Suportado ng iba’t-ibang electric vehicle o EV brands ang kampanya ng Department of Energy hinggil sa paggamit nito sa bansa.
Patunay dito ang paglahok ng maraming electric vehicle o EV brands sa ika-10 Philippine International Motor Show 2026 o PIMS 2026.
Ayon kay Director Patrick Aquino ng Energy Utilization and Management Bureau ng Department of Energy na nagsisilbing mahalagang plataporma ang Philippine International Motor Show 2026 sa pagpapakita ng inobasyon at pag-unlad ng sektor ng transportasyon tungo sa mas episyente at makabagong mobility solutions.
Naging tampok sa Philippine International Motor Show 2026 ang electric mobility kung saan 17 global automotive brands ang nagpakita ng kanilang mga produkto sa World Trade Center Metro Manila.
Kabilang sa mga dinumog ng mga dumalo ang VinFast na nagpakita ng iba’t ibang electric vehicle models kabilang ang VF 3, VF 6, VF 7, VF 9, Herio Green at Limo Green.
Pinukaw naman ang interes ng mga pamilya ng VinFast MPV 7, isang fully electric seven-seater vehicle na may hanggang 450 kilometro na saklaw sa isang full charge at may kakayahang mag-fast charge sa loob ng humigit-kumulang 30 minuto.
Ayon naman kay Antonio Zara III, CEO ng VinFast Southeast Asia, bahagi ng pakikilahok ng kumpanya sa Philippine International Motor Show 2026 ang pagsuporta sa mga programa ng pamahalaan para mapabilis ang paglipat sa electric mobility.
Batay sa datos ng International Energy Agency, maaaring umabot sa 45 porsiyento ng kabuuang vehicle sales sa Pilipinas ang EV pagsapit ng 2035 kung magpapatuloy ang suporta sa electric mobility. | Jun Samson (Patrol 24)
