HOT STORIES OF THE WEEK

Isinusulong ng isang mambabatas na isailalim din sa random drug testing ang mga miyembro ng media at kasuhan ang mga mapatutunayang lumabag.

Ito’y ayon kay Ako Bicol Party-list Representative Rodel Batocabe makaraang mapabilang ang media sa inilabas na updated ‘narco-list’ ng Philippine Drug Enforcement Agency o PDEA.

Giit ni Batocabe, mahalagang maisakatuparan ito upang malinis ng mga apektadong sektor ang kanilang hanay tulad ng mga mamamahayag.

Bagama’t hindi naman madaling matukoy sa drug test ang isang indibiduwal kung gumagamit man o hindi ang isang tao, may ilan naman aniya na hindi gumagamit ng droga subalit nagbebenta o nagtutulak nito.

Sa ngayon ay tumanggi pa ang PDEA na isapubliko ang listahan ng mga ‘narco-politician’.

—-

Hiniling ngayon sa Korte Suprema si Atty. Elly Pamatong na minsan na ring binansagang “Spike King” na maideklarang null and void ang pagkakahalal kay Pangulong Duterte sa Palasyo.

Sa limang pahinang quo warranto petition ni Pamatong, iginiit nito na na dapat ideklara ng Korte na null and void ang posisyon ng Pangulo, Pangalawang Pangulo at mga appointees ni Pangulong Duterte.

Depensa nito na iligal ang Certificate of Candidacy o COC ni Duterte dahil mismong ang Pangulo na aniya ang umamin noon na ang pagtakbo nito sa pagka-Pangulo ay walang aprubadong COC.

Ayon kay Pamatong, base sa record ng Comelec, bago pa ang May 9, 2016 elections, umatras si Duterte sa kanyang kandidatura bilang mayor ng Davao na sinundan ng paghahain nito ng COC sa pagka-Pangulo.

Paniwala ni Pamatong, hindi pa naglalabas ng pinal na desisyon ang Comelec sa COC ni Duterte nang kumandidato itong Pangulo.

Sa ilalim ng rules of court, ang maari lamang maghain ng quo warranto petition ay ang Solicitor General, mga public prosecutor, at ang sinumang indibidwal na napagkaitan ng kanyang posisyon sa gobyerno matapos itong okupahan ng iba.

Magkahalong galit at inis ang naramdaman ni Associated Labor Unions-Trade Union Congress of the Philippines o ALU-TUCP Spokesman Alan Tanjusay sa tinukoy ng economic managers na sampung libong pisong (P10,000) budget ng isang pamilya kada buwan.

Sinabi sa DWIZ ni Tanjusay na halos hindi siya nakatulog sa nasabing pahayag ng economic managers na aniya’y hindi nagpapakita ng tunay na kalagayan ng mga Pilipino.

Naniniwala si Tanjusay na tila paper study ang ginamit sa nasabing figures na sadyang hindi sasapat o kulang na kulang para mabuhay ang isang pamilya.

Idinagdag din na salat sa katotohanan at realidad ang inilabas na data ng National Economic and Development Authority o NEDA.

Ayon kay Tanjusay tila lalo pang pinababa ng gobyerno ang kalidad ng buhay ng mga Pilipino matapos mismong itakda ang aniya’y baluktot na panuntunan.

“Out of touch talaga ang gobyerno natin so nakakainis, gobyerno pa man din ang nagpo-promote nitong napakababa at napaka-baluktot na standard, kung ganito ang pamantayan natin, kung ganito ang standard natin, aba eh goodluck, goodbye sa mga Pilipinong mahihirap, paano natin silang maiangat sa kahirapan kung ganito, ang gobyerno mismo ang nagbibigay ng napakababang kalidad ng quality ng kanilang buhay.” Ani Tanjusay

Kaugnay nito, binalaan ng ALU-TUCP ang gobyerno sa anito’y malaking posibilidad na pag-aaklas ng mga Pilipino.

Sinabi sa DWIZ ni ALU-TUCP Spokesman Alan Tanjusay na hindi dapat sagarin ng gobyerno ang mga Pilipino lalo’t pahirap ng pahirap ang buhay at wala nang inaasahang pag-angat pa sa buhay.

“Saan na tayo pupulutin nito so binabalaan ko ang ating government officials huwag nating sagarin ang mga Pilipinong mahihirap, kapag sinagad mo ang mga ‘yan at wala na silang mapupuntahan, wala na silang proseso, sinaraduhan na natin sila ng proseso sa Kongreso, binabara natin sila sa proseso ng wage board, at inaapi sila sa paglabas ng ganito kababang standard, eh wala kaming magagawa kaming labor organizations kapag ang mamamayang Pilipino ay mag-aklas, magwala, na talagang ouit of control dajhil sa kahirapan.” Pahayag ni Tanjusay

Una rito ay inihayag ng NEDA na sapat na ang sampung libong pisong (P10,000) suweldo ng mga manggagawa sa isang buwan para magkaroon ng disenteng buhay ang isang pamilya na may limang miyembro.

Ito ay sa harap na rin ng hinaing sa pagtaas ng presyo ng mga bilihin at serbisyo o inflation.

Ayon kay NEDA Undersecretary Rosemarie Edillon, batay sa kanilang pagtaya, aabot sa isandaan at dalawampu’t pitong piso (P127) lamang bawat araw ang kailangang ilaan ng isang pamilya para sa pagkain.

(Balitang Todong Lakas Interview)

Nagtakda na ng oral arguments ang Korte Suprema sa petisyon ng   anim na  opposition senators na sina Francis Pangilinan, Franklin Drilon, Paolo Benigno “Bam” Aquino, Leila De Lima, Risa Hontiveros at Antonio Trillanes  na kumukwestiyon sa pagkalas ng Pilipinas sa Rome Statute ng International Criminal Court o ICC.

Itinakda ang oral arguments sa Hulyo 24, ganap na alas-2:00 ng hapon sa Supreme Court session hall.

Binigyan din ng Korte Suprema ang mga respondent na kinabibilangan nina Foreign Affairs Secretary Alan Peter Cayetano, Executive Secretary Salvador Medialdea, Philippine Permanent Representative to the United Nations Teodoro Locsin at Chief Presidential Legal Counsel Salvador Panelo ng sampung araw nang walang palugit.

Ito’y upang  magsumite ng komento kaugnay ng inihaing petisyon ng mga petitioner.

Nauna ng nagpasya si Pangulong Duterte na kumalas sa ICC ang Pilipinas makaraang ianunsyo ng isa sa mga court prosecutor noong Pebrero  na sinimulan na ang preliminary examination sa reklamong crimes against humanity na inihain laban sa kanya ng ilang  kritiko dahil sa madugong drug war.

—-