HOT STORIES OF THE WEEK

Isa namang bagong pag-aaral ang nagkumpirma na mataas ang panganib na magkaroon ng severe dengue ang mga batang hindi pa nagkakaroon ng dengue subalit nabakunahan ng Dengvaxia.

Ang bagong pag-aaral na inilathala sa New England Journal of Medicine ay pagpapatibay sa rekomendasyon ng World Health Organization (WHO) na hindi dapat ibigay ang Dengvaxia sa mga hindi pa nagkakaroon ng dengue.

Batay sa kalkulasyong ginawa ng pag aaral, kung ibibigay sa isang milyong bata na may edad siyam na taong gulang ang Dengvaxia, posibleng makaiwas sa hospitalization ang labing isang libong bata at dalawang libo limandaang kaso ng severe dengue.

Gayunman, maaari naman anila itong maging sanhi ng isang libong hospitalizations at limandaang kaso ng severe dengue.

—-

Pinamamadali na ng Una ang Edukasyon Party-list group ang pagpasa sa kanilang panukala na baguhin na ang guidelines sa pagsuspindi ng klase kapag may kalamidad.

Ayon kay Una ang Edukasyon Party-list Representative Salvador Belaro, hindi na naaayon sa panahon ang isinasaad ng Executive Order 66 na siya pa ring ginagamit na basehan sa suspension of classes.

Nabatid na sa ilalim ng Executive Order 66 na ipinatupad noong panahon ni dating Pangulong Noynoy Aquino, makakansela lamang ang pasok sa mga paaralan at trabaho kapag signal number 3 na ang bagyo.

Ayon kay Belaro, kahit hindi signal number 3 ay dapat nang ideklarang walang pasok sa mga eskwelahan dahil iba na ang lakas ng bagyo ngayon.

Giit ng kongresista, kahit habagat lamang ay hindi na tumitigil ang mga pag-ulan at nagdudulot na rin ito ng matinding pagbaha.

Maaari aniyang i-update at i-reconfigure ang template depende sa lakas ng ulan, dami ng tubig, pagtaas ng ilog at pagbaha gamit ang mga monitoring devices para maging basehan sa suspensyon ng klase at pasok sa trabaho.

Binigyang diin ni Belaro na dapat ay nakabatay sa siyensya ang pagsuspindi sa klase at dapat ay kasama sa mga pagbabatayan ang man made calamities at hindi lamang bagyo.

“Here in Metro Manila kahit magkatabing lungsod ‘yan hindi magkapareho ang assessment nila ng danger, so ang sinasabi po namin ay there should be a centralized agency, it makes sense na dapat po ay Department of Science and Technology kasi dapat science-based, halimbawa earthquake there is an intensity basis for suspension, na sa ganitong intensity ay it can endanger human life.” Pahayag ni Belaro

Len Aguirre / Arianne Palma / (Ratsada Balita Interview)

Posibleng umabot din sa Pilipinas at sa iba pang Asian countries ang positibong epekto ng pagkakasundo ng Amerika at North Korea.

Kasunod ito ng makasaysayang pag-uusap nina US President Donald Trump at North Korean Leader Kim Jong Un sa Singapore.

Ayon political analyst Professor Ramon Casiple, maaring maramdaman ang momentum ng pagbibigay tiyansa sa kapayapaan maging sa usapin sa South China Sea.

“’Yung China ay mas nasa posisyon ngayon na kung magbukas din siya, at bukas naman siya dahil hindi naman sila nag-aaway ng Amerika, eh maraming mga isyu sa Asya eh, isa na rito itong sa South China Sea.” Ani Casiple

Hindi naman malabong magkita ang North Korean leader at si Pangulong Rodrigo Duterte dahil matatag na trade partners ang Pilipinas at NoKor.

“Number 3 tayo na trade partner ng North Korea at mula pa noon kahit nagkakagulo na ay bukas tayo sa North Korea at sa South Korea, wala tayong pinapanigan in terms of diplomacy.” Dagdag ni Casiple.

Samantala, inaabangan na ang mga susunod pang magiging pag-uusap ng Amerika at North Korea kasunod ng paghaharap nina Trump at Kim.

Ayon din kay casiple, maituturing na framework pa lamang ang nilagdaang kasunduan ng dalawa at posibleng mas marami pang usapin ang mapagkasunduan ng dalawang bansa mga susunod na araw.

Maganda aniyang senyales ang naging inisyal na pag-uusap ng dalawa dahil napataas nito ang paniniwalaang kaya pang makamit ng kapayapaan sa mundo.

“Kaya kanya-kanyang espekulasyon ‘yan, alam mo naman ang mga skeptical diyan sa Amerika gusto nilang makita agad ang resulta, ito namang sa North Korea eh mukhang bukas given ‘yung mga kinomit nila, ‘yung complete denuclearization, although ang sabi ng mga critic bakit wala ang word na verifiable, may mga susunod pang negosasyon ‘yung phasing out, pero ‘yung intention andun.” Pahayag ni Casiple

(Balitang Todong Lakas Interview)

Isa na namang housing project ng pamahalaan para sa mga sundalo at pulis ang pinasok ng grupong Kadamay.

Madaling araw nang dumating sa housing project sa barangay San Isidro Rodriguez Rizal ang limang jeepney, sakay ang mga miyembro ng Kadamay.

Ayon sa ilang residente sa lugar, agad na pumuwesto sa mga bakanteng bahay ang mga dumating na Kadamay.

—-

Walang koneksyon sa isa’t isa ang tatlong kaso ng pagpatay sa mga pari sa nagdaang anim na buwan.

Ito, ayon kay Senior Superintendent Benigno Durana, Spokesman ng Philippine National Police o PNP ay napatunayan na sa imbestigasyon.

Sa ngayon anya ay mayroon nang sinusundang lead ang mga imbestigador upang alamin ang motibo sa pagpatay.

“Hindi robbery, hindi economic ‘yung motive ng pagpaslang sa dalawang pari but we are keeping this information in mind pero sa ngayon po base sa imbestigasyon ay may ibang motibo kung bakit sila pinaslang, related siguro sa mga trabaho nila, sa kanilang mga adbokasiya, siguro may mga sektor na nasagasaan.” Ani Durana

Tiniyak ni Durana na prayoridad ngayon ng PNP na maresolba ang pagpatay sa mga pari.

“Sabi niya (General Albayalde) to solve the case including that of Father Paez diyan rin sa Nueva Ecija as soon as possible, sinabi niya there should be no rest until we put these mindless criminals  behind bars.” Pahayag ni Durana

CHR

Samantala, kumikilos na ang Commission on Human Rights o CHR para imbestigahan ang serye ng pagpatay sa mga pari.

Ayon kay Jackie de Guia, Spokesperson ng CHR, nakakaalarma ang mga pagpatay sa mga alagad ng simbahan.

Bagamat masyadong maaga pa anya para sabihing mayroong pattern ang pagpatay, nais nilang mabusisi kung nagiging target ng pagpatay ang mga pari dahil sa kanilang pananampalataya.

Noong Disyembre ng nakaraang taon, binaril at napatay sa Jaen Nueva Ecija si Father Marcelito Paez, sinundan ito Father Mark Ventura sa Gattaran Cagayan at kamakailan si Father Richmond Nilo sa Zaragosa Nueva Ecija.

“Tinitingnan natin kung batay sa kanilang propesyon o pananampalataya ay nagiging target sila ng killings, ang tinitingnan natin dito ay ang responsibilidad ng estado na siguraduhing magkakaroon ng isang maayos na imbestigasyon.” Pahayag ni De Guia

(Ratsada Balita Interview)