HOT STORIES OF THE WEEK

Kaagad ilalabas sa merkado ngayong linggo ang mga inangkat na bigas mula sa Thailand at Vietnam.

Ito ayon kay National Food Authority o NFA Spokesman Rex Estoperez ay kapag naayos na nila ang mga dokumento kaugnay sa mga dumating nang bigas sa Subic at Surigao.

Sinabi sa DWIZ ni Estoperez na nasa 220,000 bags ng bigas ang nasa Subic na at 100,000 bags naman sa Surigao.

“Ang unang bugso ay dumating sa Subic at Surigao, Mindanao area. Inaayos na lang po ang mga papeles, pagkababa niyan diretso po ‘yan sa mga merkado.” Ani Estoperez

Dahil dito inaaasahang makakabili na ng NFA rice sa merkado anumang araw sa linggong ito.

Sinabi ni Estoperez na nasa biyahe na ang iba pang inangkat na bigas at bago mag-June 15 ay maibababa na rin sa Pilipinas ang kabuuang bilang ng mga inangkat na bigas.

“Ang iba pang parating na bigas lalong-lalo na sa Metro Manila ay nasa laot na po within this week may mararamdaman na tayong NFA rice sa mga pamilihan.” Pahayag ni Estoperez

(Ratsada Balita Interview)

Dinoble ng South Korea sa isang bilyong dolyar ang ipinangako nitong official development assistance sa Pilipinas mula sa naunang limang daang (500) milyong dolyar.

Ito ang inihayag ni Finance Secretary Carlos Dominguez kasunod ng isinagawang bilateral talks sa pagitan nina Pangulong Rodrigo Duterte at South Korean President Moon Jae In sa Blue House sa Seoul.

Dagdag ni Dominguez, bukod sa ipinangakong official development assistance, magbibigay din aniya ng tulong ang South Korea para sa rehabilitasyon ng Marawi City.

Una nang sinabi ni Philippine Ambassador to Seoul Raul Hernandez, ang South Korea ang ika-limang pinakamalaking official development assistance partner ng Pilipinas kung saan umabot na sa limang daang at pitumpung (570) milyong dolyar ang ipinautang at ipinagkaloob nito sa bansa.

—-

Nakatakdang talakayin ng Korte Suprema ang inihaing mosyon ni dating Chief Justice Maria Lourdes Sereno kaugnay ng pagpapatalsik sa kanya sa puwesto, ngayong araw.

Ayon kay acting Chief Justice Antonio Carpio, kasama sa full court agenda ng Korte Suprema ang inihaing mosyon ni Sereno noong nakaraang linggo.

Dalawang aksyon naman ang posibleng gawin ng mga mahistrado hinggil dito, kabilang ang pagresolba sa motion ni Sereno o ang hingan ng komento si Solicitor General Jose Calida hinggil dito.

Batay naman sa dalawang daan at limang (205) pahinang mosyon ni Sereno, iginiit nito na nabalewala, isinantabi at binaligtad ng Korte Suprema ang basic, fundamental at matagal nang naitatag na Saligang Batas nang pagpasiyahan nitong i-disqualify at patalsikin siya sa puwesto bilang Chief Justice.

Dagdag ni Sereno, magdudulot din aniya ng pagkasira sa kalayaan ng hudikatura at separation of powers ang naging pasya din ng Korte Suprema.

Binigyang diin din ng dating Punong Mahistrado na tanging Senado lamang ang maaaring magtanggal sa posisyon ng isang impeachable officials.

—-

Ibinunyag ng Philippine Drug Enforcement Agency o PDEA na may 91 indibiduwal na kasalukuyang naka-puwesto sa pamahalaan ang kabilang sa kanilang listahan ng mga sangkot umano sa ipinagbabawal na gamot.

Ayon kay PDEA Director General Aaron Aquino, mula sa nasabing bilang, anim hanggang pito rito ay pawang mga mambabatas mula sa Kamara kung saan, isa rito ang mula sa Region 3.

Maliban dito, isiniwalat din ni Aquino na may isa pang opisyal na humahawak ng posisyong bise gubernador ang kabilang din sa kanilang narco-list.

Sinabi ng PDEA Chief na hinihintay na lang nila ang basbas mula kay Pangulong Rodrigo Duterte kung kanila itong ilalabas sa publiko bagama’t nasa revalidation stage pa rin ang naturang listahan, inaasahan nilang matatapos ito sa loob lamang ng dalawang linggo.

Magugunitang inilabas kamakailan ng PDEA ang kanilang narco-list ng mga opisyal ng barangay na sangkot sa ipinagbabawal na gamot upang magsilbing gabay ng mga botante sa nakalipas na barangay at SK elections noong isang buwan.

—-

Umapela si Pangulong Rodrigo Duterte sa lahat ng mga may-ari ng minahan na maawa sa bayan at limitahan ang pagsira sa kalikasan.

Sa kanyang talumpati sa Filipino community sa South Korea, sinabi ng Pangulo na kinakailangan aniya na magkaroon ng kompromiso para tiyakin na mapangangalagaan ang kalikasan para sa mga Pilipino.

Dahil dito, ibinabala ng Pangulo ang papasara sa mga open pit mining kung patuloy aniya itong magsasawalang bahala sa kapakanan ng nakararami.

Iyang open pit mine, it’s destroying the country. Baka ipasara ko talaga ang mining na open pit. A lot of places in the Philippines where mining is being done, polluted na ‘yung tubig, walang problema ‘yan sa mga mayayaman, ang problema ko ‘yung marine life para sa mga fisher folk. Pahayag ni Pangulong Duterte

Humingi ng paumanhin si Pangulong Rodrigo Duterte sa gobyerno ng Kuwait dahil mga masasakit na salitang nasabi niya sa gitna na rin ng hindi pagkakaunawan ng Pilipinas at ng nasabing bansa.

Sa kanyang naging talumpati bago tumulak patungong South Korea, sinabi ni Pangulong Duterte na resulta lamang ng matinding emosyon ang mga hindi magagandang salitang nasambit niya laban sa Kuwait.

Kasabay nito, pinasalamatan ni Pangulong Duterte ang Kuwaiti government sa pag-apruba nito sa lahat ng nilalaman ng inilatag na memorandum of agreement ng Pilipinas hinggil sa karapatan ng mga Filipino workers doon.

Nag-ugat naman ang hindi pagkakaunawaan ng dalawang bansa matapos na matagpuan sa loob ng freezer sa isang abandonadong apartment sa kuwait ang bangkay ng OFW na si Joanna Demafelis.

Gayundin, nang hindi magustuhan ng Kuwaiti government ang isinagawang rescue operations ng embahada ng Pilipinas sa dalawang distressed OFW sa nasabing bansa.

This is the first time that I would say that I was harsh in my language, maybe that was because a result of an emotional outburst, that I would like to apologize. I’m sorry for the language that I was using. I am very satisfied by the way you responded to the problems of my country. Pahayag ni Pangulong Duterte

Pangulong Duterte, nakatakdang makipag-pulong kay South Korean President Moon Jae In

Nakatakdang pag-usapan ng nila Pangulong Rodrigo Duterte at South Korean President Moon Jae In ang isyu sa Korean peninsula bilang bahagi ng pagpapa-angat sa antas ng kooperasyon nito sa iba pang mga bansa sa Silangang Asya.

Iyan ang inihayag ni Philippine Ambassador to South Korea Raul Hernandez kasabay ng tatlong araw na official visit doon ng pangulo mula kahapon hanggang bukas, araw ng Martes.

Ayon pa kay Hernandez, bibigyang diin din ng Pangulo kay President Moon ang kahalagahan ng pagpapalakas sa ugnayan ng Pilipinas at South Korea sa aspeto ng defense and security, trade and investment gayundin ang political cooperation.

Bago umalis ang Pangulo sa bansa nitong Sabado, tiniyak nito na magiging mabunga ang kaniyang biyahe sa naturang bansa at nagpasalamat din siya sa mga Pilipinong naroon sa kanilang ambag para mapaigting ang relasyon ng dalawang bansa.

Tutulak na si Pangulong Rodrigo Duterte patungong South Korea, mamayang gabi.

Ayon kay Department of Foreign Affairs o DFA Undersecretary Ernesto Abella, pangunahing layon ng biyaheng ito ng Pangulo ay ang palakasin ang relasyon ng Pilipinas at SoKor na nasa pitumpung taon na sa susunod na taon.

Kabilang namn sa inaasahang tatalakayin sa mga pulong ng Pangulo sa South Korea ang mga usaping may kinalaman sa diplomatic relations, social, agriculture at environmental ccoperation.

Samantala, itinalaga ng Pangulo si Executive Secretary Salvador Medialdea bilang officer in charge habang wala ang Punong Ehekutibo sa bansa.

—-