HOT STORIES OF THE WEEK

Malabo ang hinihiling ng Makabayan Bloc na national minimum wage sa mga manggagawa na nagkakahalaga ng 750 piso.

Iyan ang inihayag ni Labor Secretary Silvestre Bello III kasunod na rin ng pagtutol ng mga employers sa harap ng patuloy na pagtataas ng inflation rate sa bansa.

Ayon kay Bello, posibleng hindi makabuti para sa mga employer at manggagawa ang hirit ng Makabayan Bloc sa Kamara lalo’t may iba’t ibang pangangailangan sa bawat rehiyon.

Gayunman, kinumpirma ni Bello na posibleng magpatupad ng umento sa sahod ang mga manggagawa sa buong bansa ngayong buwan.

Bagama’t hindi pa tinukoy ni Bello kung magkano ang magiging umento sa sahod, asahan na aniya ito lalo’t may basbas na ito ni Pangulong Rodrigo Duterte upang maibsan ang nararanasang bigat dahil sa epekto naman ng ipinatutupad na tax reform measures.

—-

Ibinunyag ng Philippine Health Insurance Corporation o PhilHealth ang umano’y kuwestyunableng paglipat ng kanilang pondo na nagkakahalaga ng 10 bilyong piso papunta sa Department of Health (DOH).

Sa pagdinig ng Joint Congressional Oversight Committee, sinabi ni Ruben John Basa, Senior Vice President and Chief Operating Office ng PPhilHealth na inilipat nina dating Health Secretary Janette Garin at dating PhilHealth President Atty. Alex Padila ang naturang pondo na nakalaan sana para sa senior citizen tungo sa DOH.

Ito umano ay gagamitin para sa pagpapatayo ng rural health centers.

Ngunit sinabi ni Basa na walang valid na waiver ang naturang paglilipat ng pondo

Si Garin na nanungukulan bilang kalihim ng DOH ay nagsilbi ring Chairman ng PhilHealth Board.

—-

Aprubado na sa third and final reading ng Kamara ang 1.61 billion supplemental budget para sa mga nabakunahan ng Dengvaxia.

Ito ay matapos na sertipikahang urgent ni Pangulong Rodrigo Duterte ang House Bill 7449 kahapon.

Kaya naman nagkaisa ang mga mambabatas sa botong 231, walang tumutol at nag abstain para maipasa ang naturang panukalang batas.

Sa ilalim House Bill 7440, walumpu’t isang porsyento ng naturang halaga ay ilalaan para mabigyan ng medical assistance ang 900,000 mga batang mabiktima ng Dengvaxia.

Labing tatlong (13) porsyento ng pondo ay laan para sa public health management kasama na ang assessment at monitoring ng mga supplies at gamot habang ang natitirang anim na porsyento ay para sa deployment ng mga health workers sa buong bansa.

—-

Pinakilos ng Department of Energy o DOE ang Philippine National Oil Company-Exploration Corporation (PNOC-EC) para tulungan ang gobyerno na pawiin ang pangamba ng mga consumer hinggil sa mataas na presyo ng oil products.

Sa kanyang direktiba binigyan ng kapangyarihan ni Energy Secretary Alfonso Cusi ang PNOC-EC na mag-angkat at magbenta ng mas murang petroleum products mula sa Russia at mga bansang hindi kabilang sa Organization of the Petroleum Exporting Countries para sa mas mababang presyo rin ng oil products.

Layon aniya ng nasabing hakbang na tugunan ang sitwasyon ngayon sa oil price gayundin ang bumuo ng strategic petroleum reserve lalo na’t hindi maayos ang estado ng presyo nito sa world market.

Sa kasalukuyan aniya ay umiiral ang kautusan ng DOE sa oil companies na panatilihin ang minimum inventory requirement sa stock ng kanilang krudo sa loob ng 30 araw at tig-pitong araw sa importers at mga negosyante ng LPG.

—-

Mahihirapan ang pamahalaan na pondohan ang lahat ng mga programang ipatutupad ng administrasyon kapag sinuspinde ang TRAIN o Tax Reform for Acceleration and Inclusion law.

Iyan ang pag-amin ni Finance spokesperson Assistant Secretary Paola Alvarez makaraang magpahayag sila ng pagtutol sa mga panawagan na suspindehin ang pagpapatupad ng nasabing batas.

Hindi naman po lahat ng reporma ay madali nating makukuha. So kailangan din nating balansehin. Nagbibigay naman po tayo ng tulong lalong lalo na ‘yung unconditional cash transfers doon po sa pinakamahihirap na household. So sa tingin po natin ay ito ay nakakatulong at sapat na po. Pahayag ni DOF Asec. Paula Alvarez

Sa panig naman ng Palasyo, sinabi ni Presidential Spokesman Harry Roque na ipinauubaya na nila sa mga mambabatas ang pagbalangkas ng batas para suspindehin ang TRAIN law.

Alam niyo po tagapagpatupad lang ng batas ang presidente. Ang Kongreso ay may ganyang kapangyarihan, so ang gagawin ng presidente ay kung ano ang nakasaad sa batas. Paliwanag ni Roque

Senate President Tito Sotto, may hiling kay Finance Sec. Sonny Dominguez

Hiniling ni Senate President Tito Sotto kay Secretary Sonny Dominguez na magbigay ng briefing ang mga economic managers ng Palasyo sa mga senador partikular sa miyembro ng Senate Committee on Ways and Means at Committee on Finance.

Kaugnay ito ng epekto ng umiiral na TRAIN o Tax Reform for Acceleration and Inclusion Law sa patuloy na pagsirit ng presyo ng petrolyo na nagbubunga naman ng pagtataas ng presyo ng mga pangunahing bilihin.

Ayon kay Sotto, magandang magbigyan ng briefing ang mga senador para kanilang mapulsuhan ang mga dapat gawing hakbang lalu’t ilan na ang nagsusulong ng suspensyon ng probisyon sa TRAIN law na nagpapataw ng excise tax sa langis.

Dagdag pa ni Sotto, hindi rin maaaring kumilos ang senado hinggil sa pagpapasa ng panukalang batas para sa suspensyon ng nasabing probisyon sa TRAIN law hangga’t wala pang naipapasa sa House of Representatives.

Ulat ni Cely Ortega-Bueno (Patrol 19)

Isinusulong ng ilang mambabatas sa Kamara na itaas sa 750 pesos ang minimum wage ng mga manggagawa.

Ayon sa Makabayan Bloc, layon ng panukala na maibsan ang epekto ng tumataas na presyo ng mga bilihin bunsod ng dagdag sa presyo ng mga langis at epekto ng Tax Reform for Acceleration and Inclusion o TRAIN Law.

PANOORIN:
Panukalang P750 national minimum wage increase, inihain ng Makabayan Bloc sa Kongreso; kasama rin sa mga naghain si Kilusang Mayo Uno Chairman Elmer Labog. | via @JILLRESONTOC pic.twitter.com/sB9Fz78zIs

— DWIZ Newscenter (@dwiz882) May 28, 2018

Makabayan bloc solons ask Duterte to certify as urgent the P750 National wage increase bill @dwiz882 pic.twitter.com/Vr6i3DDwZh

— Jill Resontoc – DWIZ -882 AM radio (@JILLRESONTOC) May 28, 2018

Una rito, naghain din ng panukalang batas si Senador Bam Aquino ukol sa pagbawi ng nakapataw na excise tax sa langis kasunod ng ilang linggong big time oil price hike.

Una nang sinabi ng Department of Finance o DOF na sususpindehin lamang ito kung aabot sa 80 dollars ang kada isang barrel ng krudo sa world market.

Ipinaliwanag na na sinasabi sa TRAIN Law na hindi puwedeng tapyasan o bawasan ang kasalukuyang sinisingil na excise tax.

Sa ilalim ng TRAIN Law, ang dagdag na excise tax sa petrolyo ay ipatutupad sa loob ng tatlong taon.

 (Ulat ni Jill Resontoc)

Isinusulong ng Associated Labor Union-Trade Union Congress of the Philippines o ALU-TUCP ang 800 peso nationwide minimum wage ng mga manggagawa bunsod ng patuloy na pagtaas ng presyo ng mga bilihin dulot ng Tax Reform for Acceleration and Inclusion o TRAIN Law.

Ayon kay ALU-TUCP Spokesman Alan Tanjusay, kailangan nang itaas ang national minimum wage dahil nakaaalarma na ang pagsirit ng presyo ng mga bilihin na sinabayan pa ng pagtaas ng inflation sa 4.5 percent.

Bumababa na rin anya ang “purchasing power” o tunay na halaga ng 512 pesos na kasalukuyang minimum wage sa National Capital Region.

Bukod sa pagtaas ng sahod, humiling din ang grupo ng limandaang pisong subsidiya sa lahat minimum wage earner.

Samantala, inatasan na ni Labor Secretary Silvestre Bello III ang Regional Wage Boards sa buong bansa na magpulong at talakayin ang sitwasyon.

Gayunman aminado si Bello na hindi makakasapat o uubra ang cash subsidy para tugunan ang pangangailangan ng mga ordinaryong manggagawa na higit na apektado ng reporma sa buwis.

Dahil dito, tiniyak ni Bello na patuloy ang kanilang pag-aaral para matukoy pa ang ibang paraan kung paano matutulungan ang manggagawang Pinoy.

—-