HOT STORIES OF THE WEEK

Sinalubong ng hiyawan ng mga raliyista ang pagsisimula ng talumpati ng Pangulong Rodrigo Duterte sa selebrasyon ng Araw ng Kalayaan sa Kawit, Cavite.

Humalo sa mga dumalo sa okasyon ang mga raliyista at saka paulit-ulit na isinisigaw ang mga katagang “Huwad na kalayaan, Duterte patalsikin.”

Dahil dito, sinimulan ng Pangulo ang kanyang talumpati sa pagsasabing, ginagarantiyahan ng konstitusyon ang kalayaan sa pagpapahayag kaya’t dapat itong igalang.

“Our constitution guarantees freedom of the press, freedom of assembly and freedom of expression. I will understand.  Mahal ko kahit ang mga nag-protesta.”

“We might not understand each other but we have a common denominator, our love for country.” Pahayag ng Pangulong Duterte

—-

Maituturing na pinaka-seryosong banta sa Pilipinas ang panghihimasok ng Tsina sa West Philippine Sea mula noong ikalawang digmaang pandaigdig.

Iyan ang binigyang diin ni Vice President Leni Robredo kasunod ng napaulat na panlilimas umano ng Chinese Coast Guard sa mga huling isda ng mga mangingisdang Pilipino sa Scarborough o Panatag Shoal.

Giit ng Pangalawang Pangulo, hindi lamang mga bahura ang nawala sa Pilipinas kung hindi ang mismong soberanya o karapatan ng bansa sa naturang teritoryo na pinagpasyahan na mismo ng International Arbitral Court.

Dagdag pa ni Robredo, hindi na lamang aniya iyon usapin ng pang-aagaw ng teritoryo kung hindi ang talamak na pang-aagaw sa karapatang mabuhay ng maayos at marangal mula sa mga yamang hindi naman mapakinabangan ng mga Pilipino.

—-

Kinumpirma mismo ni National Security Adviser at National Task Force on the West Philippine Sea Chairman Hermogenes Esperon na sinira na ng mga mangingisdang Tsino ang likas-yaman sa loob ng pinagtatalunang Scarborough o Panatag Shoal.

Ito’y makaraang dumulog sa Malacañang ang mga mangingisdang Pilipino mula sa bayan ng Masinloc sa Zambales para iparating ang paglimas ng Chinese Coast Guard sa kanilang mga huling isda.

Ayon kay Esperon, naiparating na nila sa Chinese Government ang naturang pangyayari at tiniyak sa kanilang iimbestigahan nila iyon.

Una rito, inihayag naman ni Defense Secretary Delfin Lorenzana na kailangan munang maberipika ang naturang ulat bago sila magbigay ng pahayag kaugnay nito.

Isinisi naman ni Lorenzana sa administrasyong Aquino ang aniya’y mismanagement nito o ang hindi tamang pangangasiwa sa West Philippine Sea.

Binigyang diin ng kalihim na ang kawalan ng trade at turista mula sa China gayundin ang pagharang nila sa mga mangingisdang Pilipino ang dahilan kung bakit nagkaroon ng lamat ang relasyon ng dalawang bansa.

Samantala, iniimbestigahan na ng Chinese government ang napaulat na paglimas umano ng Chinese Coast Guard sa mga huling isda ng mga mangingisdang Pilipino sa Scarborough o Panatag Shoal.

Ayon kay Chinese Foreign Ministry Spokesperson Geng Shuang, naroon ang kanilang Coast Guard para panatilihin ang kaayusan at kapayapaan sa bahaging iyon ng karagatan alinsunod sa batas.

Kahapon, iniharap sa publiko ng Malacañang ang mga mangingisdang nakaranas ng panlilimas ng Chinese Coast Guard sa kanilang mga huling isda.

Ayon kay Romel Cejuela, tila kontrolado ng mga Tsino ang anumang yamang dagat na nakukuha ng mga Pilipino sa naturang karagatan.

Bagama’t una nang sinabi ng Palasyo na hindi isang uri ng harassment kung maituturing ang sinapit ng mga Pilipinong mangingisda sa kamay ng China, umapela naman si Cujuela kung maaari’y limitahan ng mga Tsino ang pagsampa sa kanilang mga Bangka.

—-

Nag-rally sa Taiwan ang mga Overseas Filipino Workers o OFWs upang igiit ang pantay na karapatan sa kanilang mga manggagawang dayuhan.

Nanawagan sa Taiwanese Ministry of Labor ang Migrante International sa Taiwan na isama sa nasasakupan ng Labor Standard Act ang mga OFWs.

Ayon kay Gilda Banugan, Chairperson ng Migrante International sa Taiwan, maraming OFWs ang namamatay sa mga trahedya subalit hindi nakakatanggap ng benepisyo mula sa labor insurance dahil hindi sila nasasakupan ng Labor Standard Act.

Una rito, nagsanib ang Migrante at isang non-government organization upang ipanawagan sa pamahalaan ng Taiwan na panagutin ang HTC Manufacturing Corporation sa di umano’y pagmamaltrato sa kanilang mga manggagawang Pilipino.

—-

Pasok ang Pilipinas sa dalawampung mga nangungunang bansa sa buong mundo sa listahan ng may pinakamaraming gumagamit ng internet.

Batay ito sa ipinalabas na report ng Internet World Stats kung saan umangat sa ika-labing dalawang ranggo ang Pilipinas mula sa ika-labing lima noong nakaraang taon.

Ayon sa Internet World Stats Report, 63 porsyento ng populasyon sa bansa o katumbas ng mahigit 67 milyon mula sa isang daan at apat (104) na milyong Filipino ang mga maituturing na social media savvy o madalas na gumagamit ng internet sa kabila ng pagiging mabagal nito.

Nangunguna naman sa nasabing listahan ang China kung saan aabot sa mahigit 700 milyon ng kabuuang mahigit isang bilyong populasyon nito ang internet users.

Sinusundan naman ito ng India at pumapangatlo ang Estados Unidos.

—-

Nanguna ang Calabarzon sa may pinakamaraming insidente ng riding in tandem sa bansa.

Batay sa datos ng Philippine National Police – Directorate for Investigation and Detective Management o DIDM, mula October 11 hanggang June 4, nakapagtala ang Calabarzon ng 135 riding in tandem incidents.

Sinundan ng Central Visayas na may 110 at Metro Manila na may 107.

Ayon kay Police Director Elmo Sarona, Hepe ng DIDM, base sa kanilang intelligence, maraming criminal gangs sa Calabarzon.

Nanguna naman ang Soccsksargen o Central Mindanao sa may pinakamaraming naresolbang kaso ng riding in tandem.

Sa 83 insidente na naiatala sa kanilang lugar 51 ang naresolba nila.

Central Luzon naman ang may pinakamababang crime solution efficiency kung saan sa lahat ng hawak nilang kaso ng riding in tandem, 7.02% lang ang kanilang naresolba.

—-