HOT STORIES OF THE WEEK

Mananatili at makapagpapatuloy pa rin sa kanyang missionary works ang Australian missionary na si Sister Patricia Fox.

Ito’y matapos ipawalang bisa ng Department of Justice ang forfeiture missionary visa order ng Bureau of Immigration and Deportation laban sa kaniya.

Batay sa naging resolusyon ni Justice Secretary Menardo Guevarra, bagama’t siya ay pabor sa naging panuntunan ng Immigration na isang prebilihiyo ang pagkakaroon ng visa, hindi pa rin aniya tama na basta na lamang itong bawiin ng walang legal na batayan.

Paliwanag pa ni Guevarra, hindi maaaring gumawa ng panibagong panuntunan ang Immigration upang mabawi lamang ang ipinagkaloob nilang missionary visa kay Fox.

Kaugnay nito, inatasan ng kalihim ang Immigration na linawin kung ang inirereklamo ba laban kay Fox at mga ebidensyang isinumite ay para sa kanselasyon ng visa ng madre.

Kahapon na lamang sana ang huling araw ng pananatili sa bansa ni Fox kung hindi nabaliktad ang naturang kautasan ng Immigration na nagpaalis sa kaniya sa bansa sa loob ng tatlumpung araw.

Makabayan Bloc pinapurihan ang desisyon ng DOJ

Pinapurihan ng grupong Makabayan Bloc ang naging desisyon ng Department of Justice na baliktarin ang desisyon ng Bureau Immigration kaugnay sa kanselasyon ng Missionary Visa ng Australyanang Madre na si Sister Patricia Fox.

Ayon kay Makabayan Bloc Partylist Rep. Carlos Zarate, isang welcome development ang naging pasyang ito ni Justice Secretary Menardo Guevarra lalo’t walang nagpapakita ng matibay na ebidensya para paalisin ng bansa si Fox.

Sinabi ni Zarate na dahil sa desisyong ito ay makakapagpatuloy muli si Fox sa kaniyang pagtulong sa mga Lumad at sa iba pang mga mahihirap sa Mindanao.

—-

Pumapalo na sa halos 3,000 tambay ang naaresto ng pulisya sa Metro Manila simula nang iutos ng Pangulong Rodrigo Duterte ang matinding kampanya laban sa mga ito.

Ayon kay PNP Chief Oscar Albayalde, 900 ang lumabag sa curfew, 600 ang nahuling umiinom ng alak sa pampublikong lugar, 400 naman ang naaresto dahil sa paninigarilyo sa kalsada, 600 ang nahuling walang saplot pang itaas na pakalat-kalat, 100 ang dahil sa traffic violations at 100 sa iba pang paglabag sa mga ordinansa.

Ayon kay Albayalde, walang hinuhuli nang dahil lang sa bagansya lalo’t dinecriminalize na ito taong 2012 pa.

Mga lumalabag lang aniya sa lokal na ordinansa ang dinadampot ng mga pulis.

Kasabay nito, tiniyak ni NCRPO Director Chief Superintendent Guillermo Eleazar na walang nilabag na karapatang pantao ang pulisya sa kanilang ginawang pagdakip sa mga tambay sa iba’t ibang bahagi ng Metro Manila.

Ayon kay Eleazar, matagal nang tumutulong ang mga pulis sa pagsita sa mga tambay at iba pang lumalabag sa mga city ordinances tulad ng pag-iinuman, paninigarilyo o pag-ihi sa pampublikong lugar at mga walang damit pang-itaas.

Guidelines

Kaugnay nito, inamin ng PNP na wala pa silang guidelines kung paano ipatutupad ang utos ng Pangulong Rodrigo Duterte laban sa mga tambay.

Ayon kay Albayalde, bubuo pa lang sila ng guidelines sa pangunguna ng Directorate for Operations at inaasahang matatapos ngayong linggo.

Inatasan na aniya niya ang mga pulis na kolektahin ang mga ordinansa ng lokal na pamahalaan sa kanilang nasasakupan.

Paglilinaw ni Albayalde, hindi dapat dinadampot ng mga pulis ang mga tambay na wala namang nilalabag na ordinansa.

Kahapon, nag-viral ang Facebook post ng isang netizen na dinampot umano ng mga pulis sa Makati habang naghihintay lamang sa kaibigan sa labas ng isang bahay.

Nakapang-alis naman aniya ang suot ng netizen at kanyang mga kaibigan at hindi naman daw sila naninigarilyo o umiinom sa kalsada.

Ikinulong umano sila sa selda pero pinalaya rin makalipas ang ilang oras.

Samantala, pinayuhan ng Malacañang ang mga istambay sa mga lansangan na sumunod na lamang sa batas at manatili na lamang sa bhaay sa halip na magpalaboy-laboy sa daan tuwing gabi.

Ito ang binigyang diin ni Presidential Spokesman Harry Roque makaraang liwanagin nito na hindi maaaring arestuhin na lamang ng basta-basta ng mga pulis ang sinumang tambay sa daan lalo’t kung wala naman silang ginagawang krimen.

Giit ng kalihim, isang uri ng crime prevention ang naging kautusan ng Pangulo at wala aniya iyong intensyon na mang-aresto ng kahit sino ang mga pulis batay sa kanilang naisin lamang.

Hangad lamang aniya ng Palasyo na mahigpit na ipatupad ng mga lokal na pamahalaan ang kanilang ordinansa upang matiyak na ligtas mula sa krimen at iba pang mga masasamang elemento ang publiko tuwing dis-oras ng gabi.

Para naman kay dating Commission on Human Rights Chairman o CHR Wilhelm Soriano, bagama’t batid niya ang pinagmumulan ng Pangulo, dapat itong maging hamon sa Pambansang Pulisya kung paano iyon maipatutupad ng walang nilalabag na batas.

Hamon naman ni Senate Committee on Justice Chairman Senator Richard Gordon dapat magdoble kayod ang Pambansang Pulisya at ang lokal na pamahalaan upang gawing produktibo ang mga tambay sa lipunan.

Ayon kay Gordon, maliban aniya sa pagsaway sa mga naglalaboy sa kalsada lalo na’t kung dis-oras ng gabi, kailangan ding maipa-unawa sa publiko ang kahalagahan ng pagkakaroon ng disiplina.

By Krista de Dios

Nais ng pamahalaan na bigyang daan ang ikinasang all-out war ng Armed Forces of the Philippines o AFP laban sa New People’s Army o NPA.

Ito ay ayon sa Communist Party of the Philippines o CPP, ang tunay na dahilan ng biglang pagkansela sa nakatakda sanang pagbabalik ng usapang pangkapayapaan sa Hunyo 28.

Sa ipinalabas na pahayag ng CPP, sinabi ng grupo na nais ni Pangulong Rodrigo Duterte na bigyan ng mas mahabang panahon ang militar na makumpleto ang kampanya nito laban sa mga rebelde.

Dagdag pa ng komunistang grupo, nagpaplano rin ang militar ng mas malaki at malawak na opensiba kontra NPA sa ilalim ng ikinasa nitong Oplan Kapayapaan.

Iginiit pa ng CPP, nagsimula na rin aniya ang nasabing opensiba ng militar kung saan bahagi nito ang nasa limang libong (5,000) bagong recruit na sundalo at pagdadagdag pa ng mahigit sampung libong (10,000) tropa bago matapos ang taon.

Public consultation

Nakatakdang maglunsad ng public consultation ang Office of the Presidential Adviser on the Peace Process kasunod ng pasya ng pamahalaan na pansamantalang ipagpaliban ang nakatakda sanang pagbabalik ng peace talks.

Ito ay upang mailatag at mahingi ang opinyon ng publiko hinggil sa katatapos lamang na serye ng back channel talks sa pagitan ng pamahalaan at CPP-NPA-NDF sa The Netherlands.

Ayon kay Presidential Peace Adviser Jesus Dureza, isa sa mga dahilan ng pagkabigo ng mga nakaraang usapang pangkapayapaan ay ang kawalan ng suporta mula sa publiko.

Dagdag pa ni Dureza, nais lamang nilang maprotektahan ang mga napakasunduan na ng dalawang panig sa naganap na back channel talks.

Plano namang imbitahan ng pamahalaan sa nasabing public consultations ang ilang nakilahok sa serye ng back channel talks mula sa magkabilang panig at iba’t ibang sektor tulad ng regional peace councils, religious groups at grupo ng mga kabataan.

—-

Idinipensa ng gobyerno ang ginawang pagpapaliban sa peace talks sa NDFP o National Democratic Front of the Philippines.

Ayon kay Presidential Adviser on the Peace Process Jesus Dureza, ito ay para protektahan ang napag usapan nang magkaroon ng back channel talks sa rebeldeng grupo.

Nakatakdang imbitahin ng gobyerno ang ilang personalidad na lumahok sa back channeling para humarap sa magiging public consultation.

Binigyang diin ng gobyerno na mahalagang maipaalam at mahingi ang opinyon ng publiko sa magiging usapang pangkapayapaan sa CPP – NPA – NDF.

Matatandaang kahapon inakusahan ni CPP Founding Chairman Jose Maria Sison si Pangulong Rodrigo Duterte na balak nitong isabotahe ang peace talks.

Ilang mga pari sa Laguna ang lihim nang nagdadala ng armas bilang proteksyon sa kanilang mga sarili.

Ito ang ibinunyag ni Calamba Parishioner Atty. Francisco dela Rosa, matapos ang sunod-sunod na kaso ng pagpatay sa mga tao ng simbahan ng mga di nakilalang gunmen.

Ayon kay dela Rosa, matinding takot ang idinulot sa kanila ng serye ng pamamaslang sa kanilang hanay sa iba’t-ibang bahagi ng bansa.

Pahayag ng Calamba Parishioner, labis din nilang ikinakabahala ang pahayag ni PNP Chief Director Gen. Oscar Albayalde na isolated incident lamang ang mga kaso ng pagpatay sa mga pari na dapat umanong masusing maimbestigahan.

Base sa ulat, apat na pari na ang nasawi simula December 2017 hanggang sa kasalukuyang buwan na kinabibilangan nina Fr. Richmond Nilo ng Zaragoza, Nueva Ecija, Fr. Mark Ventura ng Cagayan province, Fr. Marcelito Paez ng Jaen, Nueva Ecija at kamakailan lamang ay si Fr. Rey Urmeneta, na isang dating Police Chaplain ng Calamba, Laguna.

Nilinaw ni National Democratic Front Chief Negotiator Fidel Agcaoili na hindi kinansela ang peace talks kung hindi ipinagpaliban lamang ito.

Ito’y makaraang i-anunsyo kamakailan ni Presidential Peace Adviser Jesus Dureza na hindi muna maisasakatuparan ang usapang pangkapayapaan sa itinakda nitong petsa sa Hunyo 28.

Ayon kay Agcaoili, nagpadala ang gobyerno ng abiso na magkakaroon ng pagbabago sa orihinal na iskedyul na kanilang napagkasunduan.

Alam na rin umano ng Royal Norwegian Government na siyang facilitator ng peace talks ang naturang desisyon.

Magugunitang sinabi ni Dureza na nais munang alamin ng administrasyon ang pulso ng publiko kaugnay sa peace talks kaya ito ipinagpaliban.

Hawak na ng Philippine National Police ang pangunahing suspek sa pagpatay kay Father Richmond Nilo.

Ito ang kinumpirma ni PNP Chief Oscar Albayalde kasabay nang mismong araw ng libing ng pari sa Nueva Ecija.

Kinilala ang suspek na si Adell Roll Milan na naaresto sa Brgy Malapit, San Isidro, Nueva ecija, alas-6:30 kagabi.

Ayon kay Albayalde, positibong kinilala ang suspek ng altar boy ng simbahan.

Wala pang malinaw na motibo ngayon sa krimen pero tatlo ang tinitingnang anggulo ng Special Investigation Task Group sa pagpatay sa pari; away sa lupa; pagtulong ng pari sa biktima ng pangmomolestiya; at alitan sa relihiyon.