Nagluluksa ang Archdiocese of Palo sa nangyaring pamamaril sa San Jose National High School sa Tacloban City, na ikinasawi ng apat na estudyante nito.
Sa pahayag na inilabas ni Palo Archbishop John Du, inihahandog niya ang kanyang panalangin hindi lamang sa pamilya ng mga nasawi at nasugatan, kundi pati na rin sa mga naapektuhan sa insidente.
Dagdag pa ng Arsobispo, nagsisilbing hamon ang naturang pamamaril sa kung papaano pinapalaki ng lipunan ang mga kabataan at kung ano ang mga aral na iniiwan sa mga ito.
Hinimok din ni Archbishop Du ang publiko na magkaisa at tiyaking hindi na muling mangyayari ang nasabing insidente ng pamamaril.
Samantala, ibinahagi naman ni Fr. Mark Ivo Velasquez, isang pari ng Archdiocese of Palo, ang kanyang karanasan sa kanyang pagdalaw sa pinangyarihan ng pamamaril.
Ayon kay Fr. Velasquez, bukod sa pananalangin sa palibot ng paaralan, dinamayan din niya ang mga naapektuhan ng pamamaril. — sa panulat ni Anjo Riñon
