HOT STORIES OF THE WEEK

Tinawag na pamimirata ni dating National Security Adviser at Congressman Roilo Golez ang pang-aagaw ng mga Tsino sa mga isdang hinuli ng mga Pilipinong mangingisda sa Panatag Shoal.

Ayon kay Golez, hindi diplomatic protest ang dapat ihain ng Pilipinas laban sa China kundi dapat silang kasuhan ng piracy.

Hindi na aniya dapat maulit ang karanasan ng bansa sa Scarborough Shoal kung saan nakakaranas ng pang-ha-harass ng Tsina ang mga mangingisdang Pilipino.

“Medyo kasi nanahimik tayo eh tapos nung ang mga Filipino fishermen ay nakapangisda na sa Scarborough Shoal parang lumalabas na pinayagan tayo, parang lumalabas na tinanggap natin ‘yung kanilang pagpayag sa atin na hindi naman nararapat kasi wala silang karapatan para payagan tayo dahil hindi kanila ang lugar na ‘yan, remember na during the early months nung finally ay hindi na hinaharang ang ating mga fishermen parang nagpapasalamat pa tayo sa kanila na pinayagan nila tayong mangisda.” Ani Golez

Iginiit ni Golez na hindi dapat gawing katwiran ng pamahalaan na baka sumiklab ang giyera kung kokontrahin nito ang Tsina.

Binigyang diin ni Golez na hindi war fare ang dapat gamitin laban sa china kundi law fare o mga batas na kinikilala sa buong mundo.

“Ang gagamitin mo ay batas at dito sa atin ang armas natin hindi missile, hindi warship, hindi mga eroplano, kundi batas, at ang batas ay nasa ating panig, andiyan ang UNCLOS, andiyan ang ruling ng Arbitral Tribunal, at kung sa mula’t mula pa ito’y ginamit natin, agad nating ipinaalam sa China na “oh kayo natalo kayo sa ruling, nasa aming panig ang batas, dapat bilang isang sibilisadong bansa irespeto niyo ang batas”, marami pong bansa ang tutulong sa atin.” Pahayag ni Golez

(Ratsada Balita Interview)

Nakatakdang maghain ng reklamo ang Pilipinas sa China kaugnay ng ulat ng panibagong harassment na dinaranas ng mga Pilipinong mangingisda mula sa kamay ng Chinese Coast Guard na nakaposte sa Scarborough o Panatag Shoal.

Ayon kay Presidential Spokesman Harry Roque, dapat hinahayaang maghanap buhay ang mga Pinoy sa naturang karagatan bunsod na rin ng naging pag-uusap nila Pangulong Rodrigo Duterte at Chinese President Xi Jinping.

Batay sa report, puwersahang kinukuha o hinihingi ng mga Tsino ang mga huling isda ng mga Pilipino na nangingisda sa paligid ng naturang bahura na mahigit dalawandaang (200) kilometro ang layo mula sa bayan ng Masinloc, Zambales.

Bagama’t pasok na sa exclusive economic zone o EEZ ng Pilipinas ang Scarborough Shoal patuloy pa rin itong binabantayan ng Chinese Coast Guard na umaangkin sa naturang bahura.

Magugunitang ibinunyag ni Magdalo Party-list Representative Gary Alejano ang ginagawang pangha-harass ng mga Tsino sa naturang bahura, tila ipinagkikibit-balikat lamang iyon ni Foreign Affairs Secretary Alan Peter Cayetano sa kanilang paghaharap sa pagdinig ng Kamara kamakailan.

—-

Pinabulaanan ni Pangulong Rodrigo Duterte ang usap-usapang posibleng bahagi ng kaniyang isusulong na “radical change” ang pagdedeklara ng nationwide martial law.

Sa isang panayam ng Pangulo sa Cebu International Airport, sinabi nito na hindi magiging maganda ang epekto sa bansa kung sakaling magdeklara siya ng batas militar kaya’t hindi niya ito gagawin.

“No, martial law is not feasible. It won’t work. First of all, it’s going to be a divided nation so I don’t know if everyone will agree with [that]. I might think of something else.”

“I have declared national emergency already, it’s existing. In other countries, national emergency is equated with martial law. But we have our unique style of handling national emergency.” Ani Pangulong Duterte

 

“I will deal first with government, I will have to fix the PNP (Philippine National Police). There is so much corruption and then I will deal with the local government, especially the complacency and nonchalant attitude towards the problem of criminality” Pahayag ng Pangulo

Dagdag pa ni Pangulong Duterte, ipinatupad niya ang martial law sa Mindanao dahil sa pangangailangan bunsod ng sitwasyon at ito ay naging epektibo dahil walang umaabusong mga opisyal ng gobyerno gaya ng nangyari nuong panahon ni dating Pangulong Ferdinand Marcos.

Kaugnay nito, tiniyak ni Pangulong Duterte na hindi mauulit ito sa kaniyang termino.

—-

Tila kumambiyo na ang National Economic and Development Authority o NEDA.

Ito’y makaraang sabihin ni NEDA Secretary Ernesto Pernia na sapat na umano para sa pamilyang may limang miyembro ang 42,000 pisong sahod kada buwan upang makapamuhay ng kumportable.

Ginawa ni Pernia ang paglilinaw matapos na ulanin ng batikos si NEDA Undersecretary Rosemari Edillon na nagsabing sampung libong piso (P10,000) kada buwan ang kinakailangan ng bawat pamilya para mabuhay ng maayos at disente.

Binigyang diin ni Pernia na hypothetical lamang ang inilabas ni Edillon kung kukuwentahin aniya sa epekto ng inflation rate sa bansa na pumalo na sa 4.6 percent nitong Mayo.

Gayunman, binigyang diin ni Pernia na hindi niya inirerekomendang taasan agad ang sahod ng mga manggagawa nang hindi dumaraan sa masusing pag-aaral.

Posible aniya kasing magresulta lamang iyon sa mas mataas na inflation rate at hindi aniya iyon makabubuti para sa nakararaming Pilipino.

—-

Tiniyak ng Regional Wage Board na kumikilos sila kaugnay sa hirit na umento sa minimum wage ng mga manggagawa sa bansa.

Ayon kay National Wages and Productivity Commission Executive Director Maria Criselda Sy , tinalakay nila sa ginawa nilang pagpupulong noong Hunyo 5 ang inihaing panukala ng Kamara na nagtatakdang gawing 750 pesos ang minimum wage ng mga empleyado sa Pilipinas.

Nabatid na bukod sa nasabing panukala ng mababang kapulungan ng Kongreso, mayroon pang apat na petisyon na inihain para sa minimum wage hike.

Gayunman , giit ni Sy, regular ang pag-re-review nila sa minimum wage ng mga manggagawa, alinsunod sa kanilang mandato na magtakda ng wastong suweldo sa mga nasa pribadong sektor.

—-

Pinawi ng Malacañang ang pangambang magdeklara ng state of national emergency ang Pangulong Rodrigo Duterte dahil sa paglala ng kriminalidad.

Ayon kay Presidential Spokesman Harry Roque, sentimyento lamang ito ng Pangulo dahil tila hindi pa sapat ang pagsisikap ng pamahalaan na masugpo ang kriminalidad.

Nag-ugat aniya ang ganitong sentimyento ng Pangulo nang makita ang balita hinggil sa pagkakapatay sa buntis na Ombudsman prosecutor.

Sinabi ni Roque na bagamat nasabi ng Pangulo ang hinggil sa state of national emergency ay umiiral pa naman ngayon ang martial law sa Mindanao.

Posible aniyang ang tinutukoy na radikal na pagbabago ng Pangulo ay ang mas pinaigting nilang kampanya kontra kriminalidad.

—-