun siguradonmg tataas ang retail niyan, yung cartas naman is increase of almost 10 times, kung dati halimbawa ang collection nila is 500 plus million magiging ano yan 5 point something billion, times ten talaga.” Ani So

Hiniling ni So sa Department of Agriculture o DA na dapat munang magkaroon ng diyalogo sa mga nasa industriya bago magpatupad ng pagtaas ng ante at post mortem fees ang NMIS.

Sinabi ni So na ang pinaka-aaray sa ganito kalaking singil ng NMIS ay ang mga backyard farms.

Una rito, iminungkahi ng NMIS ang 1,000 porsyentong pagtaas sa sinisingil nila sa pagkatay at inspeksyon ng mga karne dahil 1993 pa noong unang itakda ang ante at post mortem fees.

“Dapat kasi ang i-consider nila is ilan ba ang kinakatay sa isang araw at ito ba ay makakaapekto sa industriya? Kasi ang ating local industry compared sa ibang bansa iba eh, dito sa atin 60 percent ay mga backyard and 40 percent ang mga farm, kung ganun ang gagawin nila maapektuhan ba itong mga farm?, mga backyard? Dapat magkaroon ng consultation talaga.” Pahayag ni So

Price remains stable

Nananatiling matatag ang presyo ng karne sa bansa.

Tiniyak ito ni Rosendo So , Pangulo ng SINAG sa harap ng mga balita na tataas ang presyo ng karne ng baboy at manok sa panahon ng Kapaskuhan.

Sa katunayan aniya ay bumaba pa ang farm price ng baboy kumpara nitong mga nakaraang buwan.

Gayunman, nagbabala si So na posibleng kapusin ang suplay ng manok sa Disyembre at tumaas ang presyo nito sakaling hindi pa tuluyang makabawi ang mga tinamaan ng bird flu.

“Ang price ng pork eh medyo stable tumaas man yan eh hindi ganun kalaki, yung sa chicken naman alam natin na tinamaan pa lang ng bird flu, masasabi natin na up to now apektado pa rin ang industriya ng manok, maraming hindi nag-alaga, we hope na maka-recover at bumalik sila kasi kung hindi yung December stocks natin ay medyo tight.” Paliwanang ni So

 (Ratsada Balita Interview)

Bineberipika na ng Philippine National Police o PNP ang ulat na nasa Metro Manila na ang ilang miyembro ng grupong Maute- ISIS.

Ayon kay PNP Deputy Spokesperson Superintendent Vimelle Madrid, sa ngayon ay wala pang klaro at kumpirmadong reports kaugnay sa nasabing presensya ng mga terorista sa Kamaynilaan.

Kasabay nito, dinagdagan na aniya ng PNP ang police visibility at todo higpit na ngayon ang ipinatutupad na checkpoint operations.

Batay sa kumakalat na impormasyon, namamalagi ngayon sa kanilang mga kamag-anak sa Taguig City ang natitirang miyembro ng Maute at nagbabalak umanong maghasik ng kaguluhan sa Metro Manila lalo na sa matataong lugar.

—-

Mahigit 57,000 pulis at sundalo ang ipakakalat sa Metro Manila at Pampanga, bilang paghahanda sa hosting ng bansa sa 31st Association of Southeast Asian Nations o ASEAN Summit, sa November 10 hanggang 14.

Isang send-off ceremony para sa mga sundalo at pulis na nakatutok sa pagbibigay seguridad sa mga dadalong world leaders ang isasagawa sa Quirino Grandstand, Maynila, alas-6:00 ng umaga sa Linggo.

Dahil dito, isasara pansamantala ang ilang kalsada gaya ng Independence Road mula Katigbak Drive hanggang South Drive.

Inabisuhan naman ang mga motorista na iwasan din ang iba pang kalye partikular ang mga nasa paligid ng Quirino Grandstand bunsod ng ipatutupad na rerouting scheme sa Bonifacio Drive; Padre Burgos Avenue at TM Kalaw Avenue.

—-

Hinihintay na lamang ang pormal na kautusan mula kay Pangulong Rodrigo Duterte na naghihiwalay sa Presidential Communications and Operations Office o PCOO at ng Office of the Presidential Spokesman.

Ayon iyan kay incoming Presidential Spokesman Harry Roque na nagsabing posibleng maghiwalay ang kanilang tanggapan ni Presidential Communications Secretary Martin Andanar.

Pagtitiyak naman ni Roque, patuloy pa rin ang kanilang pagtutulungan kahit maghiwalay na sila ng tanggapan ni Andanar para maihatid ang tamang impormasyon sa publiko at iginiit na walang mangyayaring revamp sa kanyang tanggapan.

Magugunitang itinalaga ni Pangulong Duterte si Roque bilang Presidential Spokesman sa ranggong kalihim kaya’t maihahalintulad ang set-up noong nakalipas na administrasyon kung saan, magkahiwalay ang opisina ng PCOO at ng Presidential Spokesperson.

(Ulat ni Jopel Pelenio)