HOT STORIES OF THE WEEK

Hinimok ngayon ng Commission on Human Rights o CHR ang mga awtoridad na suspendihin muna ang pagpapatupad ng kampanya laban sa mga tambay.

Ayon kay CHR Commissioner Gwen Pimentel, dapat munang mapaliwanagan ang publiko ukol dito.

Binigyang diin ni Pimentel na dapat munang tukuyin kung anong uri ng mga tambay ang aarestuhin ng mga pulis upang maalis ang anumang agam-agam ng publiko na baka sila ay basta na lamang damputin ng mga awtoridad.

Kasabay nito, tiniyak ng CHR na mahigpit silang nakabantay sa kampanya kontra tambay ng pulisya hinggil sa mga posibleng paglabag sa karapatang pantao.

—-

Ididiskarga na sa mga barko sa Subic ang mga inangkat na bigas ng National Food Authority o NFA na nakalaan para sa Metro Manila ngayong araw.

Ayon kay NFA Spokesman Rex Estoperez, nasa isang milyong sako ng murang bigas ang inaasahang ibabagsak sa mga pamilihan sa Metro Manila ngayong linggo.

Sinabi ni Estoperez na mahigit isang linggo ring naantala ang distribusyon ng mga inangkat na bigas dahil na rin sa mga naranasang sama ng panahon sa mga nakalipas na araw.

“’Yung sa General Santos ngayong linggo pa, sa Bicol ganun din po within this week sabay-sabay na po ‘yan, sa NCR ngayong araw po magdidiskarga, sa Subic nagbaba na rin tayo since June 18, mga nasa 22,000 bags na, tuloy-tuloy po tayo within this week halos sabay-sabay na pong magiging available sa mga merkado ang ating bigas.” Ani Estoperez

Samantala, tiniyak ng NFA na mahigpit nilang binabantayan ang suplay ng NFA upang hindi na anila maulit ang nangyaring pagkakasaid ng mga NFA rice sa mga pamilihan at maging sa bodega ng ahensya.

“Sa ngayon ang binabantayan natin at pinapalaki natin ang ating buffer stock, ‘yung food security stock natin, ang sabi nga ng Pangulo na di baleng sumobra ang bigas kakainin naman ‘yan kaysa kulangin tayo, ‘yan po ang sinusundan namin kasi ang mandato ng NFA ay to stabilize ang supply at presyo sa ating pamilihang bayan.” Pahayag ni Estoperez

(Balitang Todong Lakas Interview)

Nanindigan si Pangulong Rodrigo Duterte na dapat sa Pilipinas ipagpatuloy ng pamahalaan at ng CPP-NPA ang usapang pangkapayapaan.

Ito’y sa kabila ng pahayag ni CPP Founding Chairman Jose Maria Sison na wala namang mangyayari kahit pa sa Pilipinas ipagpatuloy ang negosasyon.

Sa kaniyang talumpati kasabay ng anibersaryo ng GSIS kahapon, sinabi ng Pangulo na walang dahilan para sa ibang bansa gawin ang pag-uusap.

“Bakit ako pupunta doon sa ibang lugar? Dito tayo. I guaranteed him safety and security for the duration of the talks. I gave him a small window. So let’s talk for 60 days.

“And in that period, you come home. I will pay for your expenses.”
“If after the two-month period wala, I will see to it that you walk out of the Philippines safely. Pero sabihin ko sa ‘yo, do not ever, ever come back, ever.” Pahayag ng Pangulong Duterte

Una rito, inihayag ni National Democratic Front Consultant Rey Casambre na posibleng umuwi na sa Agosto si Sison mula sa The Netherlands.

Ito’y batay na rin aniya sa naging rekomandasyon ng Government Peace Panel sa isinagawa nilang back channel talks sa Utretcht.

Gayunman, nagpahayag ng pangamba si Sison hinggil sa posibleng pagkadiskaril ng peace talks dahil sa posibleng pananabotahe kung ididikta ng Pangulo ang lugar kung saan itutuloy ang usapan.

Sa kabila nito, tiniyak ng Pangulo ang kaligtasan ni Sison sa sandaling magpasya na itong magbalik bansa na para sa peace talks.

—-

Posibleng hanggang sa Biyernes pa maipakalat ng National Food Authority o NFA sa mga pamilihan ng Metro Manila ang inangkat nilang bigas.

Ayon kay Director Rex Estoperez, Spokesman ng NFA, Miyerkoles pa ibababa ng barko ang nakalaang bigas para sa NCR, dadalhin pa ito sa bodega para suriin ang kalidad bago ipamahagi sa mga retailers.

Tiniyak ni Estoperez na hindi na aabutin ng Sabado at mabibili na sa merkado ang murang bigas mula sa NFA dito sa Metro Manila.

Sinabi ni Estoperez na mas inuna nila ang distribusyon ng murang bigas sa mga lugar na marami ang mahihirap tulad ng Surigao, General Santos City, Bicol area at iba pa.

—-

Pinai-imbestigahan na ng Department of Foreign Affairs o DFA kung may posibilidad ng “foul play” sa magkasunod na ulat ng pagpapakamatay ng dalawang Pinay household service workers sa Lebanon at Saudi Arabia.

Ayon sa DFA, batay sa ulat ng embahada ng Pilipinas sa Beirut Lebanon, isang Pinay domestic worker na tubong Cagayan ang nagpakamatay sa pamamagitan ng pagtalon sa ika-anim na palapag ng tinitirahang gusali ng employer nito noong Hunyo 11.

Habang isa pang Pinay domestic worker na nagmula sa Agusan del Sur ang iniulat ng Philippine Embassy sa Riyadh na nagbiti naman sa mismong bahay ng kanyang employer sa Al Hasa.

Kasabay nito, nagpaabot naman ng pakikiramay si Foreign Affairs Secretary Alan Peter Cayetano sa pamilya ng mga nasabing OFW.

Tiniyak din ni Cayetano ang tulong sa pamilya ng mga nasawing OFW kabilang na ang agarang pag-repatriate sa labi ng mga ito.

—-