HOT STORIES OF THE WEEK

Bibisitahin ng Pangulong Rodrigo Duterte ang South Korea sa unang linggo ng Hunyo.

Ipinabatid ito ng South Korean Presidential Office kung saan makakapulong ng Pangulo si President Moon Jae-In sa June 4.

Inaasahang tututukan ng dalawang lider ang pagpapatibay sa relasyon ng Pilipinas at South Korea.

Ang anunsyo ng SoKor sa pagbisita ng pangulo sa nasabing bansa ay kasunod nang nabuhay umanong tensyon matapos kanselahin ni US President Donald Trump ang summit meeting kay North Korean Leader Kim Jong Un sa Singapore sa June 12.

—-

Nanguna ang Quezon City, Maynila at Cebu City sa may pinakamataas na krimen na naitala sa buong bansa sa unang quarter ng 2018.

Batay sa datos ng PNP-Directorate for Investigation and Detective Management mula nitong January hanggang April, aabot sa 12,000 krimen ang naitala sa Quezon City, 7,000 naman sa Maynila at 3,000 sa Cebu.

Ayon kay Senior Superintendent Noel Sandoval ng DIDM, kung malaki ang populasyon ng isang lugar malaki rin ang tiyansa na maraming krimen ang mangyari rito.

Nanguna naman ang Ormoc City sa may pinaka-kaunting krimen na naitala sa bilang na 134, sinundan ng Cotabato at Puerto Princesa na may tig-200 krimen.

Pero ayon kay Sandoval, hindi ibig sabihin ito na ang pinakaligtas na syudad sa bansa.

Maaari kasi aniyang hindi naireport ang nagyaring krimen o masipag ang mga pulis sa pagpigil sa kriminalidad sa mga naturang lugar.

—-

Tinapos na ng Department of Justice ang provisional Witness Protection Program (WPP) coverage sa umano’y pork barrel scam queen na si Janet Lim-Napoles.

Matatandaan na humiling sa Napoles na maisailalim sa WPP ng pamahalaan dahil sa mga natatanggap na banta sa buhay nito, partikular ay upang mailipat ang kanyang selda sa Camp Bagong Diwa. Noong Pebrero rin ay inaprubahan ng DOJ ang kahilingan nito na may saklaw lamang ng hanggang 90 na araw o tatlong buwan.

Nang makita na wala namang banta na tuluyang magpapahamak kay Napoles, nagdesisyon na ang kasalukuyang kalihim ng DOJ na si Sec. Menardo Guevarra na tanggalin na sa WPP ang itinuturong pork barrel scam queen.

Inatasan ng pamahalaan ang Department of Energy (DOE) at Department of Trade and Industry o DTI na pag-aralan ang posibleng pag-aangkat ng produktong petrolyo sa Russia.

Paliwanag ni Presidential Spokesman Harry Roque, mas mababa ang bentahan ng mga produktong petrolyo sa Russia kumpara sa retail prices ng mga kumpanya ng langis sa Pilipinas.

Dagdag pa ni Roque, isa ito sa nakikita nilang paraan para hindi umaasa lagi ang Pilipinas sa organization of petroleum exporting countries na nagbebenta ng mahal na diesel products.

Sa ngayon, sinabi ni Roque na idudulog pa nila kay Pangulong Rodrigo Duterte ang mga negosyante na may direktang koneksyon sa Russia, na nagpapakita ng interes sa planong pag-aangkat ng murang langis para sa Pilipinas.

—-

Nilinaw ni Pangulong Rodrigo Duterte ang kanyang mga kontrobersiyal na mga pahayag laban sa mga kababaihan.

Matatandaang umani ng batikos ang makailang ulit na tila pangmamaliit ng Pangulo sa mga kababaihan.

Kasama na dito ay ang pahayag nitong ayaw niyang pulitiko o kaya naman ay babae ang siyang maupo bilang bagong Ombudsman.

Sa kanyang naging pahayag sa Davao City kahapon, sinabi ng Pangulo na naniniwala siya sa kagalingan at kapasidad ng mga kababaihan ngunit may ilan lamang talagang trabaho ang hindi bagay o naaayon sa mga babae.

“[Women are] unlike men, kami suntukan, bakbakan, barilan. We grew up in a sort of mind set na sometimes prone to violence.”

“Itong mga babae, mga prim and proper man yan, isang tingin lang sa nanay, tunaw na ‘yan. Tapos gawin mong pulis? Hindi sa wala akong bilib. I believein women, their competence and capability, pero hindi lahat sa buhay dapat.” Pahayag ng Pangulong Duterte

—-

Magkakaroon ng mahigit pisong diskuwento ang mga public utility vehicles o PUVs na magpapakarga ng gasolina sa Petron, Phoenix at Shell.

Sinabi ni Energy Secretary Alfonso Cusi, na inaantay na lamang nila na lagdaan at gawing pormal ang bagong memorandum of agreement kaugnay sa naturang plano ng oil companies.

Sa ngayon, ayon kay Cusi, sa nasabing inisyatibo muna maaaring umasa ang mga umaaray na drivers at operators na apektado ng pagtaas ng presyo ng produktong petrolyo.

Nauna ng sinabi ng Land Transportation Franchising and Regulatory Board o LTFRB na bukas sila sa posibilidad na itaas sa P10 ang minimum fare sa jeep mula sa kasalukuyang P8 basta hindi mako-kompromiso ang interes at panig ng mga commuter.

Excise tax

Samantala, pumalag ngayon ang ‘economic leaders’ ng bansa kaugnay sa patuloy na paninisi ng ilang grupo sa Tax Reform Law na dahilan umano ng pagtaas ng presyo ng produktong petrolyo at iba pang bilihin.

Ayon kay Budget Secretary Benjamin Diokno, ang patuloy na pagtaas ng presyo ng krudo sa ‘world market’ ang dahilan ng pagsirit ng presyo ng petrolyo sa bansa, at hindi ang “fuel excise tax” na nakapaloob sa Tax Reform on Acceleration and Inclusion o TRAIN Law.

Kontra naman si Finance Secretary Carlos Dominguez sa panukalang suspensyon sa ‘excise tax’ sa langis dahil maapektuhan aniya ang suweldo ng mga pulis at sundalo, gayundin ang libreng matrikula sa kolehiyo.

Una rito , sinabi ng Malacañang na bukas silang suspendihin ang ‘excise tax’ sa produktong petrolyo bunsod ng pagtaas ng walong dolyar sa kada bariles na halaga ng krudo sa pandaigdigang merkado.

—-