HOT STORIES OF THE WEEK

Tuloy-tuloy ang hiring ng Department of Education o DepEd ng mga bagong guro para sa school year 2018 – 2019.

Ayon kay Education Undersecretary Tonisito Umali, nasa mahigit walumpung libong (80,000) bagong guro ang target nilang makuha ngayong taon na layong mapababa pa ang teacher-student ratio lalo na sa mga paaralang may malaking populasyon ng mga estudyante.

Gayunman, nilinaw ni Umali na sapat ang mga guro sa buong bansa.

Sa tala ng DepEd, mayroon silang humigit kumulang pitong daang libong (700,000) teaching personnel habang mahigit pitongdaan at limampung libo (750,000) naman ang non-teaching personnel.

“Dahil gusto po natin mahilang pababa ang ratio further to the following, 1 is to 25 sa lahat ng kindergarten classes natin, ayaw natin na may kindergarten class na lumalagpas sa 25, 1 is to 35 for Grades 1 to 3, ‘yan po ang ideal ration na gusto nating makuha teacher to pupil ratio, 1 is to 40 for Grades 4 hanggang senior high school, gusto natin na maski pagdating ng Grades 4 to 6 pa lamang, ‘yun dati nating ginagawa na isang guro lamang para magturo lahat ng asignatura mula kinder hanggang Grade 6, gusto natin mabago ‘yan though nabago na natin ‘yan dati pero gusto natin sa lahat ng paaralan na may 5 guro na nagtuturo sa tatlong section.” Ani Umali

Samantala, patuloy namang hinihikayat ng DepEd ang mga nagtapos ng kursong edukasyon na magturo dito sa Pilipinas at maging bahagi ng programa ng DepEd.

“Kaya nga meron tayong programa kasama ang DOLE na bumalik sana ang lahat ng guro o ang mga nakatapos ng Education hinihikayat nating bumalik para po makapag-kuha sila ng licensure examination for teachers  para makakuha sila ng lisensya na makapagturo sa ating basic education schools, pero sa mga guro na, meron po tayong programa na “Sa Pinas, Ikaw ang Sir at Ma’am”, meaning dito sa ating bansa ikaw ang tinatawag na Sir at Ma’am na hindi po nangyayari kung nandiyan tayo sa ibang bansa.” Pahayag ni Umali

(Ratsada Balita Interview)

Inaasahang lalagdaan ni Pangulong Rodrigo Duterte ang Bangsamoro Basic Law o BBL kasabay ng kanyang State of the Nation Address o SONA sa Hulyo.

Ito ay matapos na maipasa ang BBL sa mababa at mataas na kapulungan ng Kongreso kasunod nang naging aksyon ng Pangulong Rodrigo Duterte na setipikahang urgent ang naturang panukalang batas.

Sinabi ni Presidential Spokesman Harry Roque, paplantsahin na lamang ng dalawang kapulungan ng Kongreso ang pagkakaiba ng kanilang bersyon sa gagawing Bicameral Conference Committee.

Mahalaga aniyang mapagkasunduan ng Kamara at Senado ang kanilang bersyon upang matugunan ang mga kuwestiyon sa legalidad o constitutionality ng panukalang batas bago lagdaan ng Pangulo.

Kumpiyansa ang Palasyo na kung ganap nang magiging batas ang BBL ay posible nang makamit ang kapayapaan sa Mindanao at maiwasan na muling pumutok ang kaguluhan sa rehiyon.

—-

Nananalig ang Moro Islamic Liberation Front sa pangako ni Pangulong Rodrigo Duterte na maisasama sa kaniyang State of the Nation Address sa Hulyo ang pagiging ganap na batas ng panukalang Bangsamoro Basic Law.

Kaugnay nito, sinabi ni Bangsamoro Transition Commission Head at MILF Vice Chairman for Political Affairs Ghadzali Jaafar na ipinauubaya na nila Kongreso ang pagsasakatuparan ng BBL.

Ipinunto ni Jaafar na nakita naman nila ang mga ginagawang pagsusumikap ng administrasyon para isulong ang nasabing panukala na pinaniniwalaang susi para matamo ang ganap na kapayapaan sa Mindanao.

Kasamang nakipag-puyatan ng mga Senador si Jaafar sa isinagawang debate hinggil sa BBL kamakalawa kung saan ipinasa sa ikatlo at huling pagbasa ang nasabing panukala.

Nagkasundo ang Pilipinas at China na maayos nilang paplantsahin ang gusot hinggil sa agawan ng teritoryo sa West Philippine Sea.

Ito ang inilathala sa Chinese State Run Xinhua News Agency batay sa isang pahayag mula sa Department of Boundary and Ocean Affairs ng China.

Lumabas ang ulat kasunod ng nangyaring pulong sa pagitan nila Director General Yi Xian Liang kina Foreign Affairs Secretary Alan Peter Cayetano at Undersecretary Enrique Manalo.

Nagkasundo rin umano ang dalawang bansa na panatilihin at protektahan ang kapayapaan at katatagan sa South China Sea.

Magugunitang kinumpirma kahapon ng Malacañang na naghain na ng protesta ang Pilipinas sa China kaugnay ng ginagawa nilang militarisasyon sa bahaging iyon ng karagatan.

—-