HOT STORIES OF THE WEEK

Posibleng umabot sa 4.6 hanggang 5.4 percent ang inflation rate o paggalaw ng presyo ng mga pangunahing bilihin ngayong Mayo.

Kumpara ito sa 4.5 percent na naitalang inflation rate noong Abril.

Ito, ayon sa Department of Economic Research ng Bangko Sentral ng Pilipinas, ay dahil sa epekto ng patuloy na pagtaas ng presyo ng mga produktong petrolyo sa gitna nang walang tigil na kaguluhan sa middle east.

Gayunman, bahagyang makaluluwag ang mga consumer dahil sa inaasahang pagbaba ng singil sa kuryente partikular ng Meralco sa oras na magsimula ang tag-ulan.

Samantala, tiniyak naman ng BSP na mananatili silang mapagmatyag sa presyo ng mga pangunahing bilihin.

Mananatiling tourist destination ang Boracay Island.

Tiniyak ito ni Department of Interior and Local Government o DILG Undersecretary Epimaco Densing III sa kabila ng deklarasyon ng Pangulong Rodrigo Duterte na isang agrarian reform area ang isla.

Ayon kay Densing, layon lamang ng Pangulo na maipamahagi sa mga tunay at matagal nang nakatira sa Boracay ang mga lupain sa isla.

Ang dapat lamang aniyang gawin ng mga establisimiyentong nasa Boracay ay mag-apply para sa land conversion.

“Wala namang sinasabi si President Duterte na itigil ang turismo diyan, ang pahayag niya ay gusto niyang ibalik sa Boracaynon ang Boracay, bigyan sila ng lupang titirhan, ang palagay ko nga diyan baka gusto niyang ang taumbayan na ang mag-operate ng Boracay bilang isang tourist destination, at hindi na itong mayayaman, mga oligarkiya na korporasyon na sila lang ang kumikita, more than 1 billion dollars ang gross receipts sa isla ng Boracay, consistent ‘yan over the past years pero ang tao diyan mahirap pa rin.” Ani Densing

Positibo si Densing na muling bubuksan sa mga turista ang Boracay sa Oktubre o pagkatapos ng itinakdang anim na buwang rehabilitasyon.

Marami aniya sa mga establisimiyentong mayroong violation ay nakapagbaklas at tuloy-tuloy naman ang mga proyektong isinasagawa ng pamahalaan para maisaayos ang Boracay.

“On course po tayo, in fact ‘yung circumferential road diyan ay inumpisahan nang sementuhan, marami sa ating mga kababayang negosyante nagpapasalamat po kami na sila’y nakisama, nakiisa, nagkaroon na ng mga self demolitions, may ilan lang p ong pasaway, balak po natin kapag hindi pa rin sila sumunod sa ating mga ordinansa at batas, by October hindi natin sila papayagang mag-operate kapag binuksan na muli ang isla sa mga turista.” Pahayag ni Densing

(Ratsada Balita Interview)

Kapwa lusot na sa ikatlo at huling pagbasa sa Senado at Kamara ang panukalang Bangsamoro Basic Law (BBL) na pinaniniwalaang susi para matamo ang pangmatagalang kapayapaan sa Mindanao.

Madaling araw kanina nang aprubahan ng Senado ang kanilang bersyon kung saan, 21 ang pabor at walang tumutol o nag-abstain.

Habang sa Kamara, 226 na mga mambabatas ang bumoto para ipasa ang kanilang bersyon ng BBL, 11 ang tumutol at dalawa ang nag-abstain.

Magugunitang sinertipikahang urgent ni Pangulong Rodrigo Duterte ang BBL upang ganap nang masimulan ang pagtatatag ng isang bagong Bangsamoro Region kapalit ng kasalukuyang Autonomous Region in Muslim Mindanao.

Pagpasa sa BBL, sadyang inihabol para sa SONA – Analyst

Tila inapura ng administrasyon ang pagpasa ng Bangsamoro Basic Law sa dalawang kapulungan ng Kongreso upang maihabol sa State of the Nation Address o SONA ni Pangulong Rodrigo Duterte.

Iyan ang pananaw ng Political Analyst na si Atty. Tony Laviña upang maihabol umano sa mga accomplishment ng administrasyon lalo’t ito ang unang hakbang para maisulong ang plano ng Pangulo na itaguyod ang pederalismo sa bansa.

Kasunod nito, pinayuhan naman ni Atty.Laviña ang mga mambabatas na mag-ingat sa pag-aapruba lalo na sa mga kontrobersyal na amendments lalo’t may mga nakikita siyang probisyon dito na labag sa Saligang Batas.

Magugunitang kapwa inihabol ng dalawang kapulungan ng Kongreso ang pagpasa sa ikatlo at huling pagbasa ang BBL matapos itong sertipikahang urgent ng Punong Ehekutibo.

—-

Matapos sertipikahang urgent ni Pangulong Duterte, magkasunod na inaprubahan sa ikalawa at ikatlo at huling pagbasa ang House bill 6475 o ang Bangsamoro Basic Law o BBL.

Sa botong 226 YES, 11 NO at 2 abstention ay nailusot na rin sa Kamara ang BBL.

Sa ilalim ng BBL ay bubuwagin ang Autonomous Region in Muslim Mindanao at papalitan ito ng Autonomous Region of Bangsamoro o ARB.

Bago napagbotohan ang BBL, pinalitan ito ng substitute bill kung saan lahat ng probisyong napagkasunduan dito ay mula sa nakalipas na all member caucus.

Sa ilalim ng BBL, isang beses na lamang magkakaroon ng plebesito na isasagawa sa loob ng 90 days hanggang 120 days matapos pirmahan ng Pangulo bilang batas.

Magkakaroon ng sariling Bangsamoro Military Command at Bangsamoro Police pero ito ay sa ilalim pa rin ng AFP at PNP.

Hindi ito bubuuhin ng MILF pero bukas naman na mag-apply ang MILF members para maging sundalo at pulis.

Mananatili ang sistema ng Shariah court sa ARB at magkakaroon ng sariling Appelate Court pero pwedeng iapila ang desisyon ng mga ito sa Korte Suprema para sa pinal na hatol.

Nasa national government pa rin ang kontrol sa aspeto ng defense and external security, foreign policy, monetary policy, citizenship, naturalization, immigration at customs and tariff.

Magkakaroon ng block grant sa ARB mula sa national government para tulungan ito sa pag-unlad pero ito ay katumbas lamang ng 5% ng kita ng gobyerno kada taon.

Ulat ni Jill Resontoc (Patrol 7)

May nawala na umanong isla ang Pilipinas sa ilalim ng administrasyong Duterte.

Iyan ang ibinunyag ni Magdalo Partylist Representative Gary Alejano bilang pagkagat sa hamon ni Foreign Affairs Secretary Alan Peter Cayetano.

Ayon kay Alejano, may mga hawak siyang ebidensya na nagpapatunay na napunta na sa kontrol ng Tsina ang Sandy Cay o isla ng Bailan na bahagi ng Pagasa Island.

Giit ni Alejano, Agosto pa umano nuong isang taon nang postehan at palibutan ang Sandy Cay ng mga barko ng Tsina gayundin ng mga mangingisdang Tsino.

Ang Sandy Cay o Bailan Islet ay bahagi ng mga maliliit na isla, sand bars at bahura na nasa paligid ng Pagasa Island na pinakamalaking isla sa Spratlys na nasa ilalim ng teritoryo ng Pilipinas.

Magugunitang naghamon si Cayetano sa mga kritiko na magbibitiw siya sa puwesto kung mapatutunayang may nawalang isla sa ilalim ng administrasyong Duterte.

—-

Ikinatuwa ng Malacañang ang pagkakalusot ni Department of Tourism Secretary Bernadette Romulo-Puyat sa makapangyarihang Commission on Appointments.

Ayon kay Presidential Spokesman Harry Roque, tiwala silang mapapalakas pa ni Puyat ang mga repormang kanilang ipatutupad sa sektor ng turismo sa bansa.

Dagdag pa ni Roque, mahalagang industriya aniya ang turismo para sa pagpapalago ng ekonomiya gayundin ang pagbibigay ng kabuhayan para sa mga Pilipino.

Naniniwala rin ang Palasyo na maayos na magagawa ni Puyat ang kaniyang tungkulin bilang kalihim ng DOT sa harap na rin ng bilin sa kaniya ni Pangulong Rodrigo Duterte na linisin ang ahensya mula sa katiwalian.

Matatandaang, mabilis na lumusot sa committee level ng Commission on Appointments si Puyat.

Matapos na magbigay ng opening statement ni Puyat ay hindi na ito tinanong pa ng mga miyembro ng CA bagkus ay agad na inindorso ang kumpirmasyon nito sa komite.

Naging masaya si Puyat sa bilis ng pangyayari lalo’t naging sobra ang kanyang kaba nang sumalang sa CA.

Samantala, nirerepaso na ni Puyat ang performance ng mga under at assistant secretary ng ahensya.

Ayon kay Puyat, paraan niya ito upang makita at makilatis kung karapat-dapat ang naturang mga indibiduwal para sa posisyon.

Kabilang dito ayon kay Puyat si Undersecretary Kat de Castro na una nang napaulat na kinukuha ang serbisyo ng banda kung saan kabilang ang kanyang kasintahan para sa mga event ng DOT.

Nanatili pa rin De Castro sa ahensya sa kabila ng naging panawagan ng bagong kalihim na magpasa ng courtesy resignation ang mga Asec at Usec upang mabigyan sya ng freehand na magtalaga ng bago para sa posisyon.

—-